పాకిస్తాన్‌లోని బలోచిస్తాన్ రీజియన్‌లో ఉద్రిక్తతలు ఒక్కసారిగా పరాకాష్టకు చేరుకున్నాయి. స్వాతంత్ర్యం కోసం పోరాడుతున్న బలోచ్ లిబరేషన్ ఆర్మీ పాకిస్తాన్ రక్షణ దళాలపై విరుచుకుపడుతూ వరుస దాడులకు తెగబడింది. అక్టోబర్ 9 నుంచి అక్టోబర్ 20 మధ్య కాలంలో 34 ముష్కర దాడులు నిర్వహించినట్లు బీఎల్ఏ ప్రకటించింది. ఈ దాడుల పరంపరలో పాకిస్తాన్ ఆర్మీకి చెందిన సైనికులు, సైనిక నిఘా సంస్థ ఏజెంట్లు, మిలీషియా సభ్యులతో కలిపి మొత్తం 23 మంది భద్రతా సిబ్బందిని హతమార్చినట్లు బిఎల్ఏ ఒక సుదీర్ఘమైన సంచలన నివేదికను విడుదల చేసింది. ఈ ఎదురుకాల్పుల్లో తమ వైపు నుంచి కూడా ఆరుగురు పోరాటయోధులు ప్రాణాలు కోల్పోయారని ఆ సంస్థ స్పష్టం చేసింది.

బలోచిస్తాన్ వ్యాప్తంగా ఉన్న ప్రధాన జిల్లాలైన కేచ్, ఖుజ్దార్, మస్తుంగ్, నోష్కి, చాగై వంటి ప్రాంతాలలో పాకిస్తాన్ సైనిక కాన్వాయ్‌లు, సప్లై వాహనాలు, చెక్‌పోస్టులు, బాంబు డిస్పోజల్ బృందాలను లక్ష్యంగా చేసుకుని ఈ దాడులు జరిగాయి. ప్రధానంగా ఐఈడీ పేలుళ్లు, స్నైపర్ దాడులు, రాకెట్ లాంచర్లతో విరుచుకుపడటం, ఆర్మీ వాహనాలపై హఠాత్తుగా ఆంబష్ చేయడం ద్వారా సైనికులను దెబ్బతీశారు. ఒకానొక సందర్భంలో చైనా-పాకిస్తాన్ ఎకనామిక్ కారిడార్ రవాణా మార్గాన్ని దాదాపు మూడు గంటల పాటు పూర్తిగా నిర్బంధించి పాక్ సైన్యానికి వెళ్లే ఆయుధాలు, రవాణా సామాగ్రిని స్వాధీనం చేసుకోవడమే కాకుండా విధుల్లో ఉన్న నాదిర్ అలీ అనే పాకిస్తాన్ సైనికుడిని సజీవంగా బందీగా పట్టుకున్నట్లు బిఎల్ఏ వెల్లడించింది.

పాకిస్తాన్ ప్రభుత్వ ఆర్థిక మూలాలను దెబ్బతీయడమే లక్ష్యంగా తాము ఎకనామిక్ బ్లాకేడ్ వ్యూహాన్ని అమలు చేస్తున్నామని బిఎల్ఏ ప్రతినిధులు స్పష్టం చేశారు. ఈ భారీ దాడుల ప్రకటనతో తీవ్ర దిగ్భ్రాంతికి గురైన పాకిస్తాన్ రక్షణ శాఖ, తమ వైపు జరిగిన ప్రాణనష్టాన్ని అధికారికంగా పూర్తిగా ధ్రువీకరించనప్పటికీ పరిస్థితిని అదుపులోకి తెచ్చేందుకు బలోచిస్తాన్‌లో హెలికాప్టర్లతో గాలింపు చర్యలను, తీవ్రస్థాయి సెర్చ్ ఆపరేషన్లను చేపట్టింది. అమెరికా, చైనా ప్రాజెక్టులతో ముడిపడి ఉన్న ప్రాంతాల్లో వరుసగా జరుగుతున్న ఈ దాడులు పాకిస్తాన్ ప్రభుత్వానికి, రక్షణ దళాలకు నిద్రలేకుండా చేస్తున్నాయి.