
వివాదాస్పద దర్శకుడు రామ్గోపాల్ వర్మ మరో కొత్త సినిమాతో ప్రేక్షకుల్ని అలరించడానికి సిద్ధమయ్యారు. ఆయన దర్శకత్వం వహిస్తున్న కొత్త సినిమా టైటిల్ను తాజాగా సోషల్ మీడియా ద్వారా పంచుకున్నారు. తన కొత్త సినిమాకు ‘పోలీస్ కంపెనీ’ అనే టైటిల్ను ఖరారు చేసినట్లు తెలిపారు. ఈ మూవీ క్రైమ్ థ్రిల్లర్ జానర్లో తీసుకొస్తున్నారు.

అయితే ఈ సినిమాకు అలాంటి టైటిల్ ఎందుకు పెట్టారో ఆయన వివరించారు. దీంతోపాటు ఈ మూవీ రిలీజ్ డేట్ను కూడా ఆయన వెల్లడించారు. ‘‘ పోలీస్ అనేది ప్రజల రక్షణ కోసం, చట్టాన్ని కాపాడటం కోసం ఏర్పడిన ఒక ప్రభుత్వ సంస్థ. అయితే ఎప్పుడైతే ఆ సంస్థ ప్రజల రక్షణను పక్కన పెట్టి కంపెనీలాగా కేవలం డబ్బు, లాభాలు, స్వార్థ ప్రయోజనాలే పరమావధిగా పనిచేస్తుందో… అప్పుడు అది ఒక సంస్థలా కాకుండా కంపెనీలాగా మారుతుంది. అందుకే ఈ సినిమాకి పోలీస్ కంపెనీ అనే పేరు పెట్టాను’’ అని రామ్ గోపాల్ వర్మ చెప్పుకొచ్చారు.
ఇదిలా ఉంటే.. ఈ సినిమా రిలీజ్ డేట్ను కూడా ఆయన పంచుకున్నారు. ఈ చిత్రాన్ని వచ్చే ఏడాది 2027 జూన్ 4వ తేదీన థియేటర్లలో రిలీజ్ చేయనున్నట్లు తెలిపారు. ఈ చిత్రాన్ని టీ- సిరీస్ నిర్మిస్తుంది. హర్షవర్ధన్ రాణే ప్రధాన పాత్ర పోషిస్తున్నారు. ఆయనతో పాటు ఫర్దీన్ ఖాన్, ఫాతిమా సనా షేక్, పరేష్ రావల్, సౌరభ్ శుక్లా, మకరంద్ దేశ్పాండే, అశ్విని కల్సేకర్ కనిపించనున్నారు









