అమెరికాలో త్వరలో జరగబోయే మధ్యంతర ఎన్నికలు డోనాల్డ్ ట్రంప్ పాలనకు కీలకమైన అగ్నిపరీక్షగా మారాయి. అయితే ఇటీవల వెలువడిన సర్వేల ప్రకారం, ఓటర్ల రోజువారీ కష్టాలు, విదేశాంగ వివాదాలు, సరికొత్త టెక్నాలజీల ప్రభావం ఈ ఎన్నికలను తీవ్రంగా ప్రభావితం చేస్తున్నాయి. అమెరికా ఓటర్ల మైండ్ సెట్‌ను మార్చేస్తున్నాయి. అవేంటో చూద్దాం.

Also Read : ఒక్క నంబర్ మిస్..బర్త్ డేకు రూ.30 కోట్ల జాక్‌పాట్

జేబులు ఖాళీ చేస్తున్న ధరలు & ఆర్థిక వ్యవస్థ

అమెరికా ఓటర్లను ప్రధానంగా పీడిస్తున్న సమస్య పెరుగుతున్న జీవన వ్యయం. ద్రవ్యోల్బణ లెక్కలు కాస్త అదుపులో ఉన్నట్లు కనిపిస్తున్నా, సామాన్యుడి ఖర్చులు మాత్రం ఆకాశాన్నంటాయి. నిత్యావసర సరుకులు, పెట్రోల్, విద్యుత్ బిల్లులు, ఇంటి అద్దెలు, రుణాల భారం పెరిగిపోయింది. దీనికి తోడు ట్రంప్ విధించిన దిగుమతి సుంకాల వల్ల ధరలు ఇంకా పెరిగాయని వ్యతిరేకులు మండిపడుతుంటే.. స్థానిక పరిశ్రమల రక్షణకే ఈ నిర్ణయమని ప్రభుత్వం సమర్థించుకుంటోంది.

మండుతున్న గ్యాస్ ధరలు

ఇరాన్ యుద్ధ ప్రభావం ఇప్పుడు అమెరికన్ల ఇళ్లలో ప్రత్యక్ష ఆర్థిక సంక్షోభాన్ని తెచ్చిపెట్టింది. ఫిబ్రవరి నుంచి కొనసాగుతున్న ఉద్రిక్తతల వల్ల అంతర్జాతీయంగా ఇంధన ధరలు పెరిగి, గ్యాస్ స్టేషన్లలో సామాన్యుడికి చుక్కలు కనిపిస్తున్నాయి. ట్రంప్ ఈ యుద్ధాన్ని నడిపిస్తున్న తీరుపై తీవ్ర వ్యతిరేకత వ్యక్తమవుతోంది. చివరికి సొంత రిపబ్లికన్ పార్టీలోని కొందరు నాయకులు కూడా ఈ యుద్ధాన్ని వెంటనే ముగించాలని డిమాండ్ చేస్తున్నారు.

వలసల విధానంపై తిరగబడుతున్న ఓటర్లు

ట్రంప్‌ను మళ్లీ పీఠమెక్కించిన ‘సామూహిక బహిష్కరణలు’ హామీ ఇప్పుడు రివర్స్ కొడుతోంది. చట్టవిరుద్ధ వలసదారులపై ప్రభుత్వం జరుపుతున్న కఠిన చర్యలు, అరెస్టుల సమయంలో చోటుచేసుకున్న ఘటనలపై విమర్శలు వెల్లువెత్తుతున్నాయి. గతంలో రిపబ్లికన్లకు గట్టి బలమైన వలసల అంశంలో ఇప్పుడు ఆధిక్యం తగ్గిపోయింది. ముఖ్యంగా 62 శాతానికి పైగా లాటినో ఓటర్లు ప్రభుత్వం చేపడుతున్న అణచివేత చర్యలను తీవ్రంగా వ్యతిరేకిస్తున్నారు.

ట్రంప్ ఫ్యామిలీ బిజినెస్ & అవినీతి ఆరోపణలు

ఈ ఎన్నికలను ట్రంప్ తన రెండవ పదవీకాలంపై ప్రజాభిప్రాయ సేకరణ గా మార్చుకోవడంతో, ఆయనే నేరుగా హాట్ టాపిక్‌గా మారారు. అధికార దుర్వినియోగం జరుగుతోందని, స్వంత కుటుంబ వ్యాపారాల లబ్ధి కోసమే అధ్యక్ష పదవిని వాడుకుంటున్నారనే ఆరోపణలు ఓటర్లలో చర్చనీయాంశమయ్యాయి. తాము గెలిస్తే ట్రంప్ వ్యాపార వ్యవహారాలపై దర్యాప్తు జరుపుతామని డెమొక్రాట్లు చెబుతుండగా.. ఇవన్నీ కేవలం రాజకీయ కక్షసాధింపు చర్యలని రిపబ్లికన్లు కొట్టిపారేస్తున్నారు.

Also Read : సింగర్‌ గురించి పచ్చిగా మాట్లాడిన ట్రంప్.. ఏమన్నాడో తెలిస్తే షాక్!

ఏఐ భయాలు & డేటా సెంటర్ల వివాదం

ఆర్టిఫిషియల్ ఇంటెలిజెన్స్ ఇప్పుడు అమెరికా రాజకీయాల్లో ప్రధాన వివాదాస్పద అంశంగా మారింది. ఏఐ వల్ల ఉద్యోగాలు పోతాయనే ఆందోళనతో పాటు వీటి కోసం విపరీతంగా ఏర్పాటు చేస్తున్న డేటా సెంటర్లు స్థానికులకు నిద్రలేకుండా చేస్తున్నాయి. ఈ సెంటర్ల వల్ల విపరీతమైన కరెంట్, నీటి వినియోగం పెరిగి, సామాన్యుల బిల్లులు బాదుడే బాదుడుగా మారాయి. ఒహాయో వంటి కీలక రాష్ట్రాల్లో ఈ డేటా సెంటర్ల నిర్మాణం ప్రధాన ఎన్నికల వివాదంగా రగులుతోంది.