దక్షిణ ఉక్రెయిన్‌లో రష్యా ఆక్రమిత ప్రాంతంలో ఉన్న ఒక చిన్న నగరమైన ఒలేష్కీలో మానవతా సహాయం అందించేందుకు అక్కడి ప్రజలను సురక్షిత ప్రాంతాలకు తరలించేందుకు ఉక్రెయిన్, రష్యాల మధ్య కాల్పుల విరమణ ఒప్పందం కుదిరింది. ఈ కీలక ఒప్పందానికి అమెరికా ప్రథమ మహిళ మెలానియా ట్రంప్ మధ్యవర్తిత్వం వహించడం విశేషం. యునిసెఫ్, ఐక్యరాజ్యసమితి వేదికలపై ఈ పరిస్థితి గురించి తెలుసుకున్న ఆమె, ఇరు దేశాల నాయకులతో నేరుగా చర్చలు జరిపి ఈ విరామానికి మార్గం సుగమం చేశారు.

ఫిబ్రవరి 2022లో రష్యా దండయాత్ర ప్రారంభమైన మొదటి రోజే ఈ నగరం మాస్కో సైన్యం వశమైంది. ఆ తర్వాత జరిగిన భీకర షెల్లింగ్‌లు, ఆనకట్టల విధ్వంసాల వల్ల నగరం పూర్తిగా దెబ్బతింది. ఒకప్పుడు 24 వేల జనాభా కలిగిన ఈ నగరంలో ప్రస్తుతం నెలల తరబడి ఆహారం, మందులు, కనీస వైద్య సౌకర్యాలు లేక ప్రజలు అల్లాడిపోతున్నారు. కరెంటు, తాగునీరు పూర్తిగా నిలిచిపోగా, రహదారుల నిండా మందుపాతరలు, కాలిపోయిన కార్లు కనిపిస్తున్నాయి. మరో కఠినమైన శీతాకాలం ముంచుకొస్తున్న తరుణంలో అక్కడ మిగిలి ఉన్న ప్రజలు ఆకలితో, ప్రాణాంతక వ్యాధులతో అల్లాడుతున్న దయనీయ పరిస్థితి నెలకొంది.

ఈ ఒప్పందం ప్రకారం మూడు దశల్లో సహాయక చర్యలు కొనసాగనున్నాయి. ముందుగా నిర్దిష్ట సమయంలో కాల్పుల విరమణ అమలులోకి వస్తుంది. ఆ తర్వాత రోడ్డు మార్గాల్లోని మందుపాతరలను తొలగించి.. నగరంలోకి మానవతా సహాయాన్ని అందిస్తారు. చివరగా అక్కడి నుంచి సురక్షిత ప్రాంతాలకు వెళ్లాలనుకునే పౌరులను బయటకు తరలిస్తారు. రష్యా జనరల్ స్టాఫ్ చీఫ్, ఉక్రెయిన్ అధికారులు ఈ ఒప్పందాన్ని ధృవీకరించారు. మంగళవారం నుంచి కాల్పుల విరమణ ప్రారంభం కానుందని.. ఖేర్సన్ ప్రాంతం అంతటా ఈ విరామం వర్తిస్తుందని ఇరు దేశాల ప్రతినిధులు తెలిపారు.

ఈ ఏడాది ప్రారంభంలో ఐరాస వేదికగా పిల్లల సంక్షేమం కోసం పని చేసిన మెలానియా ట్రంప్, ఇప్పుడు ఈ సంక్షోభ ప్రాంతంలోని పౌరులను రక్షించడంలో కీలక పాత్ర పోషించారు. ఉక్రెయిన్ అధ్యక్షుడు జెలెన్స్కీ, రష్యా అధ్యక్షుడు పుతిన్‌తో తాము ఇద్దరం మాట్లాడామని.. అందరి సహకారంతో ఈ ఒప్పందం సాధ్యమైందని డొనాల్డ్ ట్రంప్ తెలిపారు. ఏదేమైనప్పటికీ దశాబ్ద కాలంగా అంటుకున్న ఈ యుద్ధంలో నలిగిపోతున్న సామాన్య ప్రజలకు ఈ స్వల్పకాలిక కాల్పుల విరమణ ఎంతో కొంత ఊరటనిస్తుందని అంతర్జాతీయ సమాజం భావిస్తోంది.