AI Threat : ఆర్టిఫిషియల్ ఇంటెలిజెన్స్ మోడళ్ల విస్తరణతో సైబర్ భద్రతకు కొత్త రకం సవాళ్లు ఎదురవుతాయని సాంకేతిక నిపుణులు మొదటి నుంచి హెచ్చరిస్తూనే ఉన్నారు. వారి ఆందోళనలను నిజం చేస్తూ.. ఇటీవల పలు ఏఐ మోడళ్లు దానంతట అవే సైబర్ ఉల్లంఘనలకు పాల్పడటం ప్రపంచవ్యాప్తంగా తీవ్ర చర్చనీయాంశంగా మారింది. ఈ క్రమంలోనే ప్రముఖ ఏఐ పరిశోధనా సంస్థ ‘ఆంథ్రోపిక్’ అభివృద్ధి చేసిన ‘క్లాడ్’ చాట్‌బాట్ సంచలన రీతిలో సైబర్ భద్రతా నిబంధనలను ఉల్లంఘించినట్లు వెలుగులోకి వచ్చింది.

ఆంథ్రోపిక్ సంస్థ తన అంతర్గత పరిశోధనలు, పరీక్షల సమయంలో క్లాడ్ ఏఐ మోడళ్లను ఉపయోగిస్తుండగా ఈ ఊహించని ఘటన జరిగింది. క్లాడ్ ఏఐ మోడళ్లు తమకు ఎలాంటి అధికారిక అనుమతి లేకపోయినప్పటికీ అమెరికాలోని జార్జియా రాష్ట్రానికి చెందిన ఓటర్ల లెక్కింపు డేటాను నేరుగా యాక్సెస్ చేసినట్లు ఆంథ్రోపిక్ అధికారికంగా బయటపెట్టింది. భద్రతా వ్యవస్థలను దాటుకుని ఏఐ ఈ డేటాలోకి చొరబడటం సాంకేతిక ప్రపంచంలో కలకలం రేపింది.

Also Read : నాలుగోసారి బ్రెజిల్‌ అధ్య‌క్షుడిగా ట్రంప్ వ్య‌తిరేకి.. లూలా డ సిల్వా ఘ‌న విజ‌యం

సాధారణంగా అమెరికాలోని జార్జియా రాష్ట్రంలో ఎన్నికల వివరాలను తెలుసుకోవడానికి ప్రత్యేకమైన పబ్లిక్ డాష్‌బోర్డ్ అందుబాటులో ఉంటుంది. పౌరులు లేదా పరిశోధకులు ఈ డాష్‌బోర్డ్‌ ద్వారా ఓట్ల సంఖ్య, ట్రెండ్స్ వంటి సమాచారాన్ని తెలుసుకోవాలంటే ఎన్నికల యంత్రాంగం జారీ చేసే అధికారిక టోకెన్లను ఉపయోగించాల్సి ఉంటుంది. అంతేకాకుండా దీనికోసం నిర్ణీత రుసుము కూడా చెల్లించాలి. అయితే ఈ సాంకేతిక విధానాన్ని క్లాడ్ ఏఐ స్వయంగా గమనించింది. పేవాల్‌ను బైపాస్ చేసి ఎలాంటి అనుమతి పత్రాలు లేదా రుసుము చెల్లించకుండానే నేరుగా ఎన్నికల డేటాలోకి ప్రవేశించింది.

ఈ చొరబాటు సంఘటన బయటపడటంతో ఆంథ్రోపిక్ సంస్థ వెంటనే స్పందించి వివరణ ఇచ్చింది. క్లాడ్ ఏఐ కేవలం మొత్తం ఓట్ల సంఖ్యకు సంబంధించిన గణాంకాలను మాత్రమే సేకరించిందని.. అంతకుమించి ఓటింగ్ రికార్డులను కాపీ చేయడం గానీ అందులోని సమాచారాన్ని మార్చడం లేదా ధ్వంసం చేయడం వంటి పనులు చేయలేదని స్పష్టం చేసింది. ఏఐ చేసిన ఈ పెద్ద పొరపాటును గుర్తించిన వెంటనే తాము నివారణ చర్యలు చేపట్టామని.. భవిష్యత్తులో ఇలాంటి భద్రతా లోపాలు తలెత్తకుండా సిస్టమ్‌ను అప్‌డేట్ చేశామని తెలిపింది. అలాగే ఈ తీవ్రమైన విషయాన్ని జార్జియా రాష్ట్ర కార్యదర్శి కార్యాలయంతో పాటు వైట్ హౌస్ భద్రతా వర్గాలకు కూడా నివేదించినట్లు పేర్కొంది.

ఏఐ మోడళ్లు భద్రతా వ్యవస్థలను బైపాస్ చేయడం ఇదే మొదటిసారి కాదు. గత నెలలోనే ప్రముఖ ఏఐ సంస్థ ‘ఓపెన్ ఏఐ’ అభివృద్ధి చేసిన ఏఐ ఏజెంట్లు కూడా అమెరికా, ఆస్ట్రేలియా దేశాలకు చెందిన పలు అధికారిక ప్రభుత్వ వెబ్‌సైట్లలోకి ఊహించని రీతిలో చొరబడ్డాయని ఆ సంస్థ వెల్లడించింది. వరుసగా జరుగుతున్న ఈ పరిణామాలు ప్రభుత్వ యంత్రాంగాలను తీవ్ర ఆందోళనకు గురిచేస్తున్నాయి. దీనితో అప్రమత్తమైన ట్రంప్ యంత్రాంగం ప్రభుత్వ వెబ్‌సైట్లు, సున్నితమైన డేటాబేస్‌లను యాక్సెస్ చేస్తున్న అన్ని ఏఐ మోడళ్లపై నిఘాను కట్టుదిట్టం చేసింది. ఏఐ వ్యవస్థల స్వయంప్రతిపత్తిపై మరింత కఠినమైన నిబంధనలు తీసుకరావాలని డిమాండ్లు వెల్లువెత్తుతున్నాయి.

Also Read : హర్మూజ్‌లో దాడులు.. దెబ్బతిన్న 30 సూపర్‌ ట్యాంకర్లు.. సంక్షోభంలో చమురు రవాణా!