రాజస్థాన్‌లోని శ్రీ గంగానగర్ రైల్వే ట్రాక్ బ్లాస్ట్ కేసులో కీలక మలుపు తిరిగింది. ఈ పేలుడు ఘటనతో సంబంధం ఉన్న ఇద్దరు నిందితులను భద్రతా దళాలు పంజాబ్‌లో అరెస్ట్ చేశాయి. నిందితులను 21 ఏళ్ల మహక్‌దీప్ కౌర్, 22 ఏళ్ల దవీందర్ సింగ్‌గా గుర్తించారు. రాజస్థాన్ యాంటీ-టెర్రర్ స్క్వాడ్ (ATS), శ్రీ గంగానగర్ పోలీసులు, పంజాబ్ పోలీసులు సంయుక్తంగా నిర్వహించిన జాయింట్ ఆపరేషన్‌లో వీరిని అదుపులోకి తీసుకున్నారు.

పోలీసుల విచారణలో విస్తుపోయే నిజాలు బయటపడ్డాయి. నిందితురాలు మహక్‌దీప్ కౌర్ పాకిస్థాన్‌కు చెందిన ఇద్దరు హ్యాండ్లర్లతో టచ్‌లో ఉన్నట్లు పోలీసులు వెల్లడించారు. వారిలో ఒకరిని ‘చాచా’ అని, మరొకరిని ‘షా’ అని పిలుస్తారని సమాచారం. సదరు హ్యాండ్లర్లు మహక్‌దీప్‌తో రొమాంటిక్ చాట్స్ చేస్తూ ప్రేమ పేరుతో వలలో వేసుకున్నారు. అంతేకాకుండా ఆమెకు భారీగా డబ్బు ఆశ చూపించి ఈ ఉగ్రచర్యకు ఉసిగొల్పినట్లు తెలుస్తోంది. పాకిస్థాన్ నిఘా సంస్థ ఐఎస్ఐ (ISI) ఇటీవల యువతులను టార్గెట్ చేస్తూ ఇదే తరహా హనీట్రాప్ వ్యూహాన్ని అమలు చేస్తోందని పోలీసులు పేర్కొన్నారు. గతంలో గంగానగర్‌కు చెందిన బబిత అనే మహిళను కూడా ఐఎస్ఐ ఇదే రీతిలో ట్రాప్ చేసినట్లు పోలీసులు గుర్తుచేశారు.

నవంబర్ 3వ తేదీ రాత్రి 9:45 గంటల సమయంలో శ్రీ గంగానగర్‌లోని రామ్‌సింగ్‌పూర్ సమీపంలో ఉన్న రైల్వే ట్రాక్‌పై ఈ భారీ పేలుడు సంభవించింది. ఈ బ్లాస్ట్ ధాటికి రెండు రైల్వే స్లీపర్లు ధ్వంసమవ్వడంతో పాటు ట్రాక్ దెబ్బతిని అక్కడ దాదాపు 2.5 అడుగుల లోతు గొయ్యి ఏర్పడింది. అయితే, ఈ పేలుడు జరగడానికి సరిగ్గా 75 నిమిషాల ముందే అదే ట్రాక్‌పై అనూప్‌గఢ్-సూరత్‌గఢ్ ప్యాసింజర్ రైలు వెళ్లడం గమనార్హం. కొద్ది నిమిషాల తేడాతో పెను ప్రమాదం తప్పడంతో ప్రయాణికులు, అధికారులు ఊపిరి పీల్చుకున్నారు. ప్రస్తుతం నిందితులను లోతుగా విచారిస్తున్నారు.