
దుబాయ్, టూరిస్టులను ఆకట్టుకోవడానికి ఎప్పటికప్పుడు సరికొత్త వండర్స్ను పరిచయం చేస్తూనే ఉంటుంది. ఇప్పటికే దుబాయ్ గోల్డ్ డిస్ట్రిక్ట్ ప్రపంచవ్యాప్తంగా ఉన్న టూరిస్టులను విశేషంగా ఆకర్షిస్తుండగా, తాజాగా సందర్శకులను మరింత రాయల్ ఎక్స్పీరియన్స్ అందించేందుకు అక్కడి ప్రభుత్వం ఓ క్రేజీ ప్రాజెక్ట్ అనౌన్స్ చేసింది. ఈ ప్రాంతంలో స్వచ్ఛమైన బంగారంతో ఒక ఫుట్పాత్ నిర్మిస్తోంది. ప్రపంచంలోనే ఇలాంటి గోల్డ్ వాక్వే ఏర్పాటు చేయడం ఇదే తొలిసారి కావడం విశేషం.
2026 చివరి నాటికి ఈ గోల్డ్ వాక్వేను పబ్లిక్కు అందుబాటులోకి తీసుకురానున్నట్లు దుబాయ్ గోల్డ్ డిస్ట్రిక్ట్ కమర్షియల్ సెక్టార్ సీనియర్ డైరెక్టర్ రషీద్ అల్ హర్మౌదీ వెల్లడించారు. పసిడి వర్తకంలో దుబాయ్ను తిరుగులేని గ్లోబల్ హబ్గా నిలబెట్టడం, ఇంటర్నేషనల్ టూరిజం రంగాన్ని మరింత బలోపేతం చేయడమే ఈ ప్రాజెక్ట్ ప్రధాన లక్ష్యమని ఆయన పేర్కొన్నారు. 24 క్యారెట్ల స్వచ్ఛమైన గోల్డ్తో నిర్మిస్తున్న ఈ ప్రత్యేకమైన ఫుట్పాత్పై లోకల్ ప్రజలు, ఫారిన్ టూరిస్టులు హాయిగా నడుస్తూ గోల్డ్ డిస్ట్రిక్ట్ అందాలను వీక్షించవచ్చు. అంతేకాకుండా, ఈ ప్రాంతంలో తయారయ్యే వినూత్న గోల్డ్ జ్యువెలరీతో త్వరలోనే ఒక భారీ ఎగ్జిబిషన్ను కూడా నిర్వహించేందుకు ప్లాన్ చేస్తున్నారు.
ఈ ఏడాది ఆరంభంలో ప్రారంభమైన దుబాయ్ గోల్డ్ డిస్ట్రిక్ట్ ఇప్పటికే అరుదైన మైలురాళ్లను సొంతం చేసుకుంది. ప్రముఖ జ్యువెలరీ సంస్థ రూపొందించిన ప్రపంచంలోనే అత్యంత బరువైన, అతిపెద్ద బంగారు కమ్మలు ఇక్కడ ప్రత్యేక ఆకర్షణగా నిలిచి రెండు గిన్నిస్ వరల్డ్ రికార్డులను కైవసం చేసుకున్నాయి. ‘మయూర సహస్ర’ పేరుతో రూపొందించిన ఈ 22 క్యారెట్ల జ్యువెలరీ బరువు ఏకంగా 16.514 కిలోలు ఉండగా, 1.215 మీటర్ల పొడవు, 0.682 మీటర్ల వ్యాసంతో భారతీయ సంప్రదాయ హస్తకళా నైపుణ్యాన్ని ప్రపంచానికి చాటిచెప్పింది. ఏకంగా 55 మంది నైపుణ్యం కలిగిన స్వర్ణకారులు దాదాపు 5,840 గంటల పాటు శ్రమించి ఈ అద్భుతాన్ని తీర్చిదిద్దారు. సరికొత్త గోల్డ్ వాక్వే అందుబాటులోకి వస్తే దుబాయ్ టూరిజం సరికొత్త రికార్డులను సృష్టించడం ఖాయంగా కనిపిస్తోంది.









