
White House : అమెరికా అధ్యక్షుడి అధికారిక నివాసం వైట్హౌస్ సమీపంలో ఒక సంచలన సంఘటన వెలుగుచూసింది. అధ్యక్షుడు ట్రంప్ను చంపేందుకు మారణాయుధాలతో వచ్చిన 26 ఏళ్ల వెనిజులా యువకుడిని యూఎస్ సీక్రెట్ సర్వీస్ అధికారులు చాకచక్యంగా అదుపులోకి తీసుకున్నారు.
గురువారం అర్ధరాత్రి వైట్హౌస్ కాంప్లెక్స్ సమీపంలోని కాన్స్టిట్యూషన్ అవెన్యూలో సీక్రెట్ సర్వీస్ అధికారులు సాధారణ పెట్రోలింగ్ నిర్వహిస్తుండగా, అనుమానాస్పదంగా ఆగి ఉన్న ఒక బ్లూ కలర్ ఫోర్డ్ ఎఫ్-150 పికప్ ట్రక్ వారి దృష్టికి వచ్చింది. అధికారి ట్రక్ వద్దకు వెళ్లి పరిశీలించగా, లోపల రోనీ యోర్డ్రిక్స్ గువానిపా-క్రినోస్ అనే వ్యక్తి కనిపించాడు. ఆయుధాలు ఉన్నాయా అని ఆఫీసర్ ప్రశ్నించగా, నిందితుడు తల ఊపుతూ వేళ్లతో గన్ సైగ చేశాడు. అనంతరం కారు దిగి, గూగుల్ ట్రాన్స్లేట్ యాప్ సహాయంతో పోలీసులతో మాట్లాడాడు.
Also Read : ట్రంప్ను ఓడించిన ఇండియన్స్.. ఎందుకంటే?
అనుమానం వచ్చి ట్రక్ను క్షుణ్ణంగా సెర్చ్ చేయగా, అందులో భయంకరమైన ఆయుధాలు బయటపడ్డాయి. ఒక AR-15 రైఫిల్, MAC-10 మెషిన్ పిస్టల్, గ్లాక్ 43x హ్యాండ్గన్ మరియు భారీగా లైవ్ బుల్లెట్లను పోలీసులు సీజ్ చేశారు. ఈ వాహనం సౌత్ కరోలినాలో దొంగిలించబడినట్లు దర్యాప్తులో వెల్లడైంది.
తన తలలో ఏవో విచిత్రమైన స్వరాలు వినిపించాయని, వాషింగ్టన్ డీసీకి వెళ్లి ప్రెసిడెంట్ ట్రంప్ను చంపాలని ఆ గొంతులు తనను ఆదేశించాయని నిందితుడు విచారణలో అధికారులకు చెప్పినట్లు హోమ్ల్యాండ్ సెక్యూరిటీ (DHS) పేర్కొంది. అయితే, క్రిమినల్ కంప్లైంట్ అఫిడవిట్లో మాత్రం ఈ వ్యాఖ్యలను నమోదు చేయలేదు. వైట్హౌస్ చుట్టూ ప్రస్తుతం హై-రిస్క్ త్రెట్ ఎన్విరాన్మెంట్ ఉందని, ఇలాంటి సాయుధుల కదలికలు తీవ్ర ఆందోళన కలిగిస్తున్నాయని సీక్రెట్ సర్వీస్ డైరెక్టర్ సీన్ కుర్రాన్ తెలిపారు.
దొంగిలించిన వెహికల్ వాడటం, లైసెన్స్ లేకుండా రైఫిల్ మరియు పిస్టల్ కలిగి ఉండటం వంటి పలు నాన్-బెయిలబుల్ ఫైర్ఆర్మ్స్ చార్జీల కింద నిందితుడిని అరెస్ట్ చేసి డీసీ సుపీరియర్ కోర్టులో హాజరుపరిచారు. ఇతను 2024 మార్చిలో టెక్సాస్ ద్వారా అమెరికాలోకి ప్రవేశించిన అక్రమ వలసదారుడని గుర్తించిన ఐస్ (ICE) అధికారులు, అతనిపై ఇమ్మిగ్రేషన్ డిటైనర్ నమోదు చేశారు. ప్రస్తుతం నిందితుడు జైలులో విచారణ ఎదుర్కొంటున్నాడు.
Also Read : అమెరికా రాజకీయాల్లో హైదరాబాదీ అమ్మాయి.. 27ఏళ్లకే సెనేటర్గా









