
కర్ణాటక లెజిస్లేటివ్ కౌన్సిల్ (MLC) ఎన్నికల ఫలితాలు అధికార కాంగ్రెస్ పార్టీకి గట్టి ఎదురుదెబ్బ తగిలించాయి. ఉపాధ్యాయ, పట్టభద్రుల కోటాలో ఖాళీ అయిన మొత్తం 4 స్థానాలను బీజేపీ-జేడీఎస్ కూటమి క్లీన్ స్వీప్ చేసింది. ఒక్క సీటు కూడా గెలవలేక కాంగ్రెస్ ఘోర పరాజయాన్ని మూటగట్టుకుంది. ఈ ఫలితాల అనంతరం బీజేపీ, జేడీఎస్ నాయకులు డిప్యూటీ సీఎం డీకే శివకుమార్ను టార్గెట్ చేస్తూ సోషల్ మీడియా వేదికగా తీవ్రంగా ట్రోల్ చేస్తున్నారు.
“డీకే, ఇట్స్ డన్ బ్రో! (DK, it’s done, bro!)” అంటూ కర్ణాటక బీజేపీ తన ఎక్స్ ఖాతాలో పోస్ట్ పెట్టింది. గతంలో బసవరాజ్ బొమ్మై ప్రభుత్వంపై నిరసనగా శివకుమార్ చెవిలో బంతిపువ్వు పెట్టుకున్న ఫోటోను రీ-యూజ్ చేస్తూ బీజేపీ సెటైర్లు వేసింది.
Also Read : కేంద్ర ప్రభుత్వ ఉద్యోగులకు గుడ్ న్యూస్: DA 3 శాతం పెంపు
ఈ ఎన్నికల్లో బెంగళూరు టీచర్స్ నియోజకవర్గాన్ని కాంగ్రెస్ నుంచి జేడీఎస్ కైవసం చేసుకుంది. జేడీఎస్ క్యాండిడేట్ ఏపీ రంగనాథ్, సిట్టింగ్ కాంగ్రెస్ ఎమ్మెల్సీ పుట్టణ్ణపై 908 ఓట్ల తేడాతో విజయం సాధించారు. మరోవైపు బీజేపీ తన ఆధిక్యాన్ని నిరూపించుకుంటూ నార్త్-ఈస్ట్ టీచర్స్, సౌత్-ఈస్ట్ గ్రాడ్యుయేట్స్, వెస్ట్ గ్రాడ్యుయేట్స్ స్థానాలను నిలబెట్టుకుంది. కాంగ్రెస్ జాతీయ అధ్యక్షుడు మల్లికార్జున ఖర్గే సొంత ఇలాకా కలబురగి పరిధిలోకి వచ్చే నార్త్-ఈస్ట్ టీచర్స్ సీటులో బీజేపీ సిట్టింగ్ ఎమ్మెల్సీ శశిల్ నమౌషి కాంగ్రెస్ అభ్యర్థి శరణప్ప మట్టూర్పై గెలిచి ఐదోసారి రికార్డు విజయం నమోదు చేశారు.
ఈ ఎన్నికలు అక్టోబర్ 23న బ్యాలెట్ పేపర్ల ద్వారా జరిగాయి. దీనిపై జేడీఎస్ యూత్ వింగ్ ప్రెసిడెంట్ నిఖిల్ కుమారస్వామి కాంగ్రెస్ అగ్రనేత రాహుల్ గాంధీని ఉద్దేశించి చురకలంటించారు. “ఇక్కడ నిందించడానికి ఈవీఎంలు లేవు, అధికార యంత్రాంగం మీ చేతుల్లోనే ఉంది, ఎన్నికలు బ్యాలెట్ పేపర్లతో జరిగాయి.. మరి ఇప్పుడు కాంగ్రెస్ పేపర్ చోరీ అని నెపం మోపుతుందా?” అని ప్రశ్నించారు.
BJP-JDS కూటమి మధ్య క్షేత్రస్థాయిలో ఓట్ల బదిలీ విజయవంతమైందని, ఈ ఫలితాలు అధికార కాంగ్రెస్ వైఫల్యాలకు అద్దం పడుతున్నాయని విపక్షాలు స్పష్టం చేస్తున్నాయి.
Also Read : ప్రధాని మోదీకి బిగ్ షాక్.. వారణాసిలో BJP ఓటమి









