ఇన్‌స్టాగ్రామ్ రీల్స్ చూస్తూ లేదా అమెజాన్, ఫ్లిప్‌కార్ట్ వంటి ఈ-కామర్స్ యాప్‌లలో బట్టలు, గాడ్జెట్లు ఆర్డర్ చేయడం ప్రస్తుతం ఎక్కువయ్యాయి. అయితే ఇలా ఆన్‌లైన్‌ షాపింగ్‌కు సంబంధించి నిబంధనలు పూర్తిగా మారబోతున్నాయి. 2027 జనవరి 1వ తేదీ నుంచి ఈ రూల్స్ అందుబాటులోకి రానున్నాయి. ఇంతకీ ఆ రూల్స్ ఏంటో ఈ స్టోరీలో తెలుసుకుందాం.

కొన్నిసార్లు ఆన్‌లైన్ ప్లాట్‌ఫారమ్‌లలో 50% లేదా అంతకంటే ఎక్కువ డిస్కౌంట్ అని పెద్ద పెద్ద బోర్డులు పెడుతుంటారు. ఆఫర్ బాగుంది కదా అని మనం ఆవేశపడి వాటిని కొనేస్తుంటాం. కానీ చాలా సందర్భాలలో ఆ ధరను ముందుగా కృత్రిమంగా పెంచి.. ఆపై డిస్కౌంట్ ఇస్తున్నట్లు మాయ చేస్తారు. ఈ మోసాలకు చెక్ పెట్టేందుకు కేంద్ర ప్రభుత్వం వినియోగదారుల రక్షణ (ఈ-కామర్స్) నిబంధనలు, 2020 లో కీలక సవరణలు చేసింది. ఇకపై ఈ-కామర్స్ కంపెనీలు లేదా విక్రేతలు ఏదైనా ఉత్పత్తిపై తగ్గింపు ఇస్తున్నట్లు ప్రకటిస్తే.. ఆ తగ్గింపు ధరతో పాటు గత 30 రోజులలో ఆ ఉత్పత్తికి ఉన్న అత్యవసరమైన లేదా అత్యల్ప ధరను కూడా వినియోగదారులకు స్పష్టంగా చూపించాలి. దీనివల్ల ఆ ఆఫర్ నిజంగా ఎంత ఉపయోగమైనదో కస్టమర్లకు ఇట్టే అర్థమైపోతుంది.

ఇక మనం ఏదైనా వెబ్‌సైట్‌లో మొబైల్స్ లేదా ఇతర వస్తువుల కోసం వెతికేటప్పుడు, సెర్చ్ రిజల్ట్స్‌లో కొన్ని ప్రొడక్ట్స్ ఎప్పుడూ టాప్‌లో కనిపిస్తుంటాయి. నిజానికి అవేవో చాలా పాపులర్ అయినవి అనుకుంటాం. కానీ వాటిలో చాలా వరకు కంపెనీలు డబ్బులు చెల్లించి చేయించుకునే ప్రమోషన్లు అయి ఉంటాయి. వీటినే ‘స్పాన్సర్డ్ లిస్టింగ్స్’ అంటారు. కొత్త నిబంధనల ప్రకారం ఒక ఉత్పత్తి సెర్చ్ ఫలితాలలో పైకి కనిపించడం కోసం విక్రేతలు డబ్బు చెల్లించినట్లయితే.. ఆ ప్రొడక్ట్ పక్కన తప్పనిసరిగా స్పాన్సర్డ్ అని స్పష్టంగా ముద్రించాల్సి ఉంటుంది. దీనిద్వారా ఏది నిజమైన సిఫార్సో, ఏది డబ్బులిచ్చి చేయించుకున్న ప్రచారమో వినియోగదారులు సులభంగా గుర్తించవచ్చు.

ఆన్‌లైన్ షాపింగ్‌లో లోపాలున్న వస్తువులు రావడం, ఆర్డర్లు ఆలస్యం కావడం, రీఫండ్లు సరిగ్గా రాకపోవడం వంటి సమస్యలను చాలా మంది ఎదుర్కొంటూ ఉంటారు. ఇలాంటి సమయంలో ఫిర్యాదు చేయడం గతంలో ఒక పెద్ద ప్రహసనంగా ఉండేది. కానీ ఇకపై ప్రతి ఈ-కామర్స్ కంపెనీ కేంద్ర ప్రభుత్వానికి చెందిన జాతీయ వినియోగదారుల హెల్ప్‌లైన్ తో విధిగా అనుసంధానం కావాల్సి ఉంటుంది. దీనివల్ల కస్టమర్లు తమ ఫిర్యాదులను ఎంతో సులభంగా సంబంధిత కంపెనీకి తెలియజేసి న్యాయం పొందడానికి అవకాశం ఏర్పడుతుంది.

అలాగే కేవలం ఫోటోలు, ధరను చూపించి చేతులు దులుపుకోవడం ఇకపై కుదరదు. ఆన్‌లైన్ ప్లాట్‌ఫారమ్‌లలో వస్తువులను విక్రేతలు విక్రయించాలంటే.. ఆ ఉత్పత్తికి సంబంధించిన గడువు తేదీ, ఉత్తమ వినియోగ తేదీ, వాపసు, రీఫండ్ విధానాలు, మార్పిడి నిబంధనలు, వారెంటీలు, హామీలు, డెలివరీ ఛార్జీలు, షిప్పింగ్ వివరాలను స్పష్టంగా పొందుపరచాలి. ఇవే కాకుండా వినియోగదారులను తప్పుదోవ పట్టించే డార్క్ ప్యాటర్న్స్‌పై కూడా ప్రభుత్వం కొరడా ఝుళిపించింది. వెబ్‌సైట్లు లేదా యాప్‌లలో కస్టమర్లను మోసం చేసే ఈ పద్ధతులను పూర్తిగా అరికట్టాలని, కంపెనీలు తమ ప్లాట్‌ఫారమ్‌లను ఏటా ఆడిట్ చేసి సర్టిఫికెట్ ఇవ్వాలని కఠినమైన నిబంధనలు తెచ్చారు.