
టాలీవుడ్, కోలీవుడ్లో సినిమాలు చేసిన మరో హీరోయిన్ పెళ్లి బంధంలోకి అడుగుపెట్టింది. తెలుగు ప్రేక్షకులకు సుపరిచితమైన నటి మృణాళిని రవి ఓ ఇంటిదయింది. మలేషియాకు చెందిన ఆధ్యాత్మిక వక్త మహావిష్ణును ఆమె వివాహం చేసుకున్నారు. మలేషియాలోని లంకావి ద్వీపంలో వీరి పెళ్లి వేడుక ఘనంగా జరిగింది. ఈ ఏడాది ఆగస్టులోనే మృణాళిని, మహావిష్ణులకు నిశ్చితార్థం జరిగింది. ఆదివారం కుటుంబ సభ్యులు, అత్యంత సన్నిహితులు, స్నేహితుల సమక్షంలో హిందూ సంప్రదాయం ప్రకారం వీరి వివాహం జరిగింది. పెళ్లికి సంబంధించిన ఫొటోలను మృణాళిని తన సోషల్ మీడియా ఖాతాల్లో పంచుకున్నారు. ప్రస్తుతం ఈ ఫొటోలు నెట్టింట వైరల్ అవుతున్నాయి.
ముఖ్యంగా పెళ్లికూతురిగా మృణాళిని కనిపించిన తీరు అందరినీ ఆకట్టుకుంటోంది. సంప్రదాయానికి ఆధునిక అందాన్ని జోడించేలా ఆమె పెళ్లి అలంకరణ ఉంది. బీచ్ వెడ్డింగ్ను ఎంచుకున్న ఈ జంట పెళ్లి దుస్తుల విషయంలోనూ ప్రత్యేక శ్రద్ధ తీసుకున్నారు. మృణాళిని లేత గులాబీ రంగు పట్టుచీరలో ఎంతో అందంగా కనిపించారు. చీరపై బంగారు రంగు దారాలతో చేసిన సన్నని డిజైన్లు ప్రత్యేక ఆకర్షణగా నిలిచాయి. పూల డిజైన్లతో ఉన్న ఫుల్ స్లీవ్స్ బ్లౌజ్ ఆమె పెళ్లి అలంకరణకు మరింత అందాన్ని తీసుకొచ్చింది.
చీరకు సరిపోయేలా మెడలో బంగారు చోకర్ హారం, దాని కింద మరో పొడవైన హారం ధరించారు. పెద్ద జిమికీలు, నుదుటిపై నెత్తిచుట్టి, నెత్తిపట్టం ఆమెకు పూర్తి సంప్రదాయ పెళ్లికూతురు రూపాన్ని ఇచ్చాయి. చేతులకు పలు రకాల గాజులు, మెహందీ అలంకరణ కూడా ప్రత్యేకంగా కనిపించాయి.
జుట్టును అందంగా జడ వేసుకుని, దానికి తెల్లని మల్లెపూలతో అలంకరించుకున్నారు. బంగారు జుట్టు ఆభరణాలు కూడా ఈ అలంకరణకు చక్కగా సరిపోయాయి. మేకప్ విషయానికి వస్తే కళ్లకు ఐలైనర్, ఐషాడో, పెదాలకు లేత గులాబీ రంగు లిప్స్టిక్, నుదుటిపై చిన్న ఎరుపు రంగు బొట్టుతో సహజమైన అందంతో మెరిసిపోయారు.
ఇక వరుడు మహావిష్ణు క్రీమ్ రంగు సంప్రదాయ దుస్తుల్లో కనిపించారు. ఇద్దరూ తెల్లని పూలదండలు ధరించి బీచ్ నేపథ్యంలో ఏర్పాటు చేసిన పెళ్లి వేదికపై సందడి చేశారు. వీరి జంట ఫొటోలు అభిమానులను ఆకట్టుకుంటున్నాయి. కాగా, మృణాళిని రవి తెలుగులో ‘గద్దలకొండ గణేష్’, ‘ఆర్గానిక్ మామ హైబ్రిడ్ అల్లుడు’, ‘మామా మశ్చీంద్ర’ వంటి సినిమాల్లో నటించారు. తమిళంలో ‘ఎనిమీ’, ‘కోబ్రా’, ‘రోమియో’ వంటి చిత్రాల్లోనూ నటించి గుర్తింపు తెచ్చుకున్నారు.









