2027 ఉత్తర్ ప్రదేశ్ అసెంబ్లీ ఎన్నికలు దగ్గర పడుతున్న కొద్దీ ఇండియా కూటమిలోని ప్రధాన భాగస్వాములైన సమాజ్‌వాదీ పార్టీ (SP), కాంగ్రెస్ మధ్య సీట్ల సర్దుబాటు చర్చలు ఆసక్తికరంగా మారాయి. మొత్తం 403 అసెంబ్లీ స్థానాలున్న యూపీలో ఈసారి గౌరవప్రదమైన వాటా దక్కించుకోవాలని కాంగ్రెస్ భావిస్తుండగా, గత ఎన్నికల పనితీరు ఆధారంగానే సీట్లు కేటాయించాలని ఎస్పీ పట్టుబడుతున్నట్లు రాజకీయ వర్గాలు, వివిధ మీడియా కథనాలు పేర్కొంటున్నాయి.

కాంగ్రెస్ డిమాండ్ 181.. ఎస్పీ ఆఫర్ 24-30 సీట్లు!
తాజా రాజకీయ నివేదికల ప్రకారం,
2027 ఎన్నికల్లో 181 స్థానాల్లో పోటీ చేయాలని కాంగ్రెస్ ఆశిస్తోంది. ఢిల్లీలో జరిగిన ఒక సదస్సులో ఎస్పీ అధినేత అఖిలేష్ యాదవ్ మాట్లాడుతూ, కాంగ్రెస్ 181 సీట్లు కోరిన విషయాన్ని పరోక్షంగా ధృవీకరించారు. నిజానికి 200 సీట్లపై కన్నేసిన కాంగ్రెస్, చివరకు 181 స్థానాల జాబితాను సిద్ధం చేసినట్లు సమాచారం. ఇందులో అమేథీ, రాయ్‌బరేలీ, సహరాన్‌పూర్ వంటి కాంగ్రెస్ సంప్రదాయ కంచుకోటలతో పాటు ప్రస్తుతం ఎస్పీ ఎమ్మెల్యేలు ఉన్న నియోజకవర్గాలు కూడా ఉన్నాయి.

అయితే, కాంగ్రెస్ ఆశలపై నీళ్లు చల్లుతూ ఎస్పీ తొలుత కేవలం 24 నుంచి 30 స్థానాలను మాత్రమే ఆఫర్ చేసే యోచనలో ఉన్నట్లు విశ్వసనీయ వర్గాల ద్వారా తెలుస్తోంది. 2022 అసెంబ్లీ ఎన్నికల్లో కాంగ్రెస్ అభ్యర్థులు కనీసం 20 వేలకు పైగా ఓట్లు సాధించిన నియోజకవర్గాలను మాత్రమే పరిగణనలోకి తీసుకోవాలని ఎస్పీ భావిస్తోంది. సీట్ల పంపకాలపై చర్చలు జరిపేందుకు ఇద్దరు సీనియర్ ఎంపీలు, ఇద్దరు సీనియర్ ఎమ్మెల్యేలతో కూడిన ఒక ప్రత్యేక కమిటీని అఖిలేష్ యాదవ్ ఏర్పాటు చేయనున్నట్లు సమాచారం.

నవంబర్ 18న గోరఖ్‌పూర్‌లో నిర్వహించిన రోడ్ షో, ‘పిడిఎ రథ్’  కార్యక్రమం అనంతరం మీడియాతో మాట్లాడిన అఖిలేష్ యాదవ్ సీట్ల పంపకాలపై కీలక వ్యాఖ్యలు చేశారు. సీట్ల సర్దుబాటు అనేది “నీది-నాది” అనే వ్యక్తిగత ఆధిపత్య ధోరణిలో ఉండకూడదని, కేవలం గెలుపు అవకాశాలు ఉన్న అభ్యర్థులకే ప్రాధాన్యత ఇవ్వాలని ఆయన స్పష్టం చేశారు. ఇరు పార్టీల వద్ద బలమైన అభ్యర్థులుంటే, కూటమికి మొత్తం 806 మంది అభ్యర్థుల ఎంపిక అవకాశం ఉంటుందని, గెలిచే సత్తా ఉన్నవారే ఇండియా కూటమి తరఫున బరిలోకి దిగుతారని ఆయన అభిప్రాయపడ్డారు. అయోధ్య రామమందిర విరాళాల అంశాన్ని కూడా ప్రధాన ఎన్నికల అస్త్రంగా మలుచుకుని బీజేపీని ఓడిస్తామని ఆయన ధీమా వ్యక్తం చేశారు.

గత ఎన్నికల ఫలితాల ప్రభావం
ఈ చర్చల్లో కాంగ్రెస్ గత ఎన్నికల రికార్డు కీలకంగా మారింది.
2022 అసెంబ్లీ ఎన్నికల్లో ఒంటరిగా పోటీ చేసిన కాంగ్రెస్ కేవలం 2 స్థానాలకే పరిమితమైంది. అంతకుముందు 2017లో ఎస్పీతో పొత్తు పెట్టుకుని 114 స్థానాల్లో పోటీ చేసినా కేవలం 7 సీట్లలోనే గెలిచింది (ఆ ఎన్నికల్లో ఎస్పీ 311 చోట్ల పోటీ చేసి 47 స్థానాలు గెలుచుకుంది). 1989 తర్వాత యూపీలో క్రమంగా బలహీనపడ్డ కాంగ్రెస్, ఇప్పుడు మళ్లీ పుంజుకోవాలని చూస్తుండగా.. రాహుల్ గాంధీ స్వయంగా రంగంలోకి దిగి బేరసారాలు జరిపితేనే కాంగ్రెస్‌కు మరిన్ని సీట్లు దక్కే అవకాశం ఉందని రాజకీయ విశ్లేషకులు భావిస్తున్నారు.