
ఇరాన్పై మరోసారి సైనిక దాడి చేపట్టడం లేదా దౌత్యపరమైన శాంతి ఒప్పందం చేసుకోవడంపై అమెరికా అధ్యక్షుడు డొనాల్డ్ ట్రంప్ సంచలన వ్యాఖ్యలు చేశారు. పశ్చిమాసియాలో గత కొద్ది రోజులుగా పెరుగుతున్న ఉద్రిక్తతల నేపథ్యంలో ఆయన స్పందిస్తూ.. టెహ్రాన్తో శాంతి చర్చలు కొనసాగుతున్నాయని తెలిపారు. ఆదివారం నాటికి ఇరాన్తో ఒక గొప్ప ఒప్పందమైనా కుదరవచ్చని లేదా సైనిక దాడులైనా జరగొచ్చని పేర్కొన్నారు. ఒకవేళ ఇరాన్ నాయకులు తమ షరతులకు అంగీకరించకపోతే సైనిక చర్య ద్వారానే దౌత్య ఒప్పందాన్ని నెరవేరుస్తామని హెచ్చరించారు.
ట్రంప్ తమ పరిపాలనా యంత్రాంగం ప్రధాన లక్ష్యాన్ని మరోసారి స్పష్టం చేశారు. ఇరాన్ ఎప్పటికీ అణ్వాయుధాలను తయారు చేయకుండా చూడడమే తమ ప్రభుత్వ ప్రధాన ఉద్దేశమని వెల్లడించారు. ఈ లక్ష్యాన్ని సాధించడానికి ఎన్ని విడతల సైనిక చర్యలు చేపట్టాల్సి వచ్చినా తమ ప్రభుత్వం ఏమాత్రం వెనుకాడబోదని వ్యాఖ్యానించారు. అయితే ఒకవేళ చర్చల ద్వారా ఒప్పందం కుదిరినా, ఇరాన్ నాయకులు ఆ నిబంధనలకు కట్టుబడి ఉంటారనే నమ్మకం తనకు పూర్తిగా లేదని ట్రంప్ సందేహం వ్యక్తం చేశారు.
అయితే కచ్చితంగా దాడులు ఏ సమయంలో చేపడతారనే అంశంపై అమెరికా స్పష్టమైన ప్రకటన విడుదల చేయలేదు. నవంబర్ నెలలో అమెరికాలో కీలకమైన మధ్యంతర ఎన్నికలు జరగనున్నాయి. ఈ నేపథ్యంలో ఎన్నికలు ముగిసే వరకు అమెరికా తక్షణ సైనిక చర్యలకు దిగకపోవచ్చని కొన్ని అంతర్జాతీయ రాజకీయ వర్గాలు అంచనా వేస్తున్నాయి. ఈ ఎన్నికల ప్రక్రియ పూర్తయిన తర్వాత ఇజ్రాయెల్ బలగాలతో కలిసి అమెరికా ఇరాన్పై మరింత తీవ్రస్థాయిలో విరుచుకుపడే ప్రణాళికతో ఉండవచ్చని చెబుతున్నారు.
మరోవైపు అమెరికా యుద్ధ విమానాలు, నేవీ నౌకలు మళ్లీ పశ్చిమాసియా వైపు వేగంగా కదులుతుండటం ఈ ప్రాంతంలో తీవ్ర ఆందోళన కలిగిస్తోంది. గల్ఫ్ జలాల్లో, పరిసర ప్రాంతాల్లో అమెరికా తన సైనిక మోహరింపును పెంచుతుండటంతో ఎప్పుడు ఏం జరుగుతుందోనని గల్ఫ్ దేశాల్లో భయాందోళనలు వ్యక్తమవుతున్నాయి. అటు ఇరాన్ భద్రతా దళాలు కూడా ఏ నిమిషంలోనైనా దాడి ఎదుర్కొనేందుకు సన్నాహాలు చేస్తున్నట్లు వెల్లడించడంతో మధ్యప్రాచ్యంలో మరోసారి పూర్తిస్థాయి యుద్ధ పరిస్థితులు నెలకొన్నాయి.









