Hyderabad : హైదరాబాద్‌లో నీటిని వృథా చేసే ట్యాంకర్లపై జలమండలి కఠిన చర్యలు తీసుకోనుంది. ట్యాంకర్ల నుంచి నీరు లీక్ అవుతున్నా, రోడ్డుపై నీరు వృథాగా పోతున్నా ఇకపై ఊరుకునేది లేదని స్పష్టం చేసింది. నవంబర్ 1 నుంచి నిబంధనలు పాటించని ట్యాంకర్ యజమానికి రూ.5 వేల జరిమానా విధించనున్నారు. అదే ట్యాంకర్ మరోసారి తప్పు చేస్తే దాని రిజిస్ట్రేషన్ రద్దు చేస్తామని అధికారులు తెలిపారు.

ట్యాంకర్లకు మూతలు సరిగ్గా లేకపోవడం వల్ల నీటిని తీసుకెళ్లే సమయంలో చాలా నీరు రోడ్డుపై పడిపోతోందని జలమండలి గుర్తించింది. దీంతో నీరు నింపే ముందు ట్యాంకర్‌ను పూర్తిగా చెక్ చేయాలని అధికారులు నిర్ణయించారు. ట్యాంకర్‌లో ఎక్కడైనా నీరు కారుతుందా? మూత సరిగ్గా ఉందా? అనే విషయాలను ముందే చూడాలి. ఏదైనా సమస్య ఉంటే దాన్ని సరిచేసే వరకు ట్యాంకర్‌లో నీరు నింపకూడదని జలమండలి ఎండీ అశోక్ రెడ్డి అధికారులను ఆదేశించారు. ఫిల్లింగ్ స్టేషన్ల వద్ద కూడా ఈ విషయంలో జాగ్రత్తగా ఉండాలని చెప్పారు. లీకేజీ ఉన్న లేదా మూత సరిగ్గా లేని ట్యాంకర్లకు నీరు నింపకూడదని స్పష్టం చేశారు. ట్యాంకర్ యజమానులు, డ్రైవర్లు కూడా నీరు వృథా కాకుండా చూసుకోవాలని సూచించారు.

ఇక తాగునీటిని అవసరం లేని పనులకు వాడకుండా ఉండేందుకు జలమండలి మరో కొత్త విధానాన్ని తీసుకురానుంది. నవంబర్ 1 నుంచి ‘గ్రీన్ వాటర్ ట్యాంకర్లు’ అందుబాటులోకి రానున్నాయి. నిర్మాణ పనులు, మొక్కలకు నీళ్లు పెట్టడం, రోడ్లు శుభ్రం చేయడం, దుమ్ము తగ్గించడం వంటి పనులకు ఈ నీటిని వాడుకోవచ్చు. ఈ గ్రీన్ వాటర్ అనేది శుద్ధి చేసిన మురుగునీటితో తయారు చేస్తారు. దీంతో ఇలాంటి పనులకు తాగునీటిని వాడాల్సిన అవసరం తగ్గుతుంది. అలాగే భూగర్భ జలాలపై కూడా ఒత్తిడి తగ్గుతుందని అధికారులు భావిస్తున్నారు.

గ్రీన్ వాటర్ ట్యాంకర్లను గుర్తించేందుకు ప్రత్యేక గుర్తులు, జీపీఎస్ ఏర్పాటు చేయనున్నారు. ట్యాంకర్ ఎక్కడి నుంచి నీరు తీసుకుంది, ఎక్కడికి వెళ్లింది వంటి వివరాలను కూడా అధికారులు తెలుసుకునేలా ఏర్పాట్లు చేస్తున్నారు. నీరు నింపేటప్పుడు కూడా వృథా కాకుండా జాగ్రత్తలు తీసుకోవాలని జలమండలి చెబుతోంది. ట్యాంకర్ నిండిన తర్వాత బయటకు వచ్చే నీటిని కూడా వృథా కాకుండా తిరిగి ట్యాంక్‌లోకి పంపేలా ఏర్పాట్లు చేయనున్నారు.

నగరంలో నీటి అవసరం పెరుగుతున్న నేపథ్యంలో ప్రతి ఒక్కరూ నీటిని జాగ్రత్తగా వాడాలని జలమండలి కోరుతోంది. ముఖ్యంగా ట్యాంకర్ల ద్వారా ఒక్క చుక్క నీరు కూడా వృథా కాకుండా చూసేందుకు ఇకపై తనిఖీలు, జరిమానాలు మరింత పెంచనున్నారు. నవంబర్ 1 నుంచి ట్యాంకర్ నీరు వృథా చేస్తే రూ.5 వేల ఫైన్.. రెండోసారి తప్పు చేస్తే ట్యాంకర్ రిజిస్ట్రేషన్ రద్దు చేయనున్నారు.

Vamshi Krishna
కందారపు వంశీకృష్ణ ఏడేళ్లుగా జర్నలిజంలో ఉన్నారు. డిజిటల్ మీడియాలో ముందుగా HMTVలో రెండేళ్లు పనిచేశారు. అనంతరం TV5లో ఏడాది, V6లో రెండున్నరేళ్లు పనిచేశారు. తర్వాత పల్లవి టీవీలో చేరి అక్కడ 6 నెలలు పనిచేశారు. ప్రస్తుతం ఆర్టీవీలో ఏడాదిన్నరగా పనిచేస్తున్నారు. బ్రేకింగ్స్, పొలిటికల్, నేషనల్, స్పోర్ట్స్, సినిమా తదితర కేటగిరీల వార్తలు ఎక్కువగా రాస్తుంటారు.