
India Block : కేంద్ర ఎన్నికల సంఘం ప్రధాన ఎన్నికల కమిషనర్ జ్ఞానేశ్ కుమార్ను పదవి నుంచి తొలగించాలనే డిమాండ్తో ఇండియా కూటమి భారీ ర్యాలీకి సిద్ధమవుతోంది. నవంబర్ 1న ఢిల్లీలోని రామ్లీలా మైదానంలో జరగనున్న ఈ ర్యాలీకి దాదాపు 10 లక్షల మంది హాజరవుతారని కాంగ్రెస్ నేతలు అంచనా వేస్తున్నారు. ఎన్నికల ప్రక్రియలో పారదర్శకత, ఓటర్ల జాబితాల్లో అవకతవకలు, అర్హత ఉన్న ప్రతి ఒక్కరి ఓటు హక్కును కాపాడటం వంటి అంశాలను ఈ ర్యాలీలో ప్రధానంగా లేవనెత్తాలని కాంగ్రెస్ నిర్ణయించింది. ముఖ్యంగా జ్ఞానేశ్ కుమార్ను సీఈసీ పదవి నుంచి తొలగించాలనే డిమాండ్ను గట్టిగా వినిపించనుంది.
కాంగ్రెస్ చేపట్టిన ఓట్ బచావో.. దేశ్ బచావో కార్యక్రమం ప్రస్తుతం కీలక దశకు చేరుకుందని హర్యానా కాంగ్రెస్ ఇన్చార్జి సంజయ్ దత్, రాష్ట్ర కాంగ్రెస్ అధ్యక్షుడు రావు నరేంద్ర సింగ్ తెలిపారు. ఈ కార్యక్రమాన్ని హర్యానాలోని ప్రతి జిల్లా, మండలం, గ్రామం, పోలింగ్ బూత్ స్థాయికి తీసుకెళ్లేందుకు పార్టీ కార్యకర్తలు విస్తృతంగా పనిచేస్తున్నారని చెప్పారు. ఓటర్ల జాబితాల్లో ఉన్నాయని చెబుతున్న లోపాలను గుర్తించి వాటిని నమోదు చేయాలని కాంగ్రెస్ కార్యకర్తలకు ఆదేశాలు ఇచ్చింది. అలాగే అర్హత ఉన్న ఓటర్లు తమ హక్కుల గురించి తెలుసుకునేలా ప్రజల్లో అవగాహన కల్పించాలని సూచించింది. నవంబర్ 1న ఢిల్లీలో జరిగే ర్యాలీకి హర్యానా నుంచి పెద్ద సంఖ్యలో ప్రజలు తరలివచ్చేలా ఏర్పాట్లు చేస్తోంది.
ఎన్నికల సంఘం పనితీరు, ఓటర్ల జాబితాల ప్రత్యేక సమగ్ర సవరణపై కాంగ్రెస్ చేస్తున్న ఆరోపణలకు వ్యతిరేకంగా చేపట్టిన ఢిల్లీ చలో కార్యక్రమానికి ముగింపుగా ఈ భారీ ర్యాలీ నిర్వహిస్తున్నట్లు పార్టీ నేతలు తెలిపారు. ఓట్ చోరీ పేరుతో కాంగ్రెస్ చేపడుతున్న ఈ నిరసన ద్వారా ప్రజాస్వామ్యం, రాజ్యాంగాన్ని కాపాడేందుకు ప్రతిపక్ష పార్టీలన్నీ ఒక్కటిగా ఉన్నాయనే సందేశాన్ని ప్రజల్లోకి తీసుకెళ్లాలని ఇండియా కూటమి భావిస్తోంది. ఎన్నికల ప్రక్రియ పారదర్శకంగా, నిష్పక్షపాతంగా జరగడం ఎన్నికల సంఘం రాజ్యాంగపరమైన బాధ్యత అని సంజయ్ దత్ అన్నారు. ఓటర్ల జాబితాల సవరణ సమయంలో అర్హత ఉన్న ఓటర్ల పేర్లు తొలగించే అవకాశం ఉందన్న ఆందోళనలను తీవ్రంగా పరిగణించాలని ఆయన కోరారు.
ఎన్నికల ప్రక్రియలో ఎన్నికల సంఘం నిష్పక్షపాతంగా వ్యవహరిస్తుందా లేదా అనే ప్రశ్నలకు జ్ఞానేశ్ కుమార్ పదవిలో ఉన్నంతకాలం సరైన సమాధానం రాదని కాంగ్రెస్ నేతలు ఆరోపించారు. ఈ నేపథ్యంలో ఆయనను పదవి నుంచి తొలగించడం అవసరమని వారు పేర్కొన్నారు. అంతేకాదు, జ్ఞానేశ్ కుమార్ ప్రజాస్వామ్య వ్యవస్థను బలహీనపరిచేలా వ్యవహరించారని లేదా చట్టాన్ని ఉల్లంఘించారని దర్యాప్తులో తేలితే, అరెస్టుతో సహా తగిన చట్టపరమైన చర్యలు తీసుకోవాలని కాంగ్రెస్ నేతలు డిమాండ్ చేశారు. ఓట్ బచావో.. దేశ్ బచావో ఉద్యమం ఏ ఒక్క వ్యక్తి లేదా రాజకీయ పార్టీ కోసం కాదని సంజయ్ దత్ స్పష్టం చేశారు. దేశంలోని ప్రతి పౌరుడి ఓటు హక్కును కాపాడటం, ప్రజాస్వామ్యాన్ని బలోపేతం చేయడం, ప్రభుత్వంపై బాధ్యత పెంచడం తమ లక్ష్యమని చెప్పారు.









