
సాధారణంగా పండగ సీజన్ వస్తే బంగారం, వెండి ధరలు ఆకాశాన్ని తాకుతాయి. కానీ ఈసారి అందుకు భిన్నంగా పసిడి, వెండి ధరలు స్వల్పంగా తగ్గుముఖం పడుతున్నాయి. అంతర్జాతీయ మార్కెట్లో నెలకొన్న రకరకాల ఆర్థిక పరిణామాలు, అనిశ్చితులు, ఇతర కారణాల వల్ల ఈ విలువైన లోహాల ధరలు దిగొస్తున్నాయని మార్కెట్ నిపుణులు చెబుతున్నారు.
Also Read : రాగికి గోల్డెన్ డేస్.. డేంజర్లో బంగారం.. ఇకపై కాపర్ ముట్టుకుంటే షాకే!
హైదరాబాద్ మార్కెట్లో 10 గ్రాముల 24 క్యారెట్ల బంగారం ధర రూ.1,47,348 వద్ద కొనసాగుతోంది. అలాగే కేజీ వెండి ధర రూ.2.06 లక్షలకు చేరుకుంది. అంతర్జాతీయ మార్కెట్లోనూ పసిడి ధరలు తగ్గుతున్నాయి. స్పాట్ గోల్డ్ ధర ఔన్సుకు 4,089 డాలర్లకు పడిపోగా ఇది దాదాపు వారం రోజుల కనిష్ఠ స్థాయిగా నమోదైంది. మరోవైపు వెండి కూడా ఔన్సు ధర 56.32 డాలర్ల వద్ద ట్రేడవుతోంది. ఫ్యూచర్స్ మార్కెట్లోనూ ఇదే రీతిలో 10 గ్రాముల బంగారం రూ.1.44 లక్షలుగా, కేజీ వెండి రూ. 2.03 లక్షల వద్ద పడిపోయాయి.
పెరుగుతున్న ద్రవ్యోల్బణాన్ని అదుపు చేయడానికి అమెరికా కేంద్ర బ్యాంకు రాబోయే సమీక్షలో వడ్డీ రేట్లను తగ్గించకపోవచ్చని తెలుస్తోంది. వడ్డీ రేట్లు తగ్గకపోతే ఎలాంటి క్రమం తప్పని రాబడి లేని బంగారంపై పెట్టుబడి పెట్టడం కంటే ఇతర సురక్షితమైన ఇన్వెస్ట్మెంట్ మార్గాల వైపు పెట్టుబడిదారులు ఎక్కువగా మొగ్గు చూపుతారు. ఇదే బంగారం గిరాకీ తగ్గిపోవడానికి కారణమని తెలుస్తోంది. అయితే డాలర్తో పోలిస్తే భారత రూపాయి మారకం విలువ కాస్త బలంగా మారడం కూడా దేశంలో బంగారం ధరలు తగ్గడానికి కారణమని చెప్పవచ్చు. దీనికి తోడు పండగ వేళ అనుకున్న స్థాయిలో ఆభరణాల రూపంలో బంగారం కొనుగోళ్లు జరగకపోవడం, డిమాండ్ తగ్గడం కూడా ఈ పతనానికి మరో కారణంగా కనిపిస్తోంది.
Also Read : ఫ్రాన్స్లో హింసాత్మక దహనాలు.. ఈ మహా సంక్షోభానికి ఆ 5 తప్పులే కారణమా?









