
అమెరికా మధ్యంతర ఎన్నికల్లో రిపబ్లికన్ పార్టీ ఎదుర్కొన్న ఘోర పరాజయం వైట్హౌస్లో తీవ్ర ప్రకంపనలు సృష్టిస్తోంది. ఈ ఓటమికి ప్రధాన కారణం ఇరాన్ యుద్ధమేనన్న భావన బలపడటంతో, రక్షణ మంత్రి పీట్ హెగ్సెత్ను పదవి నుంచి తప్పించే యోచనలో అధ్యక్షుడు డొనాల్డ్ ట్రంప్ ఉన్నట్లు సీబీఎస్ న్యూస్ నివేదించింది. హెగ్సెత్ సలహాల వల్లే ఇరాన్పై సైనిక చర్యకు దిగాల్సి వచ్చిందని ట్రంప్ తన సన్నిహితులతో ఫోన్ కాల్స్లో అసహనం వ్యక్తం చేసినట్లు తెలుస్తోంది.
ఒకవేళ హెగ్సెత్పై వేటు వేస్తే, ఆయన స్థానంలో ఫ్లోరిడా గవర్నర్ రాన్ డిశాంటిస్ను కొత్త డిఫెన్స్ సెక్రటరీగా నియమించే అవకాశాలు ఉన్నాయని ప్రచారం సాగుతోంది. జనవరి 5న గవర్నర్ పదవీకాలం ముగిసేలోపే సెనెట్ ఆమోదం పొందవచ్చని భావిస్తున్నారు. మరోవైపు, టెన్నెస్సీలో ఖాళీగా ఉన్న సెనెట్ స్థానానికి హెగ్సెత్ను పంపే ఆలోచన కూడా చర్చకు వచ్చింది. బహిరంగంగా మాత్రం ట్రంప్ ఈ మార్పులను ఖండిస్తూ, హెగ్సెత్ మంచి పనితీరు కనబరుస్తున్నారని వ్యాఖ్యానించారు. అటు వైట్హౌస్ ప్రతినిధి అన్నా కెల్లీ కూడా అధ్యక్షుడికి హెగ్సెత్పై పూర్తి విశ్వాసం ఉందని స్పష్టం చేశారు. అయితే, కాంగ్రెస్ అనుమతి లేకుండానే ఇరాన్పై యుద్ధానికి దిగారంటూ కెంటకీ రిపబ్లికన్ థామస్ మాస్సీ ఇప్పటికే హెగ్సెత్పై ఇంపీచ్మెంట్ ప్రతిపాదన తీసుకురావడం విశేషం.
Also Read : 39ఏళ్లకే US రాజకీయాల్లో సంచలనం.. ఎవరీ జాన్ ఓసాఫ్?
2028 రేసు: ట్రంప్కు దూరంగా జేడీ వాన్స్!
ఈ ఎన్నికల ఫలితాలతో ఉపాధ్యక్షుడు జేడీ వాన్స్ రాజకీయ భవిష్యత్తుపై తీవ్ర ప్రభావం పడింది. 2028 ప్రెసిడెన్షియల్ ఎన్నికల రేసులో ముందువరుసలో ఉన్న వాన్స్, ట్రంప్ నిర్ణయాల వల్ల వచ్చిన నష్టాన్ని పూడ్చుకునేందుకు సొంత బాట పడుతున్నారు. “మన ఓటమికి అసలు కారణం ఇరాన్ యుద్ధమే. నిన్న రాత్రి అధ్యక్షుడే స్వయంగా ఈ విషయాన్ని అంగీకరించారు” అంటూ వాన్స్ సోషల్ మీడియాలో పోస్ట్ చేసి ట్రంప్ నిర్ణయాలకు కాస్త దూరం జరిగే ప్రయత్నం చేశారు. యుద్ధాన్ని ముగించడం, ద్రవ్యోల్బణం తగ్గించడం, ‘అమెరికా ఫస్ట్’ విధానాన్ని అమలు చేయడం, ఇజ్రాయెల్తో సంబంధాల్లో మార్పులు తేవడమే ఓటర్ల ప్రధాన ఆకాంక్షలని ఆయన పేర్కొన్నారు. మొత్తానికి మధ్యంతర ఎన్నికల ఓటమి రిపబ్లికన్ పార్టీలో అంతర్గత పోరును తారాస్థాయికి చేర్చింది.
Also Read : 5వేల కోట్ల ఆస్తి వివాదం.. కోర్టు మెట్లెక్కిన మైఖేల్ జాక్సన్ కూతురు









