
యూరప్ దేశాల్లో పెరుగుతున్న నిత్యావసరాలు, ఇంధన ధరలు తీవ్ర ఆందోళనలకు దారితీస్తుంటే, భారత్లో మాత్రం క్రూడ్ ఆయిల్ ధరలు తగ్గుముఖం పట్టడం సామాన్యులకు ఊరటనిస్తోంది. యూరప్లో ద్రవ్యోల్బణం, ఇంధన భారం కారణంగా ప్రజల్లో తీవ్ర అసహనం వ్యక్తమవుతోంది. ముఖ్యంగా ఇటలీలో ఈ నిరసనలు ఒక్కసారిగా హింసాత్మకంగా మారాయి. మిలన్ నగరంతో పాటు ఉత్తర ఇటలీ వ్యాప్తంగా యువత రోడ్లపైకి వచ్చి దుకాణాల అద్దాలు పగలగొట్టి, ఆస్తులను ధ్వంసం చేస్తూ దోపిడీలకు తెగబడ్డారు.
ఈ హింసను అణచివేసేందుకు ఇటలీ ప్రధాని జార్జియా మెలోని ప్రభుత్వం సంచలన నిర్ణయం తీసుకుంది. “నిరసన తెలపడం హక్కు.. కానీ నగరాలను తగులబెట్టడం నేరం” అని స్పష్టం చేస్తూ కొత్త భద్రతా డిక్రీని అమల్లోకి తెచ్చారు. దీని ప్రకారం, మైనర్లు ప్రభుత్వ లేదా ప్రైవేట్ ఆస్తులను ధ్వంసం చేస్తే, ఆ నష్టపరిహారాన్ని వారి తల్లిదండ్రుల నుంచే రికవరీ చేస్తారు. అల్లర్లకు పాల్పడేవారికి ఐదేళ్ల వరకు జైలు శిక్ష, రూ.18 లక్షల (€20,000) వరకు జరిమానా విధించనున్నారు. భద్రత కోసం మిలన్లో 500 మంది సైనికులను కూడా మోహరించారు.
ఒకవైపు ఇటలీ వంటి యూరోపియన్ దేశాల్లో జీవన వ్యయం, పెట్రోల్–డీజిల్ ధరల సెగతో వీధులు రణరంగంగా మారుతుంటే, భారత్కు మాత్రం అంతర్జాతీయ మార్కెట్ సానుకూలంగా మారింది. గ్లోబల్ మార్కెట్లో క్రూడ్ ఆయిల్ ధరలు స్థిరంగా దిగిరావడం భారత్కు రక్షణాత్మకంగా నిలుస్తోంది. ఇంధన దిగుమతులపై ఆధారపడే భారత్లో తగ్గుతున్న చమురు ధరల వల్ల ద్రవ్యోల్బణ ఒత్తిడి తగ్గి, పెట్రోల్, డీజిల్ రేట్లు స్థిరంగా ఉండటానికి లేదా మరింత తగ్గేందుకు దోహదపడుతున్నాయి. యూరప్ను గందరగోళంలోకి నెట్టిన ఇంధన సంక్షోభం నుంచి భారత్ సేఫ్గా బయటపడుతుండటం విశేషం.
ఇటలీ తెచ్చిన ఈ కొత్త చట్టం ప్రపంచవ్యాప్తంగా ‘తల్లిదండ్రుల బాధ్యత’పై సరికొత్త చర్చకు తెరలేపింది. పిల్లలు చేసే ఆగడాలకు తల్లిదండ్రులు ఆర్థికంగా మూల్యం చెల్లించాలా అనే వాదనలు వినిపిస్తుండగా.. నష్టం బాధితులపై పడకుండా ఉండాలంటే ఈ నిర్ణయం తప్పదని మెలోని ప్రభుత్వం గట్టిగా సమర్థించుకుంటోంది.









