
అమెరికా మధ్యంతర ఎన్నికల్లో డెమోక్రటిక్ పార్టీ యువ నాయకుడు జాన్ ఓసాఫ్ అద్భుత విజయం సాధించారు. జార్జియా నుంచి సెనేటర్గా తిరిగి గెలుపొందడం ద్వారా ప్రస్తుతం యూఎస్ సెనేట్లో అత్యంత పిన్న వయస్కుడైన (39 ఏళ్లు) సిట్టింగ్ సెనేటర్గా రికార్డు సృష్టించారు. 2024 ఎన్నికల్లో ట్రంప్ గెలిచిన రాష్ట్రం నుంచి పోటీకి దిగి, ప్రత్యర్థి రిపబ్లికన్ నేత మైక్ కాలిన్స్ను ఓడించడం విశేషం. ఈ కీలక విజయంతో 2028 అధ్యక్ష ఎన్నికల రేసులో ఆయన డెమొక్రాట్ల తరఫున బలమైన అభ్యర్థిగా నిలుస్తారనే అంచనాలు వెలువడుతున్నాయి.
Also Read : ఇజ్రాయెల్ పగ్గాలు ఐసెంకోట్ చేతికి వస్తే: ఇండియా పరిస్థితి ఏంటి?
ఎవరీ జాన్ ఓసాఫ్?
పాలిటిక్స్లోకి రాకముందు ఆయన ఒక ఇన్వెస్టిగేటివ్ డాక్యుమెంటరీ ఫిల్మ్ కంపెనీని నడిపారు. ప్రముఖ పౌర హక్కుల నేత జాన్ లూయిస్కు సహాయకుడిగా పనిచేసిన అనుభవం ఉంది. 2021లో జరిగిన రన్ఆఫ్ ఎన్నికల్లో గెలిచి మొదటిసారి సెనేట్లో అడుగుపెట్టారు. ఈసారి ఎన్నికల ప్రచారంలో ఏకంగా 100 మిలియన్ డాలర్లకు పైగా ఫండ్స్ సమీకరించి అందరినీ ఆశ్చర్యపరిచారు. ఆయన వాగ్ధాటి, నాయకత్వ శైలి చూసి చాలామంది ఆయనను మాజీ అధ్యక్షుడు బరాక్ ఒబామాతో పోలుస్తుంటారు.
ప్రజా సమస్యలపై రాజీలేని పోరాటం సెనేటర్గా ఓసాఫ్ కీలక చట్టాల రూపకల్పనలో కీలక పాత్ర పోషించారు:
ఓపియాయిడ్ సంక్షోభం, ఫెంటనైల్ అక్రమ రవాణాను అడ్డుకోవడం.
హెల్త్కేర్ సదుపాయాలు పెంచడం, మాజీ సైనికుల మెంటల్ హెల్త్ సర్వీసులను మెరుగుపరచడం.
ఫెడరల్ జైళ్లలో అవినీతి, ప్రైవేట్ హౌసింగ్లో సైనిక కుటుంబాల సమస్యలు, అనాథ పిల్లల సంరక్షణపై బైపార్టిసన్ విచారణలు చేపట్టడం.
Also Read : 5వేల కోట్ల ఆస్తి వివాదం.. కోర్టు మెట్లెక్కిన మైఖేల్ జాక్సన్ కూతురు
రాట్క్లిఫ్ను నిలదీసిన ‘సిగ్నల్గేట్’ వివాదం
గతంలో జాతీయ భద్రతా అధికారుల రహస్య ‘సిగ్నల్’ చాట్లోకి ఒక జర్నలిస్టుకు యాక్సెస్ దక్కిన ఉల్లంఘనపై ఆయన గళమెత్తారు. సెనేట్ ఇంటెలిజెన్స్ కమిటీలో సీఐఏ డైరెక్టర్ జాన్ రాట్క్లిఫ్ సమాధానాలు దాటవేసినప్పుడు, “ఇది అత్యంత అవమానకరం, తీవ్రమైన భద్రతా లోపం” అంటూ నిలదీసి జాతీయ స్థాయిలో వార్తల్లో నిలిచారు.
వ్యక్తిగతంగా డాక్టర్ అలీషా క్రామర్ను వివాహం చేసుకున్న ఓసాఫ్, ఇద్దరు కుమార్తెలతో అట్లాంటాలో నివసిస్తున్నారు. ప్రజల్లో పెరుగుతున్న ఆదరణతో ఆయన భవిష్యత్ ప్రయాణం మరింత ఆసక్తికరంగా మారింది.









