లోక్‌సభలో ప్రతిపక్ష నేత రాహుల్ గాంధీకి MP,MLAs కోర్టులో ఊరట లభించింది. కేంద్ర హోంమంత్రి అమిత్ షాపై 2018లో ఆయన చేసిన వ్యాఖ్యలకు సంబంధించి దాఖలైన క్రిమినల్ డిఫమేషన్ కేసు న్యాయస్థానం కొట్టివేసింది. అడిషనల్ చీఫ్ జ్యుడీషియల్ మేజిస్ట్రేట్ శుభమ్ వర్మ ఈ తీర్పును వెలువరిస్తూ, రాహుల్ చేసిన వ్యాఖ్యలు పరువునష్టం పరిధిలోకి రావని స్పష్టం చేశారు. తీర్పు సమయంలో రాహుల్ గాంధీ స్వయంగా కోర్టు హాల్లో హాజరై ఉన్నారు.

ఈ తీర్పు వెలువడగానే కాంగ్రెస్ శ్రేణులు, రాహుల్ మద్దతుదారులు సంబరాలు చేసుకున్నారు. కాంగ్రెస్ పార్టీ సోషల్ మీడియా ప్లాట్‌ఫామ్ ‘X’లో స్పందిస్తూ “సత్యమేవ జయతే! సుల్తాన్‌పూర్ కోర్టు రాహుల్ గాంధీని నిర్దోషిగా తేల్చింది” అని ప్రకటించింది. దీనిని సత్యానికి దక్కిన విజయంగా పార్టీ నేతలు అభివర్ణించారు.

Also Read : లక్షా 18వేల అడుగుల నుంచే అటాక్.. డిఫెన్స్ టెక్నాలజీలో భారత్ విప్లవం

అసలు వివాదం ఏమిటి?

2018లో సోహ్రాబుద్దీన్ ఎన్‌కౌంటర్ కేసును ప్రస్తావిస్తూ రాహుల్ గాంధీ అప్పటి బీజేపీ జాతీయ అధ్యక్షుడిగా ఉన్న అమిత్ షాపై తీవ్ర ఆరోపణలు చేశారు. బీజేపీ అధ్యక్షుడు ఒక హత్య కేసులో నిందితుడని దేశ ప్రజలు మర్చిపోతున్నారంటూ ఆయన వివాదాస్పద వ్యాఖ్యలు చేశారు. దీనిపై ఆగ్రహం వ్యక్తం చేసిన బీజేపీ నేత, జిల్లా కో-ఆపరేటివ్ బ్యాంక్ మాజీ ఛైర్మన్ విజయ్ మిశ్రా 2018 ఆగస్టు 4న రాహుల్‌పై డిఫమేషన్ పిటిషన్ వేశారు.

ఈ కేసు విచారణలో భాగంగా 2023 నవంబర్ 27న కోర్టు సమన్లు జారీ చేయడంతో రాహుల్ వ్యక్తిగతంగా హాజరై బెయిల్ తీసుకున్నారు. ఆ తర్వాత రాహుల్ వాయిస్ శాంపిల్ (Voice Sample) సరిపోల్చాలని పిటిషనర్ కోరగా, ట్రయల్ కోర్టు దానిని తిరస్కరించింది. సెషన్స్ కోర్టుతో పాటు అలహాబాద్ హైకోర్టు కూడా పిటిషనర్ అభ్యర్థనలను తోసిపుచ్చాయి. తాజాగా సుల్తాన్‌పూర్ ప్రత్యేక కోర్టు రాహుల్ వ్యాఖ్యల్లో ఎలాంటి పరువునష్టం లేదని స్పష్టం చేస్తూ కేసును కొట్టివేయడంతో ఈ సుదీర్ఘ న్యాయపోరాటానికి తెరపడింది.

Also Read : భార్య తల నరికి దేవుని ఆలయంలో పడేసిన భర్త.. ఆపై తండ్రి హత్య.. కారణం తెలిస్తే షాకే..!