
Sonia Gandhi : కాంగ్రెస్ అగ్రనేత సోనియా గాంధీ రాసిన బిలాంగింగ్: ఏ జర్నీ ఆఫ్ లవ్ పుస్తకం ఢిల్లీలో సోమవారం సాయంత్రం విడుదలైంది. ఈ కార్యక్రమానికి కాంగ్రెస్ అధ్యక్షుడు మల్లికార్జున ఖర్గే, రాహుల్ గాంధీ, ప్రియాంక గాంధీ హాజరయ్యారు. తెలంగాణ సీఎం రేవంత్ రెడ్డి, తమిళనాడు సీఎం విజయ్ కూడా పాల్గొన్నారు. సమాజ్వాదీ పార్టీ అధినేత అఖిలేశ్ యాదవ్, ఎంపీ డింపుల్ యాదవ్తో పాటు ఇండియా కూటమికి చెందిన పలువురు నేతలు వచ్చారు.
ఈ సందర్భంగా సోనియా గాంధీ తన పుస్తకం గురించి మాట్లాడారు. తన కుటుంబం గురించి చాలా ఏళ్లుగా ఎన్నో తప్పుడు వార్తలు, కథనాలు ప్రచారం చేస్తున్నారని చెప్పారు. తన అత్తగారు, భర్త రాజీవ్ గాంధీ, కుమారుడు రాహుల్, కుమార్తె ప్రియాంక, తన గురించి నిజం కాని విషయాలు చెబుతున్నారని ఆవేదన వ్యక్తం చేశారు. అందుకే తన కుటుంబం గురించి తనకు తెలిసిన నిజాలను, తన మనసులోని మాటలను ఈ పుస్తకంలో రాసినట్లు తెలిపారు.
మొదట పుస్తకం రాయడానికి తాను అంతగా ఇష్టపడలేదని సోనియా చెప్పారు. తన మనసులోని మాటలు బయటకు చెప్పేందుకు కొంత వెనకడుగు వేశానని తెలిపారు. అయితే రాహుల్, ప్రియాంక మాత్రం పుస్తకం రాయాలని తనను కోరారని చెప్పారు. గతంలో జరిగిన బాధాకరమైన సంఘటనలను మళ్లీ గుర్తు చేసుకోవడం చాలా కష్టమని అన్నారు. తాను మరో దేశం నుంచి భారత్కు వచ్చానని, ఇక్కడి కుటుంబం, ఆచారాలు, పద్ధతులకు అలవాటు పడటానికి సమయం పట్టిందని సోనియా గుర్తు చేసుకున్నారు. పెద్దలను గౌరవించడం తనకు చిన్నప్పటి నుంచే అలవాటని చెప్పారు.
పెళ్లి తర్వాత భర్త ఇంటికి వెళ్లే ప్రతి అమ్మాయికి అక్కడి పద్ధతులకు అలవాటు పడటం కొంత కష్టంగానే ఉంటుందని అన్నారు. తాను వేరే దేశం నుంచి రావడంతో తనకు ఆ ఇబ్బంది మరింత ఎక్కువగా ఎదురైందని చెప్పారు. కొత్త ఇంట్లో అందరితో కలిసిపోవడానికి తాను కూడా చాలా ప్రయత్నించానని వివరించారు. ‘బిలాంగింగ్’ అనే పేరు ఎందుకు పెట్టారో కూడా సోనియా చెప్పారు. కొత్త ప్రదేశానికి వెళ్లినప్పుడు అక్కడి వారిలో ఒకరిగా కలిసిపోవడానికి కొంత సమయం పడుతుందని, అందరూ మనల్ని గమనిస్తున్నారనే భావన కలుగుతుందని అన్నారు. అందరిలో ఒకరిగా గుర్తింపు పొందాలనే తన ప్రయాణమే ఈ పుస్తకానికి ఆ పేరు పెట్టడానికి కారణమని తెలిపారు.
తన పుస్తకానికి ప్రజల నుంచి మంచి స్పందన వస్తోందని సోనియా చెప్పారు. పాఠకులు చూపిస్తున్న ప్రేమకు సంతోషంగా ఉందన్నారు. పుస్తకంపై వచ్చిన విమర్శల్లో కొన్ని బాధపెట్టాయని, మరికొన్ని నిజాయితీగా ఉన్నాయని చెప్పారు. ఈ పుస్తకం నవంబర్ 10న మార్కెట్లోకి వచ్చింది. వారం రోజులు కూడా గడవకముందే రెండు లక్షలకు పైగా కాపీలు అమ్ముడైనట్లు సమాచారం. తొలి పుస్తకంగానే ఇంత మంచి స్పందన రావడం విశేషం. ఈ కార్యక్రమానికి జార్ఖండ్ సీఎం హేమంత్ సోరెన్, జమ్మూకశ్మీర్ సీఎం ఒమర్ అబ్దుల్లా, కర్ణాటక ఉప ముఖ్యమంత్రి డీకే శివకుమార్, తమిళనాడు సీఎం విజయ్తో పాటు పలువురు నేతలు వచ్చారు. గతంలో కాంగ్రెస్లో పనిచేసిన బీజేపీ నేత అమరీందర్ సింగ్ కూడా ఈ కార్యక్రమంలో పాల్గొన్నారు.
తన భర్త, మాజీ ప్రధాని రాజీవ్ గాంధీతో పరిచయం గురించి కూడా సోనియా గుర్తు చేసుకున్నారు. కేంబ్రిడ్జ్లో ఓ స్నేహితుడి ద్వారా రాజీవ్ పరిచయమయ్యారని చెప్పారు. ఇద్దరి మధ్య ప్రేమ మొదలై పెళ్లి వరకు వెళ్లిందని తెలిపారు. అయితే తన తండ్రి మొదట ఈ పెళ్లికి ఒప్పుకోలేదని, ఒకవేళ పెళ్లి సరిగా కుదరకపోతే తిరిగి వచ్చేందుకు రిటర్న్ టికెట్ కూడా ఇచ్చారని చెప్పారు. కానీ తాను అప్పట్లో తిరిగి వెళ్లలేదని నవ్వుతూ గుర్తు చేసుకున్నారు.









