అంతర్జాతీయ వేదికపై అమెరికా అధ్యక్షుడు డొనాల్డ్ ట్రంప్ ఇరాన్‌పై సంచలన ఆరోపణలు చేశారు. పశ్చిమాసియా ప్రాంతంలో యుద్ధ మేఘాలు అలుముకున్న వేళ ఇరాన్ పాలక వర్గంపై కరడుగట్టిన స్థాయిలో విరుచుకుపడ్డారు. గత ఎనిమిది నెలల స్వల్ప వ్యవధిలోనే ఇరాన్ ప్రభుత్వం ఏకంగా 75 వేల మంది నిరసనకారులను అత్యంత క్రూరమైన రీతిలో పొట్టనబెట్టుకుందని ట్రంప్ సంచలన ఆరోపణలు చేశారు. ప్రజాస్వామ్య హక్కుల కోసం, తమ స్వేచ్ఛ కోసం వీధుల్లోకి వచ్చి గళమెత్తిన నిరసనకారులను అణచివేసేందుకు ఆ దేశ ప్రభుత్వం పచ్చి రాక్షసత్వాన్ని ప్రదర్శించిందని మండిపడ్డారు.

అక్కడ ప్రజలు ఎందుకు నిరసనలు చేయడం లేదని కొందరు తనను అడిగారని ట్రంప్ తెలిపారు. వీధి చివరన మెషిన్ గన్లతో నిలబడి విచక్షణారహితంగా కాల్పులు జరుపుతుంటే సామాన్య ప్రజలు బయటకు వచ్చి నిరసనలు తెలపడం ఎలా సాధ్యమవుతుందని ప్రశ్నించారు. అంతేకాకుండా ప్రభుత్వం చేసిన ఈ దారుణాలను ప్రశ్నించిన వారిని లేదా నిరసనల్లో పాల్గొన్న వారిని అందరూ చూస్తుండగానే బహిరంగంగా క్రేన్లకు వేలాడదీసి చంపేస్తున్నారని ఆవేదన చేశారు. ఇరాన్ పాలకుల ఈ నియంతృత్వ విధానాలు మానవత్వానికే పెద్ద మచ్చ అని అన్నారు.

ఇదే ప్రచార వేదికపై నాటో కూటమి దేశాల తీరును కూడా ట్రంప్ గట్టిగా తప్పుపట్టారు. ఇరాన్‌తో యుద్ధ వాతావరణం నెలకొన్న సమయంలో తమకు సహాయం చేయాల్సిందిగా నాటో మిత్రదేశాలను కోరానని చెప్పారు. అయితే ఆ సహాయం అమెరికాకు నిజంగా అవసరం ఉండి కాదని, కష్టకాలంలో నాటో దేశాల అసలు నిజస్వరూపం ఏంటో.. వారి ఆలోచనా విధానం ఎలా ఉందో పరీక్షించడానికే తాను ఆ సహాయాన్ని అడిగానని ట్రంప్ స్పష్టం చేశారు.

మనం నాటో కూటమి రక్షణ కోసం, వారి భద్రత కోసం కోట్లాది డాలర్ల నిధులను ఖర్చు పెడుతున్నాం. కానీ మనం ఒక చిన్న సహాయం అడిగినప్పుడు మాత్రం ఆ దేశాల నుంచి ‘నో’ అనే సమాధానం వచ్చిందని తీవ్ర అసంతృప్తి వ్యక్తం చేశారు. నిధులు తీసుకునేటప్పుడు ముందుండే నాటో దేశాలు, సహాయం అనగానే వెనకడుగు వేయడం వారి ద్వంద్వ విధానానికి నిదర్శనమని ట్రంప్ మండిపడ్డారు.