
భారతీయ పౌరాణిక గాథలు, అంతుచిక్కని మిస్టరీలు, ఆధునిక ఫ్యూచరిస్టిక్ ఏఐ టెక్నాలజీ కలయికతో ఒక సరికొత్త సినిమాటిక్ భారీ బడ్జెట్తో రెడీ అవుతోంది. ప్రసిద్ధ నిర్మాణ సంస్థ ‘ఆర్విహా క్రియేషన్స్’ తన పతాకంపై నిర్మిస్తున్న తొలి భారీ చిత్రం ‘ది ప్రాంప్ట్ వార్ – రైజ్ ఆఫ్ మహావీర్’ (The Prompt War – Rise of Mahaveer). దసర పండుగ శుభ సందర్భాన్ని పురస్కరించుకుని ఈ సినిమా టైటిల్, ఫస్ట్ లుక్ టైటిల్ పోస్టర్ను మేకర్స్ అఫీషియల్గా ప్రకటించారు. ఈ అప్డేట్తో ప్రేక్షకుల్లో భారీ అంచనాలు నెలకొన్నాయి.
సాధారణంగా భారతీయ పురాణాల ఆధారంగా రూపొందే సినిమాలకు ప్రేక్షకుల నుంచి ఎల్లప్పుడూ మంచి ఆదరణ లభిస్తుంది. అయితే ఆ పురాణాలలోని గొప్పతనాన్ని కేవలం పాతకాలపు నేపథ్యానికే పరిమితం చేయకుండా.. ప్రస్తుత యూత్ ఎంతో ఆసక్తిగా గమనిస్తున్న ఏఐ టెక్నాలజీతో ముడిపెడుతూ ఈ కథను తీర్చిదిద్దడం విశేషమనే చెప్పాలి. ఇక ఈ టైటిల్ ప్రకారం.. ‘ది ప్రాంప్ట్ వార్’ అనేది కథలోని సైన్స్ అండ్ టెక్నాలజీని సూచిస్తుండగా.. ‘రైజ్ ఆఫ్ మహావీర్’ అనేది హీరో పాత్రను, దాని వెనుక ఉన్న అంతుచిక్కని రహస్యాలను తెలియజేస్తోంది. దసరా సందర్భంగా విడుదలైన ఈ పోస్టర్ డిజైన్, విజువల్స్ సినిమాపై భారీ అంచనాలను పెంచాయి.
నూతన ప్రతిభకు పెద్దపీట:
ఈ కొత్త సినిమాను ప్రొడ్యూసర్ నరేష్ గౌడ్ ఎంతో ప్రతిష్టాత్మకంగా నిర్మిస్తున్నారు. కొత్త ఆలోచనలకు, ప్రతిభకు అవకాశం ఇవ్వాలని.. ఈ సినిమా బాధ్యతలను కొత్త దర్శకుడు ప్రసన్న కొత్వాల చేతిలో పెట్టారు. ఈ కొత్త డైరెక్టర్ ప్రాచీన పౌరాణిక అంశాలను, భవిష్యత్తు సాంకేతిక పరిజ్ఞానం, సరికొత్త కాన్సెప్ట్తో ప్రేక్షకులకు సర్పైజింగ్ అనుభూతిని అందించబోతున్నారు. అలాగే ఈ సినిమాతో జి.సి. శేఖర్ సంగీత దర్శకుడిగా వెండితెరకు ఎంట్రీ ఇస్తున్నారు.
3డీ వెర్షన్లో ప్రపంచవ్యాప్త విడుదల..
కొత్త డైరెక్టర్, కొత్త మ్యూజిక్ డైరెక్టర్ కాంబోలో ‘ది ప్రాంప్ట్ వార్ – రైజ్ ఆఫ్ మహావీర్’ చిత్రం కేవలం ప్రాంతీయ స్థాయికే పరిమితం చేయకుండా పాన్-ఇండియా స్థాయిలో ప్రేక్షకుల ముందుకు రాబోతుంది. తెలుగుతో పాటు హిందీ, తమిళం, మలయాళం, కన్నడ భాషల్లో ఈ సినిమా ఏకకాలంలో విడుదల కానుంది. అంతేకాకుండా ప్రేక్షకుల అనుభవాన్ని మరో స్థాయికి తీసుకెళ్లేందుకు ఈ చిత్రాన్ని 3D వెర్షన్లో అందుబాటులోకి తీసుకొస్తున్నారు. ఈ విజువల్ వండర్ను వచ్చే ఏడాది 2027 వేసవిలో గ్రాండ్గా థియేటర్లలో రిలీజ్ చేసేందుకు మేకర్స్ సన్నాహాలు చేస్తున్నారు. పౌరాణిక మిస్టరీ, ఏఐ కలయికతో రాబోతున్న ఈ మూవీ ఎలాంటి సంచలనాలు సృష్టిస్తుందో చూడాలంటే మరికొంత కాలం వేచి ఉండాల్సిందే.









