
ప్రపంచంలోనే అత్యంత శక్తివంతమైన ఆర్టిఫిషియల్ ఇంటెలిజెన్స్ చిప్లను తయారుచేసే దిగ్గజ సంస్థ ఎన్విడియా (NVIDIA) తీవ్రమైన సంక్షోభాన్ని ఎదుర్కొంటోంది. కంపెనీ చీఫ్ ఎగ్జిక్యూటివ్ ఆఫీసర్ జెన్సన్ హువాంగ్(Jensen) పై చైనా గూఢచార్యం, సంబంధాలకు చెందిన తీవ్రమైన ఆరోపణలు వెల్లువెత్తడంతో వాటాదారుల్లో ఆందోళన మొదలైంది. ఈ వివాదం కారణంగా కేవలం రెండు రోజుల ట్రేడింగ్ వ్యవధిలోనే కంపెనీ మార్కెట్ విలువ నుండి దాదాపు 470 బిలియన్ డాలర్లు (భారతీయ కరెన్సీలో లక్షల కోట్ల రూపాయలు) తుడిచిపెట్టుకుపోయాయి. నవంబర్ 10న నాస్డాక్ స్టాక్ మార్కెట్లో ఎన్విడియా షేరు ధర 5.53 శాతం క్షీణించి 168.79 వద్ద ముగిసింది. దీనితో కంపెనీ మొత్తం మార్కెట్ క్యాపిటలైజేషన్ 4.07 ట్రిలియన్ డాలర్లకు పడిపోయింది.
Also Read : ఇరాన్-అమెరికా యుద్ధం నిజంగా ముగిసిందా? ట్రంప్ వ్యాఖ్యల వెనుక అసలు రహస్యం!
ఈ స్టాక్ పతనానికి ప్రధాన కారణం సీఈఓ జెన్సన్ హువాంగ్కు చెందిన వ్యక్తిగత, వ్యాపార సంబంధాలపై వచ్చిన నివేదికలే అని చెప్పవచ్చు. సింగపూర్కు చెందిన ప్రముఖ మహిళా వ్యాపారవేత్త ఆలిస్ హువాంగ్తో ఆయనకు సంబంధాలు ఉన్నాయని.. ఆమె చైనా నిఘా విభాగం తరఫున గూఢచారిగా వ్యవహరిస్తోందనే ఆరోపణలు అంతర్జాతీయంగా సంచలనం సృష్టించాయి. దీనికితోడు అమెరికా నిషేధం విధిస్తున్నప్పటికీ ఎన్విడియాకు చెందిన అత్యంత విలువైన AI చిప్లు చైనా కంపెనీలకు అక్రమంగా తరలివెళ్తున్నాయనే వార్తలు అమెరికా ప్రభుత్వంలో తీవ్ర కలకలం రేపాయి.
ఈ వివాదం తీవ్రతను గ్రహించిన ఎన్విడియా డైరెక్టర్ల బోర్డు వెంటనే స్పందించింది. సీఈఓపై వచ్చిన ఆరోపణలు, చిప్ల తరలింపుపై సమగ్ర విచారణ జరిపేందుకు ఒక స్వతంత్ర దర్యాప్తు కమిటీని నియమించింది. మరోవైపు అమెరికా ప్రజాప్రతినిధులు, చట్టసభలు ఈ అంశంపై జెన్సన్ హువాంగ్ నుండి ప్రత్యక్ష వివరణ కోరాయి. అయితే ఈ వివాదంపై స్పందించిన ఎన్విడియా యాజమాన్యం, కంపెనీ వ్యాపార రహస్యాలు గానీ, అమెరికా జాతీయ భద్రత గానీ ఎలాంటి ప్రమాదంలో పడలేదని స్పష్టం చేసింది. ఈ షేర్ల పతనం ప్రభావం ప్రపంచ మార్కెట్ ర్యాంకింగ్లపై కూడా స్పష్టంగా పడింది. ఎన్విడియా తన స్థానాన్ని కోల్పోవడంతో అమెరికాకే చెందిన ప్రముఖ సాఫ్ట్వేర్ సంస్థ మైక్రోసాఫ్ట్ మళ్లీ పుంజుకుని ప్రపంచంలోనే రెండవ అత్యంత విలువైన కంపెనీగా తన పాత స్థానాన్ని కైవసం చేసుకుంది.
ఎన్విడియా తీవ్రమైన ఆరోపణలను ఎదుర్కొంటున్న ప్రస్తుత తరుణంలో మరోవైపు కృత్రిమ మేధ రంగానికి జరుగుతున్న అపారమైన వ్యయంపై కూడా మదుపర్లు అనుమానాలు వ్యక్తం చేస్తున్నారు. AI సాంకేతికతపై చేస్తున్న భారీ పెట్టుబడులకు తగ్గట్టుగా రాబడులు వస్తున్నాయా లేదా అనే కోణంలో విశ్లేషణలు సాగుతున్నాయి. ఈ నేపథ్యంలో రాబోయే నవంబర్ 17న వెల్లడికానున్న ఎన్విడియా త్రైమాసిక ఆర్థిక ఫలితాలు ఆ సంస్థ భవిష్యత్తును, AI చిప్ల అసలు డిమాండ్ను నిర్ణయించడంలో కీలక పాత్ర పోషించనున్నాయి.
Also Read : పొగమంచులో 86 వాహనాలు ఢీ.. 12 మంది దుర్మరణం!









