
అంతరిక్ష రహస్యాలను ఛేదించడంలో రెండు దశాబ్దాలకు పైగా విశేష సేవలందించిన అమెరికా అంతరిక్ష పరిశోధనా సంస్థ ప్రసిద్ధ ‘స్విఫ్ట్ అబ్జర్వేటరీ’ తన ప్రయాణాన్ని ముగించనుంది. దాదాపు 22 ఏళ్ల పాటు నిరంతరాయంగా పనిచేసిన ఈ భారీ స్పేస్ టెలిస్కోప్, త్వరలోనే భూమి వైపు దూసుకువచ్చి కూలిపోనుందని యూఎస్ స్పేస్ ఫోర్స్ వెల్లడించింది. దీనిని రక్షించేందుకు చేసిన ప్రయత్నాలన్నీ విఫలం కావడంతో, నేడో రేపో ఇది భూమి వాతావరణంలోకి ప్రవేశించే అవకాశముందని శాస్త్రవేత్తలు అంచనా వేస్తున్నారు.
విశ్వంలో సంభవించే అత్యంత శక్తిమంతమైన గామా-రే బరస్ట్స్, సూపర్ నోవాల అన్వేషణ కోసం నాసా 2004 నవంబర్ 20న ఈ టెలిస్కోప్ను లాంచ్ చేసింది. సుదూర ఖగోళంలో ఎక్కడైనా భారీ విస్ఫోటనాలు జరిగిన వెంటనే.. అత్యంత వేగంగా ఆ వైపునకు తిరిగి ఫోటోలు, సమాచారాన్ని సేకరించడం దీని స్పెషాలిటీ. అందుకే దీనికి ‘స్విఫ్ట్’ అనే పేరు పెట్టారు. తన సుదీర్ఘ సర్వీస్లో 2,000కు పైగా గామా రే బరస్ట్స్, 1,400 సూపర్నోవాలతో పాటు అనేక బ్లాక్ హోల్స్, గ్రహశకలాలు, తోకచుక్కలను రికార్డ్ చేసి ఖగోళ పరిశోధనల్లో సరికొత్త మైలురాళ్లు సృష్టించింది.
గత కొంతకాలంగా కక్ష్య నుంచి కిందకు జారిపోతున్న స్విఫ్ట్ను సేవ్ చేసేందుకు నాసా ‘కాటలిస్ట్ స్పేస్’ సంస్థకు బాధ్యతలు అప్పగించింది. జులైలో ప్రయోగించిన ‘లింక్’ అనే మూడు చేతుల రోబో ప్రయత్నం ఫెయిల్ అవ్వడంతో పాటు, ఆ రోబో సెప్టెంబర్లోనే భూమిపై కూలిపోయింది. దీంతో అక్టోబర్లో టెలిస్కోప్లోని అన్ని సిస్టమ్స్ను నిలిపివేశారు.
సుమారు 1.5 టన్నుల బరువున్న ఈ శాటిలైట్ భూ వాతావరణంలోకి ప్రవేశించగానే అధిక ఉష్ణోగ్రతలకు చాలావరకు కాలి బూడిదవుతుందని నాసా మిషన్ చీఫ్ సైంటిస్ట్ బ్రాడ్ సెంకో తెలిపారు. అయితే, కొన్ని లోహ భాగాలు, అద్దాల ముక్కలు మాత్రం భూమిపై పడే అవకాశం ఉందని పేర్కొన్నారు.









