ప్రస్తుతం కోస్తాంధ్రాను అర్నబ్ తుఫాను వణికిస్తోంది. ఈ భీకర తుఫానుకు చెట్లు కూలిపోవడం, భారీ వరదలు, లోతట్టు ప్రాంతాలు మునిగిపోతున్నాయి. అయితే క్షణాల్లో సర్వస్వం నాశనం చేసే ఈ భీకర తుఫాన్లు అసలు ఎక్కడ? ఎలా పుడతాయి? సముద్రం మధ్యలో నుంచి బయలుదేరి భూభాగాన్ని వణికించే ఈ ప్రకృతి విలయం వెనుక ఉన్న అసలు రహస్యం ఏమిటి? పూర్తి వివరాలు తెలుసుకుందాం.

తుఫాన్ల సృష్టికి ప్రధాన కారణం సముద్రంలో ఏర్పడే ఉష్ణోగ్రతలే. ఎక్కడైతే గాలి ఒత్తిడి ఎక్కువగా ఉంటుందో దాన్ని అధిక పీడనం అంటారు. అదే గాలి పీడనం చాలా తక్కువగా ఉంటే దాన్ని అల్పపీడనం అంటారు. ఈ పీడన భేదాల వల్లే గాలులు కదలడం ప్రారంభిస్తాయి. వాతావరణంలో వేడి గాలి తేలికగా ఉండి పైకి ఎగబాకుతుంది, దాని స్థానంలో చల్లగాలి నెమ్మదిగా కిందకు చేరుతుంది. ఇలా భూమిని సమీపించే కొద్దీ గాలి చల్లబడి, అందులోని ఆవిరి ఘనీభవించి మంచు స్పటికాలుగా మారుతుంది. దీనివల్ల ఆకాశంలో దట్టమైన మేఘాలు అలుముకుంటాయి. కొన్ని ప్రాంతాల్లో ఈ వాతావరణ మార్పుల వల్ల గాలి సుడులు తిరుగుతూ మరింత వేగాన్ని సంతరించుకుంటుంది.

Also Read : 24 గంటల్లో 5 భూకంపాలు.. అర్నాబ్ తుఫాన్ తెచ్చిన ప్రళయమా? సముద్రంలో ఏం జరుగుతోంది?

ఈ అల్పపీడనం మరింత బలపడితే అది వాయుగుండంగా మారుతుంది. ఆ వాయుగుండం మరింత శక్తిని పుంజుకుని పెను తుఫాన్‌గా రూపాంతరం చెందుతుంది. సముద్రంలో వేడెక్కిన నీటి ఆవిరిని ఇవి తమ ఇంధనంగా మార్చుకుంటాయి. సముద్రంలో ఏర్పడే భారీ సుడుల వల్ల చల్లబడిన దట్టమైన మేఘాలు, ఈ తుఫాన్‌తో కలిసి ప్రయాణిస్తాయి. ఇలా సముద్రంలో సుడులు తిరుగుతూ తీవ్ర రూపం దాల్చిన తుఫాన్.. నేరుగా భూ వాతావరణంలోకి ప్రవేశించడాన్నే ‘తీరం దాటడం’ అని అంటారు. తుఫాన్ తీరాన్ని తాకగానే సుడుల రూపంలో ఉన్న మేఘాలు చెల్లాచెదురై కోస్తా ప్రాంతాలపై భారీ వర్షాలు కురుస్తాయి. ఈ సమయంలో గాలులు గంటకు 61 నుంచి 250 కిలోమీటర్ల కంటే ఎక్కువ వేగంతో విరుచుకుపడతాయి.

ఇక తుఫాన్లలో అత్యంత ప్రమాదకరమైన, ఆశ్చర్యకరమైన భాగం దాని ‘కన్ను’. తుఫాన్ మధ్యభాగంలో ఏర్పడే అతిపెద్ద శూన్య ప్రదేశాన్నే కన్ను అంటారు. ఆశ్చర్యకరంగా ఈ ప్రాంతంలో మేఘాలు ఉండవు, గాలి వీచదు. ఒకవేళ ఈ కన్ను భాగం భూమిపైకి వస్తే.. ఒక్కసారిగా తుఫాన్ ఆగిపోయిందని, ప్రమాదం తొలగిపోయిందని ప్రజలు భ్రమ పడుతుంటారు. కానీ అది కేవలం తాత్కాలికం మాత్రమే. ఆ కన్ను దాటిన తర్వాత తుఫాన్ రెండో భాగం మరింత తీవ్రతతో మళ్లీ విరుచుకుపడుతుంది. ఈ కన్ను విస్తీర్ణం తుఫాన్ తీవ్రతను బట్టి సుమారు ఒక కిలోమీటరు కంటే ఎక్కువగా ఉంటుంది.

ప్రపంచవ్యాప్తంగా ప్రాంతాలను బట్టి వీటిని రకరకాలుగా పిలుస్తారు. ఆగ్నేయాసియా ప్రాంతాల్లో వీటిని ‘సైక్లోన్‌లు’ అని, ఈశాన్య పసిఫిక్, అట్లాంటిక్ ప్రాంతాల్లో ‘హరికేన్‌లు’ అని అంటారు. గాలి వేగాన్ని బట్టి వీటి పేర్లు మారుతుంటాయి. మరోవైపు, తుఫాన్ తీరాన్ని సమీపించే కొద్దీ సముద్రంలో పెను అలజడి రేగుతుంది. తుఫాన్ బలమైన గాలుల ఉద్ధృతికి సముద్రపు నీరు గోడలా ఎగసిపడి భూమిపైకి దూసుకొస్తుంది. దాన్నే ‘ఉప్పెన’ అంటారు. అందుకే తుఫాన్ హెచ్చరికలు రాగానే అధికారులు తీర ప్రాంత ప్రజలను సురక్షిత ప్రాంతాలకు తరలిస్తుంటారు. ప్రకృతి చేసే ఈ భీకర పోరులో మానవ ప్రయత్నం కేవలం ప్రాణాలను కాపాడుకోవడమే అవుతుంది.

Also Read : పాక్‌‌లో ‘మేడ్ ఇన్ ఇండియా’ క్రేజ్.. బ్యాన్ చేసినా రూ.586 కోట్ల ఎగుమతులు