
Uttar Pradesh : ఉత్తరప్రదేశ్ అసెంబ్లీ ఎన్నికలపై మాజీ ఐఏఎస్ అధికారిణి దివ్య మిట్టల్ సంచలన ప్రకటన చేశారు. తాను ఏర్పాటు చేసిన జన్ నీతి భారత్ పార్టీ రాష్ట్రంలోని మొత్తం 403 అసెంబ్లీ స్థానాల్లోనూ పోటీ చేయబోతుందని ప్రకటించారు. దీంతో రాజకీయాల్లోకి కొత్తగా అడుగుపెట్టిన ఈ పార్టీ.. తొలి ఎన్నికల్లోనే అన్ని స్థానాల్లో బరిలోకి దిగేందుకు సిద్ధమవుతోంది. మిర్జాపూర్లో ప్రజలను ఉద్దేశించి మాట్లాడిన దివ్య మిట్టల్ ఈ విషయాన్ని వెల్లడించారు. ఈ వీడియో ప్రస్తుతం సోషల్ మీడియాలో విస్తృతంగా వైరల్ అవుతోంది.
దివ్య మిట్టల్ ఇటీవలే రాజకీయాల్లోకి అడుగుపెట్టారు. ఐఏఎస్ ఉద్యోగానికి స్వచ్ఛంద పదవీ విరమణ చేసిన కొన్ని వారాలకే కొత్త రాజకీయ పార్టీని ప్రకటించారు. ఎన్నికల సమయంలో మాత్రమే కాకుండా.. ప్రభుత్వం ఏర్పడిన తర్వాత ఐదేళ్ల పాటు ప్రజలకు జవాబుదారీగా ఉండేలా వ్యవస్థను మార్చాలని జన్ నీతి భారత్ లక్ష్యంగా పెట్టుకుందని ఆమె తెలిపారు.
దేశంలో రాజకీయ పార్టీలు తక్కువగా ఉండటం సమస్య కాదని.. ప్రజల మాట పూర్తిగా వినిపించకపోవడమే అసలు సమస్య అని దివ్య మిట్టల్ అన్నారు. ప్రస్తుతం ఉన్న రాజకీయ వ్యవస్థలో ఎమ్మెల్యేలు ప్రభుత్వానికి, ప్రజలకు మధ్య మధ్యవర్తులుగా వ్యవహరిస్తున్నారని ఆమె అన్నారు. అయితే జన్ నీతి భారత్ తరఫున ఎన్నికయ్యే ప్రతినిధులు మాత్రం ప్రజలకు నేరుగా జవాబుదారీగా ఉండాల్సిందేనని స్పష్టం చేశారు.
ఎన్నికల్లో భారీగా డబ్బు ఖర్చు చేసి ప్రకటనలు ఇచ్చే స్థోమత తమ పార్టీకి లేదని దివ్య మిట్టల్ చెప్పారు. అందుకే ఇంటింటి ప్రచారంపై ఆధారపడతామని తెలిపారు. ప్రతి ఇంటినీ తమ పార్టీ కార్యాలయంగా, ప్రతి పార్టీ మద్దతుదారుడినీ ప్రచారకర్తగా మార్చుకుంటామని చెప్పారు. ప్రజలను నేరుగా కలుసుకుని తమ ఆలోచనలు, విధానాలను వివరించడమే తమ ప్రచార విధానమని వెల్లడించారు.
దివ్య మిట్టల్ ఐఐటీ ఢిల్లీ, ఐఐఎం బెంగళూరులో చదువుకున్నారు. అనంతరం వాల్ స్ట్రీట్లో ట్రేడర్గా కూడా పనిచేశారు. ఆ తర్వాత ఐఏఎస్లో చేరి సుమారు 13 ఏళ్ల పాటు సేవలందించారు. ఐఏఎస్ పదవికి రాజీనామా చేసిన తర్వాత రాజకీయాల్లోకి రావాలని నిర్ణయించుకున్నారు. ప్రజలు కూడా రాజకీయాల్లోకి రావాలని ఆమె గతంలో చేసిన పిలుపుకు భారీ స్పందన వచ్చిందని తెలిపారు. తాను ఇచ్చిన ఫోన్ నంబర్కు ఎంతోమంది సందేశాలు పంపారని చెప్పారు. ఇప్పుడు ఉత్తరప్రదేశ్లోని మొత్తం 403 అసెంబ్లీ స్థానాల్లో పోటీ చేయాలని ప్రకటించడంతో జన్ నీతి భారత్ పార్టీకి భారీ సవాల్ ఎదురుకానుంది. 403 స్థానాలకు బలమైన అభ్యర్థులను ఎంపిక చేయడం, ప్రతి నియోజకవర్గంలో పార్టీని ప్రజల్లోకి తీసుకెళ్లడం ఆ పార్టీ ముందున్న ప్రధాన లక్ష్యంగా మారింది. కొత్త రాజకీయ పార్టీగా యూపీ ఎన్నికల బరిలోకి దిగుతున్న జన్ నీతి భారత్.. భారీ పార్టీలతో పోటీ పడుతూ ఎంతవరకు ప్రభావం చూపగలదన్నది ఇప్పుడు ఆసక్తికరంగా మారింది.









