Europe 50000 Deaths : ఎల్లప్పుడూ చల్లని వాతావరణంతో ఉండే ఐరోపా ఖండం(Europe) లో భానుడు పగబట్టినట్లు ప్రతాపం చూపుతున్నాడు. వాతావరణ మార్పుల తీవ్రత ఎంత భయానకంగా ఉందో చాటిచెబుతూ.. గతంలో ఎన్నడూ చూడని రీతిలో రికార్డు స్థాయి ఉష్ణోగ్రతలు నమోదవుతున్నాయి. ఎల్‌నినో ప్రభావం, శిలాజ ఇంధనాల కాలుష్యం మూలంగా సంభవించిన ఈ తీవ్ర వడగాలులు వేలాది మంది ప్రాణాలను బలిగొంటున్నాయి. కేవలం జూన్ నుంచి ఆగస్టు నెలల వ్యవధిలోనే ఐరోపా వ్యాప్తంగా రికార్డు స్థాయిలో 50 వేల మందికి పైగా మరణించడం ప్రపంచ వ్యాప్తంగా తీవ్ర దిగ్భ్రాంతిని కలిగిస్తోంది.

Also Read : సిమ్ కార్డు తీస్తే వాట్సాప్ బంద్.. కేంద్ర ప్రభుత్వం సంచలన నిర్ణయం!

ఈ మరణాల్లో దాదాపు 32,600 మంది కేవలం మానవ తప్పిదాల వల్ల అంటే శిలాజ ఇంధనాల కాలుష్యంతో ఏర్పడిన వాతావరణ మార్పుల కారణంగానే మరణించారని స్పష్టమవుతోంది. ఒక్క యునైటెడ్ కింగ్‌డమ్‌లోనే ఈ వేసవి కాలంలో 4,354 మంది వడదెబ్బకు ప్రాణాలు కోల్పోగా.. మృతులలో అత్యధికంగా వయోవృద్ధులే ఉన్నట్లు తెలుస్తోంది. యుకేతో పాటు బెల్జియం, ఫ్రాన్స్, జర్మనీ, నెదర్లాండ్స్, స్పెయిన్, స్విట్జర్లాండ్‌ వంటి పలు దేశాలలో మునుపెన్నడూ లేని విధంగా ఉష్ణోగ్రతలు గరిష్ఠ స్థాయికి చేరాయి.

అసలు శీతల ఖండంలో ఈ రేంజ్ ‘హీట్‌డోమ్’ పరిస్థితులు తలెత్తడానికి ప్రధాన కారణం సహారా ఎడారి నుంచి ఉత్తర దిశగా వేగంగా వీస్తున్న వేడి గాలులు, పెరిగిన ఎల్‌నినో ప్రభావమేనని నిపుణులు వెల్లడించారు. ఈసారి ఐరోపా చవిచూస్తున్న వడగాల్పులు చరిత్రలోనే అత్యంత ప్రమాదకరమైనవని శాస్త్రవేత్తలు ఆందోళన వ్యక్తం చేస్తున్నారు. మారుతున్న కాలానికి, వాతావరణ విపత్తులకు అనుగుణంగా ప్రభుత్వం తగిన ముందస్తు చర్యలు తీసుకోకపోవడం వల్లనే ఈస్థాయిలో ప్రాణనష్టం సంభవించిందని తీవ్రంగా విమర్శిస్తున్నారు. యూరప్ దేశాలు ఇప్పటికైనా వేగవంతమైన వాతావరణ రక్షణ చర్యలు తీసుకోకపోతే రాబోయే రోజుల్లో పరిస్థితులు మరింత భయానకంగా దిగజారే ముప్పు ఉందని శాస్త్రవేత్తలు తీవ్రంగా హెచ్చరిస్తున్నారు.

Also Read : పిల్లలు నిరసన చేస్తే తల్లిదండ్రులకు ఫైన్.. దేశంలోనో తెలుసా?