
అమెరికాలో ఉంటున్న 150 మందికి పైగా అఫ్గాన్ ఇమిగ్రెంట్లను బహిష్కరించేందుకు ట్రంప్ అడ్మినిస్ట్రేషన్ రంగం సిద్ధం చేసినట్లు ది న్యూయార్క్ టైమ్స్ వెల్లడించింది. వీరిని పాకిస్థాన్ మీదుగా అఫ్గానిస్థాన్కు పంపేందుకు సన్నాహాలు జరుగుతున్నాయి. అయితే, అక్కడ తాలిబన్ల పాలనలో వీరి ప్రాణాలకే తీవ్ర ముప్పు వాటిల్లే ప్రమాదం ఉందని మానవ హక్కుల వర్గాలు ఆందోళన వ్యక్తం చేస్తున్నాయి.
వాషింగ్టన్కు తాలిబన్ ప్రభుత్వంతో ఎటువంటి దౌత్య సంబంధాలు లేకపోవడంతో, అఫ్గానిస్థాన్కు నేరుగా విమానాలు నడపడం సాధ్యం కాదు. అందుకే ట్రంప్ సర్కార్ పాకిస్థాన్ను ట్రాన్సిట్ రూట్గా ఎంచుకుంది. నిర్బంధంలో ఉన్న వారిని ముందుగా పాకిస్థాన్కు చేర్చి, అక్కడి నుంచి సరిహద్దుల గుండా అఫ్గాన్లోకి తరలించాలని చూస్తోంది. ఇమిగ్రేషన్ విభాగం (ICE) ఇప్పటికే పలువురిని లూసియానా డిటెన్షన్ సెంటర్లకు తరలించింది. నవంబర్ మొదటి వారంలోనే లూసియానా నుంచి ప్రత్యేక చార్టర్డ్ ఫ్లైట్ బయలుదేరే అవకాశముంది.
బహిష్కరణ జాబితాలో గతంలో అమెరికా సైన్యంతో కలిసి పనిచేసిన వారి బంధువులతో పాటు, ఒక గే (Gay) వ్యక్తి కూడా ఉన్నారు. 47 ఏళ్ల మహమ్మద్ అనే వ్యక్తి రెండేళ్ల వయసులోనే అమెరికా వచ్చాడు. 2020లో ఓ అమెరికన్ వ్యక్తిని వివాహం చేసుకున్న ఇతను, తన లైంగిక ప్రాధాన్యత కారణంగా తాలిబన్ల చేతిలో తీవ్రమైన శిక్ష లేదా మరణం ఎదుర్కోవాల్సి వస్తుందని భయపడుతున్నాడు.
మరొక అఫ్గాన్ వ్యక్తి భార్య గత ప్రభుత్వంలో సైన్యం, మహిళా పోలీస్ విభాగంలో పనిచేసింది. దీంతో 2023లో తాలిబన్లు తనను బంధించి చిత్రహింసలకు గురిచేశారని, ప్రాణభయంతో 2024లో అమెరికాకు రాగా తన ఆశ్రయం పిటిషన్ తిరస్కరణకు గురైందని అతడు వాపోయాడు.









