ఒమన్ కోస్ట్ సమీపంలో దుబాయ్‌కి చెందిన పనామా ఫ్లాగ్ ఆయిల్ ట్యాంకర్ ‘MT లూయిస్’ ప్రమాదానికి గురైంది. నౌక ఇంజిన్ రూమ్‌లో ఒక్కసారిగా భారీగా మంటలు చెలరేగడంతో తీవ్ర కలకలం రేగింది. ఆ సమయంలో షిప్‌లో మొత్తం 27 మంది ఇండియన్ క్రూ మెంబర్స్ ఉన్నారు. అదృష్టవశాత్తూ సిబ్బంది వెంటనే అలర్ట్ అయి మంటలను అదుపు చేయడంతో ఎలాంటి ప్రాణనష్టం జరగలేదు. అయితే, ఇది సాధారణ టెక్నికల్ ఫాల్ట్ వల్ల జరిగిన ప్రమాదం కాదని, ‘లింపెట్ మైన్స్’ ద్వారా జరిపిన పక్కా ప్లాన్డ్ అటాక్ అని తేలింది.

చిన్న బోట్‌లో వచ్చిన కొందరు అగంతకులు చమురు ట్యాంకర్ ఇంజిన్ రూమ్ కింది భాగంలో రెండు లింపెట్ మైన్స్‌ను సీక్రెట్‌గా ఫిక్స్ చేసి వెళ్లిపోయారు. కొద్దిసేపటికే ఇంజిన్ రూమ్‌లో పేలుడు సంభవించి మంటలు వ్యాపించాయి. ఈ ఎటాక్ వెనుక ఇరాన్ హస్తం ఉందని ఇంటర్నేషనల్ మీడియా రిపోర్ట్స్ పేర్కొన్నాయి. యూఎస్-ఇరాన్ టెన్షన్స్ మధ్య ఇలాంటి మైన్స్‌ను సక్సెస్ ఫుల్‌గా ప్రయోగించడం ఇదే తొలిసారిగా భావిస్తున్నారు.

లింపెట్ మైన్స్ అనేవి నావీ ఆపరేషన్లలో వాడే ప్రత్యేకమైన ఎక్స్‌ప్లోజివ్స్. తీరంలోని బండరాళ్లను గట్టిగా అంటిపెట్టుకుని ఉండే ‘లింపెట్’ అనే సముద్ర నత్తల ఆకారంలో శంఖువులా ఇవి ఉంటాయి. వీటిలోని పవర్‌ఫుల్ మ్యాగ్నెట్స్ వల్ల ఇవి నౌకల ఐరన్ బాడీకి బలంగా అతుక్కుంటాయి. షిప్‌ను పూర్తిగా ముంచేయడం కంటే, దాని మూవ్‌మెంట్‌ను స్తంభింపజేయడమే (డిసేబుల్ చేయడం) వీటి ముఖ్య టార్గెట్. అందుకే వీటిని ప్రొపెల్లర్లు, స్టీరింగ్ గేర్, ఇంజిన్ రూమ్ వంటి కీలక భాగాల్లో అమర్చుతారు.

స్పెషల్ నేవీ డైవర్లు ఈదుకుంటూ వెళ్లి లేదా చిన్న స్పీడ్ బోట్లలో చేరుకుని వీటిని సీక్రెట్‌గా ఫిక్స్ చేస్తారు. రిమోట్ కంట్రోల్ లేదా టైమర్ల ద్వారా అనుకున్న సమయానికి పేలేలా చేస్తారు. పశ్చిమాసియాలో 2017 నుంచి ట్యాంకర్లపై ఇలాంటి దాడులు మొదలయ్యాయి. ప్రపంచ వాణిజ్యానికి అత్యంత కీలకమైన హర్మూజ్ జలసంధి పరిసరాల్లో తక్కువ ఖర్చుతో కూడిన ఈ టెక్నాలజీతో కమర్షియల్ షిప్స్‌ను టార్గెట్ చేస్తుండటం గ్లోబల్ షిప్పింగ్ ఇండస్ట్రీకి తీవ్ర ఆందోళన కలిగిస్తోంది.