
పాకిస్థాన్ మాజీ ప్రధాని, పాకిస్థాన్ తెహ్రీక్-ఇ-ఇన్సాఫ్ (PTI) వ్యవస్థాపకుడు ఇమ్రాన్ ఖాన్ తీవ్రమైన కంటి సమస్యతో బాధపడుతున్నారు. బుధవారం తెల్లవారుజామున ఆయనను రావల్పిండిలోని అడియాలా జైలు నుంచి ఇస్లామాబాద్లోని ‘పాకిస్థాన్ ఇన్స్టిట్యూట్ ఆఫ్ మెడికల్ సైన్సెస్’ ఆస్పత్రికి అధికారులు అత్యవసరంగా తరలించారు.
గత కొద్దికాలంగా ఇమ్రాన్ ఖాన్ కుడి కంటి చూపు మందగించడంతో జనవరి నుంచి ఆయనకు చికిత్స అందిస్తున్నారు. వైద్య పరీక్షల అనంతరం ఆయన ‘సెంట్రల్ రెటీనల్ వీన్ అక్లూజన్’ అనే తీవ్రమైన కంటి సమస్యతో బాధపడుతున్నట్లు తేలింది. దీని కోసం నిపుణులైన ఆఫ్తాల్మాలజీ డాక్టర్ల టీం ఆయన కుడి కంటికి ‘ఇంట్రావిట్రియల్ యాంటీ-VEGF’ ఇంజెక్షన్ ఇచ్చింది. దాదాపు 50 నిమిషాల పాటు ఆస్పత్రిలో చికిత్స, వైద్య పరీక్షలు నిర్వహించిన తర్వాత ఆయన వైటల్ పారామీటర్స్ సాధారణంగా ఉండటంతో సుమారు తెల్లవారుజామున 2:30 గంటలకు డిశ్చార్జ్ చేసి మళ్లీ జైలుకు తరలించారు.
2018లో ప్రధానిగా బాధ్యతలు చేపట్టి, 2022లో అవిశ్వాస తీర్మానం ద్వారా పదవి కోల్పోయిన ఇమ్రాన్ ఖాన్.. ఆగస్టు 2023 నుంచి జైలు జీవితం గడుపుతున్నారు. అవినీతి, హింసను ప్రేరేపించడం, ఉగ్రవాదం వంటి 100కు పైగా ఆరోపణలతో ప్రస్తుతం 14 ఏళ్ల జైలు శిక్ష అనుభవిస్తున్నారు. అయితే ఇవన్నీ రాజకీయ ప్రేరేపిత కేసులని ఆయన కొట్టిపారేశారు.
మరోవైపు, అర్థరాత్రి వేళ సీక్రెట్గా నిర్వహించిన ఈ వైద్య చికిత్సపై పీటీఐ పార్టీ అనుమానాలు వ్యక్తం చేస్తోంది. ఆయన ఆరోగ్యంపై తీవ్ర ఆందోళన చెందుతూ.. వైద్యం అందించే విధానంలో పారదర్శకత లోపించిందని ఆరోపించింది. ఇమ్రాన్ ఖాన్ భద్రత, శ్రేయస్సుకు ప్రభుత్వానిదే పూర్తి బాధ్యతని, ఆయన వ్యక్తిగత వైద్యులు, కుటుంబ సభ్యులు, లీగల్ టీమ్కు తక్షణమే ఎలాంటి ఆంక్షలు లేకుండా అనుమతి కల్పించాలని పీటీఐ డిమాండ్ చేసింది.









