ఇరాన్, అమెరికా మధ్య యుద్ధ మేఘాలు తొలగిపోయాయని భావిస్తున్న తరుణంలో, ఆదివారం బహ్రెయిన్‌పై ఇరాన్ చేసిన దాడితో మిడిల్ ఈస్ట్‌లో మళ్లీ టెన్షన్ మొదలైంది. నెలల తరబడి అమెరికా, ఇజ్రాయెల్ సంయుక్త దాడులు కొనసాగినప్పటికీ, ఇరాన్ సైనిక శక్తి ఏమాత్రం తగ్గలేదని ‘ది వాల్‌స్ట్రీట్ జర్నల్’ (WSJ) సంచలన కథనాన్ని బయటపెట్టింది. అమెరికా ఇంటెలిజెన్స్ అంచనాల ప్రకారం, ఇరాన్ వద్ద ఇప్పటికీ 1,500 నుంచి 2,500 వరకు బాలిస్టిక్ క్షిపణులు ఉన్నాయి. ఇజ్రాయెల్ మిలిటరీ అధికారులు కూడా ఇరాన్ వద్ద 1,500కు పైగా మిస్సైల్స్ ఉన్నాయని ధృవీకరించడం గమనార్హం.

Also Read : ఆకాశంలో గ్రీన్ రెవల్యూషన్: చైనా ఫస్ట్ ఎలక్ట్రిక్ ఫ్లైట్ సక్సెస్!

గత ఏప్రిల్‌లో ‘ఆపరేషన్ ఎపిక్ ఫ్యూరీ’ తర్వాత ఇరాన్ రక్షణ వ్యవస్థలో 85 శాతానికి పైగా ధ్వంసమైందని, దాని మిస్సైల్ నిల్వలు తుడిచిపెట్టుకుపోయాయని వైట్ హౌస్ ప్రకటించింది. ఇరాన్ ఆయుధాలు నిండుకున్నాయని ఇజ్రాయెల్ ప్రధాని నెతన్యాహు కూడా వ్యాఖ్యానించారు. అయితే, తాజా నిఘా నివేదికలు ఈ వాదనలను తప్పుబడుతున్నాయి. యుద్ధానికి ముందు దాచిపెట్టిన విడిభాగాలతో భూగర్భ బంకర్లలో ఇరాన్ తన ఆయుధ సంపత్తిని వేగంగా రీబిల్డ్ చేసుకుంటోందని, యుద్ధానికి ముందున్న నిల్వల్లో సగానికి పైగా తిరిగి సమకూర్చుకుందని రక్షణ నిపుణులు విశ్లేషిస్తున్నారు.

భారీ స్థాయిలో బాలిస్టిక్ మిస్సైల్స్, డ్రోన్లు కలిగి ఉన్న ఇరాన్.. గల్ఫ్ రీజియన్‌లోని అమెరికా మిలిటరీ బేస్‌లు, రాడార్ వ్యవస్థలను టార్గెట్ చేస్తోంది. ఈ దాడుల తీవ్రతకు భయపడి అమెరికా తన కీలక సైనిక ఆస్తులను సురక్షిత ప్రాంతమైన ఇజ్రాయెల్‌కు తరలించడం పరిస్థితి తీవ్రతకు అద్దం పడుతోంది. ఇరాన్ వద్ద ఎన్ని మిస్సైల్స్ ఉన్నాయి అనే దానికంటే, వాటిని ప్రయోగించడంలో ఇరాన్ కమాండర్లు నేర్చుకున్న కొత్త ట్రిక్స్ మరింత ప్రమాదకరమని జియోపొలిటికల్ నిపుణులు హెచ్చరిస్తున్నారు.

మరోవైపు, ఇరాన్‌పై కొత్త దాడులను నిలిపివేయాలని అమెరికా అధ్యక్షుడు డొనాల్డ్ ట్రంప్ భావిస్తున్నట్లు తెలుస్తోంది. సౌదీ అరేబియా, టర్కీ వంటి గల్ఫ్ మిత్రదేశాల విజ్ఞప్తి మేరకు పూర్తిస్థాయి యుద్ధానికి బదులుగా, ఆర్థిక ఆంక్షలు, నేవల్ బ్లాకేడ్ ద్వారా ఇరాన్‌ను దెబ్బతీయాలని ఆయన యోచిస్తున్నారు. అయితే, ఇరాన్ లేదా హౌతీ తిరుగుబాటుదారులు కవ్వింపు చర్యలకు పాల్పడితే మాత్రం పరిస్థితి మళ్లీ మొదటికి వచ్చే ప్రమాదం ఉంది.

Also Read : ఎన్విడియాలో బిగ్ ట్విస్ట్: మళ్లీ రీ-ఎంట్రీ ఇవ్వనున్న జెన్సెన్ హువాంగ్?