Tamil Nadu :  తమిళనాడులోని వెల్లూరు ప్రాంతంలో 52 ఏళ్ల మాజీ ఆర్మీ కెప్టెన్ బాబును పోలీసులు అరెస్ట్ చేశారు. డీఆర్‌డీవోకు సంబంధించిన సున్నితమైన సమాచారాన్ని తన ప్రేయసికి చెప్పినట్లు ఆయనపై ఆరోపణలు ఉన్నాయి. బాబు గతంలో డీఆర్‌డీవోలో కూడా పనిచేశారు. ఆర్మీలో కెప్టెన్‌గా ఆర్టిలరీ విభాగంలో పనిచేసిన ఆయన 1994లో రిటైర్ అయ్యారు. ఆయనకు ఉన్న ఆర్మీ, డీఆర్‌డీవో అనుభవం కారణంగా ఆయన చెప్పిన సమాచారం ఎంత కీలకమైందో పోలీసులు దర్యాప్తు చేస్తున్నారు.

బాబుతో సంబంధం పెట్టుకున్న మహిళ.. భారత భద్రతా బలగాలకు సంబంధించిన కీలక సమాచారాన్ని తెలుసుకునేందుకే ఈ సంబంధాన్ని ఉపయోగించుకుందా అనే కోణంలో పోలీసులు దర్యాప్తు చేస్తున్నారు. బాబు చెప్పిన సమాచారం మరెవరికి అయినా చేరిందా? ఆ మహిళ ఎవరు? ఆమె ఏ దేశానికి చెందినది? అనే విషయాలను కూడా పోలీసులు తెలుసుకునే ప్రయత్నం చేస్తున్నారు.

Also Read : మా కుటుంబాన్ని దెబ్బతీయడానికి రూ. 600 కోట్ల డీల్ : కేంద్రమంత్రి సంచలన ఆరోపణలు!

ఆ మహిళ పాకిస్థాన్‌కు చెందినదేనా అని పోలీసులు ఇంకా నిర్ధారించలేదు. ఆమె వివరాలు తెలుసుకోవడానికి వాట్సాప్ నుంచి ఐపీ వివరాలు తీసుకునే ప్రయత్నం చేస్తున్నామని ఓ సీనియర్ పోలీసు అధికారి తెలిపారు. ఆ వివరాలు వచ్చిన తర్వాతే ఆమె గుర్తింపు, దేశం గురించి స్పష్టత వస్తుందని చెప్పారు.

స్థానిక ఇంటెలిజెన్స్ నుంచి వచ్చిన సమాచారంతో పాటు ఇతర భద్రతా సంస్థల నుంచి వచ్చిన సమాచారం ఆధారంగా పోలీసులు బాబును గుర్తించారు. తిరువణ్ణామలై జిల్లాలోని ఆరణి సమీపంలోని ఓ ప్రాంతంలో ఆయన ఉన్నట్లు గుర్తించి అరెస్ట్ చేశారు. సైనిక రహస్యాలకు సంబంధించిన సమాచారం బయటకు వెళ్లిందన్న అనుమానంతో తమిళనాడు పోలీసులు బాబును అరెస్ట్ చేశారు. అనంతరం మరింత దర్యాప్తు కోసం ఆయనను కేంద్ర దర్యాప్తు సంస్థల అధికారులకు అప్పగించారు.

బాబు ఎవరితో మాట్లాడారు? ఏ సమాచారం పంచుకున్నారు? ఎంతవరకు సమాచారం బయటకు వెళ్లింది? ఆ మహిళకు విదేశీ ఇంటెలిజెన్స్ సంస్థలతో ఏమైనా సంబంధాలు ఉన్నాయా? అనే విషయాలపై అధికారులు దర్యాప్తు చేస్తున్నారు. ఇందుకోసం ఆయన ఫోన్, వాట్సాప్, ఇతర డిజిటల్ రికార్డులను పరిశీలించనున్నారు.

Also Read : 6 నెలల్లో 23 మరణశిక్షలు.. సంచలన తీర్పులిచ్చిన జడ్జి బదిలీ

Vamshi Krishna
కందారపు వంశీకృష్ణ ఏడేళ్లుగా జర్నలిజంలో ఉన్నారు. డిజిటల్ మీడియాలో ముందుగా HMTVలో రెండేళ్లు పనిచేశారు. అనంతరం TV5లో ఏడాది, V6లో రెండున్నరేళ్లు పనిచేశారు. తర్వాత పల్లవి టీవీలో చేరి అక్కడ 6 నెలలు పనిచేశారు. ప్రస్తుతం ఆర్టీవీలో ఏడాదిన్నరగా పనిచేస్తున్నారు. బ్రేకింగ్స్, పొలిటికల్, నేషనల్, స్పోర్ట్స్, సినిమా తదితర కేటగిరీల వార్తలు ఎక్కువగా రాస్తుంటారు.