
క్రెడిట్ కార్డ్ వాడుతున్న వారికి రిజర్వ్ బ్యాంక్ ఆఫ్ ఇండియా గుడ్ న్యూస్ తెలిపింది. తరచూ క్రెడిట్ కార్డ్ బిల్లు గడువు తేదీ గుర్తులేకనో లేదా సాంకేతిక సమస్యల వల్ల ఒక్క రోజు ఆలస్యంగా చెల్లించినా బ్యాంకులు వేసే భారీ లేట్ ఫీజులు, పెనాల్టీలతో సతమతమయ్యే వినియోగదారుల కోసం ఆర్బీఐ కొత్త నిబంధనలను తీసుకువచ్చింది.
Also Read : ఢిల్లీలో డేంజర్ బెల్స్.. వెహికల్స్, బిల్డింగ్స్పై కఠిన ఆంక్షలు.. అమలు ఎప్పటి నుంచంటే?
3 రోజుల గ్రేస్ పీరియడ్
ఇప్పటివరకు క్రెడిట్ కార్డ్ బిల్లు చెల్లించాల్సిన గడువు తేదీ దాటి ఒక్క రోజు ఆలస్యమైనా బ్యాంకులు వెంటనే లేట్ పేమెంట్ ఛార్జీలు విధించడంతో పాటు ఆ విషయాన్ని క్రెడిట్ బ్యూరోలకు నివేదించేవి. దీనివల్ల యూజర్ల సిబిల్ స్కోర్ దారుణంగా పడిపోయేది. అయితే కొత్త రూల్స్ ప్రకారం గడువు తేదీ పూర్తయిన తర్వాత కూడా బ్యాంకులకు 3 రోజుల సమయం ఇవ్వాల్సి ఉంటుంది. అంటే డ్యూ డేట్ దాటిన 3 రోజుల లోపు బిల్లు కడితే ఎలాంటి లేట్ పేమెంట్ ఛార్జీలు పడవు. అలాగే సిబిల్ బ్యూరోలకు కూడా మీ ఖాతా ఆలస్యమైందని నివేదించడానికి వీల్లేదు.
లేట్ ఫీజు లెక్కింపులో పారదర్శకత
సాధారణంగా కొందరు బిల్లులో కొంత మొత్తాన్ని చెల్లించి.. మిగిలిన సొమ్మును తర్వాత కడతారు. కానీ బ్యాంకులు మాత్రం మిగిలిన చిన్న మొత్తానికి ఫీజు వేయకుండా మొత్తం అసలు బిల్లు పైనే లేట్ పేమెంట్ ఛార్జీలు లెక్కించేవి. ఇకపై అలా చేయడానికి కుదరదు. గడువు తేదీ దాటిన తర్వాత కట్టకుండా ఇంకా ఎంత మొత్తం అయితే మిగిలి ఉందో కేవలం ఆ బకాయి పైనే లేట్ పేమెంట్ ఫీజును లెక్కించాలని ఆర్బీఐ స్పష్టం చేసింది. దీనివల్ల కస్టమర్లపై పడే అనవసరపు ఆర్థిక భారం గణనీయంగా తగ్గుతుంది.
ఛార్జీలలో మార్పులు చేస్తే 30 రోజుల ముందే చెప్పాలి
కార్డ్ సర్వీస్ ఛార్జీలు, వడ్డీ రేట్లు లేదా లేట్ ఫీజు నిర్మాణంలో బ్యాంకులు ఏవైనా మార్పులు చేయాలనుకుంటే ఆ విషయాలను కస్టమర్లకు కనీసం 30 రోజుల ముందే స్పష్టంగా సమాచారం అందించాలి. ముందస్తు సమాచారం లేకుండా ఉన్నపళంగా ఛార్జీలను పెంచడానికి వీల్లేదు.
కార్డ్ క్లోజింగ్ ఆలస్యమైతే రోజుకు రూ.500 పరిహారం
చాలామంది ఫేస్ చేసే అతిపెద్ద సమస్య క్రెడిట్ కార్డును క్యాన్సిల్ చేయడం లేదా క్లోజ్ చేయడం. యూజర్లు కార్డ్ క్లోజ్ చేయమని కోరినా బ్యాంకులు ఏళ్ల తరబడి దాన్ని సాగదీస్తూ ఉండేవి. అయితే కొత్త నిబంధనల ప్రకారం కస్టమర్ నుంచి కార్డ్ మూసివేత విజ్ఞప్తి వచ్చిన 7 రోజుల్లోగా బ్యాంక్ ఆ ప్రాసెస్ పూర్తి చేయాలి. ఒకవేళ 7 రోజులు దాటినా కార్డ్ క్లోజ్ చేయకపోతే ఆలస్యమైన ప్రతి రోజుకు రూ.500 చొప్పున బ్యాంకే కస్టమర్కు నష్టపరిహారంగా చెల్లించాల్సి ఉంటుంది.
ఫిర్యాదుల పరిష్కారం & అంబుడ్స్మన్
కార్డుకు సంబంధించి కస్టమర్లు చేసే ఏవైనా ఫిర్యాదులను బ్యాంకులు 30 నుంచి 60 రోజుల్లోగా పరిష్కరించాలి. ఒకవేళ బ్యాంక్ ఇచ్చిన సమాధానంతో మీకు సంతృప్తి లేకపోయినా లేదా నిర్దేశిత సమయంలో సమస్య తీరకపోయినా నేరుగా ఆర్బీఐ అంబుడ్స్మన్కు ఫిర్యాదు చేసి న్యాయం పొందవచ్చు.
Also Read : ఆన్లైన్ ఫుడ్ ప్రియులకు అదిరిపోయే వార్త.. ఫ్లిప్కార్ట్ కొత్త సేవలు ప్రారంభం!
ఇది ఎప్పటి నుంచి అమల్లోకి అంటే?
ఆర్బీఐ తీసుకువచ్చిన ఈ సవరించిన నిబంధనలన్నీ వచ్చే ఏడాది ఏప్రిల్ 1 నుంచి దేశవ్యాప్తంగా పూర్తిస్థాయిలో అమల్లోకి రానున్నాయి. ఈ నిర్ణయం వల్ల కోట్లాది మంది క్రెడిట్ కార్డ్ వినియోగదారులకు పెద్ద ఉపశమనం కలగనుందని చెప్పవచ్చు.









