దేశ రాజధాని ఢిల్లీతో పాటు భాగ్యనగరం హైదరాబాద్‌ను కూడా కాలుష్య రక్కసి చుట్టుముట్టింది(Diwali Effect). దీపావళి వేడుకల్లో భాగంగా ప్రజలు భారీగా బాణసంచా కాల్చడంతో ఇరు నగరాల్లోనూ గాలి నాణ్యత అత్యంత ప్రమాదకర స్థాయికి పడిపోయింది. పండుగ వెలుగుల వెనుక దట్టమైన పొగ, విషవాయువులు పరుచుకోవడంతో ప్రజలు తీవ్ర భయాందోళనలకు గురవుతున్నారు. ప్రత్యేకించి చిన్నారులు, వృద్ధులు, శ్వాసకోశ సమస్యలతో బాధపడేవారు తీవ్రంగా శ్వాస తీసుకోవడానికి ఇబ్బందులు పడుతున్నారు.

Also Read : క్యాన్సర్‌ రోగులకు బిగ్‌ రిలీఫ్‌.. కేంద్రం సంచలన నిర్ణయం.. భారీగా తగ్గిన ఈ మందుల ధరలు!

ఢిల్లీలో తీవ్రస్థాయికి చేరిన విషవాయువులు

ఆదివారం రాత్రి ఢిల్లీ వ్యాప్తంగా జరిగిన దీపావళి సంబరాల ఫలితంగా నగరంలో గాలి నాణ్యత సూచీ 371కి పడిపోయి వెరీ పూర్’ కేటగిరీకి చేరింది. ఢిల్లీలోని మొత్తం 59 కాలుష్య పర్యవేక్షణ కేంద్రాలను పరిశీలిస్తే అందులో 19 ప్రాంతాల్లో పరిస్థితి తీవ్రమైన కాలుష్యం స్థాయికి చేరుకుంది. జహంగీర్‌పురి ప్రాంతంలో ఏకంగా 460 AQI నమోదై అత్యంత ప్రమాదకర కాలుష్య రికార్డును నమోదు చేసింది. నగర సగటు AQI శనివారం 369గా ఉండగా, ఆదివారం నాటికి 376కు పెరిగింది. పొరుగు రాష్ట్రాలైన పంజాబ్, హర్యానాలలో పంట వ్యర్థాలను తగులబెట్టడం, వాహనాల నుంచి వెలువడే పొగ, దానికి తోడు బాణసంచా కాలుష్యం కూడా తోడవడంతో సోమవారం ఈ పరిస్థితి మరింత దారుణంగా మారే అవకాశం ఉందని అధికారులు హెచ్చరిస్తున్నారు.

రంగంలోకి ‘గ్రాప్‌-3’ కఠిన ఆంక్షలు

కాలుష్య తీవ్రతను అరికట్టడానికి ఢిల్లీ-ఎన్‌సీఆర్ పరిధిలో గ్రేడెడ్ రెస్పాన్స్ యాక్షన్ ప్లాన్ మూడో దశ ఆంక్షలను అమల్లోకి తీసుకొచ్చారు. సాధారణంగా AQI 401 నుంచి 500 దాటినప్పుడు లేదా తీవ్రస్థాయికి చేరే సూచనలు ఉన్నప్పుడు ఈ ఆంక్షలు విధిస్తారు. ఈ నిబంధనల ప్రకారం నగరంలో ఎలాంటి నిర్మాణాలు, కూల్చివేత పనులు చేపట్టకూడదు. అలాగే బీఎస్‌-3 పెట్రోల్, బీఎస్‌-4 డీజిల్ నాలుగు చక్రాల వాహనాల రాకపోకలపై కఠిన నిషేధం విధించారు. ప్రభుత్వ ఆఫీసుల్లో కేవలం 50 శాతం సిబ్బంది మాత్రమే నేరుగా విధుల‌కు హాజరు కావాలని.. మిగిలిన 50 శాతం మంది ఇంటి నుంచే పనిచేయాలని ప్రభుత్వం ఆదేశాలు జారీ చేసింది.

Also Read : AI 5g స్మార్ట్‌ఫోన్‌పై భారీ డిస్కౌంట్.. పరుగులు పెడుతున్న కస్టమర్లు..!

హైదరాబాద్‌లో డేంజర్ బెల్స్

దీపావళి పండుగ సందర్భంగా హైదరాబాద్‌లో వాయు కాలుష్యం భారీగా పెరిగింది. పండుగ రాత్రి లైవ్ గాలి నాణ్యత సూచీ ఏకంగా 321కి చేరి అత్యంత ప్రమాదకర స్థాయికి పడిపోయింది. గాలిలో పిఎమ్ 2.5, పిఎమ్ 10 వంటి ప్రాణాంతకమైన ధూళి కణాలు విపరీతంగా పెరగడంతో వాతావరణం పొగమంచులా మారిపోయింది. ఈ ప్రభావం తగ్గడానికి మరికొన్ని రోజులు పట్టే అవకాశం ఉందని పర్యావరణ నిపుణులు హెచ్చరిస్తున్నారు.