బీఆర్‌ఎస్ కంచుకోట సిద్దిపేటలో ముఖ్యమంత్రి రేవంత్ రెడ్డి పొలిటికల్ హీట్ పెంచారు. నాలుగు దశాబ్దాలుగా ఒకే కుటుంబం చేతిలో ఉన్న సిద్దిపేట ఇక ప్రజలదేనని, 2029 ఎన్నికల్లో సిద్దిపేట, గజ్వేల్‌లో కాంగ్రెస్ జెండా ఎగరేస్తామని ధీమా వ్యక్తం చేశారు. వచ్చే ఎన్నికల్లో హరీశ్ రావు బీఆర్‌ఎస్‌లో ఉండరని, ఆయన బీజేపీలోకి వెళ్తారని రేవంత్ సంచలన ఆరోపణలు చేశారు. సిద్దిపేటలో కాంగ్రెస్ అభ్యర్థిని గెలిపిస్తే బ్రహ్మాండమైన మంత్రి పదవి ఇస్తానని ప్రజలకు బంపర్ ఆఫర్ ప్రకటించారు. కాంగ్రెస్ ఎమ్మెల్యేలు రాజగోపాల్‌రెడ్డి, అనిరుధ్‌రెడ్డిలను ఉద్దేశించి సీఎం రేవంత్‌రెడ్డి ఆసక్తికర వ్యాఖ్యలు చేశారు. “మా వాళ్లకు ఏ పిచ్చికుక్క కరిచిందో తెలియదు కానీ.. చెడు మైక్‌లో, మంచి నా చెవిలో చెబుతున్నారు వాళ్లని మా కార్యకర్తలు ఎర్రగడ్డకు పంపుతారు” అంటూ వ్యంగ్యంగా మాట్లాడారు.

కేసీఆర్ ఫ్యామిలీపై ఫైర్.. సొంత ఎమ్మెల్యేలకు కౌంటర్

కేసీఆర్ కుటుంబానికి వేల కోట్ల ఆస్తులు, ఫామ్‌హౌస్‌లు ఎక్కడి నుంచి వచ్చాయని సీఎం నిలదీశారు. కృష్ణా జలాల విషయంలో ఏపీకి 512 టీఎంసీల నీళ్లు ఇచ్చేలా సంతకాలు చేసి తెలంగాణకు అన్యాయం చేశారని, దీనికి సంబంధించిన ఫైల్స్ అన్నీ అసెంబ్లీలో బయటపెడతానని సవాల్ విసిరారు. మరోవైపు, సొంత పార్టీ ఎమ్మెల్యేలు రాజగోపాల్ రెడ్డి, అనిరుధ్ రెడ్డిలపై పరోక్షంగా సెటైర్లు వేశారు. “చెడు మైక్‌లో, మంచి చెవిలో చెబుతున్నారు.. వాళ్లను కార్యకర్తలే ఎర్రగడ్డకు పంపుతారు” అంటూ ఘాటు కౌంటర్ ఇచ్చారు.

అభివృద్ధి పనులు & మెడికల్ కాలేజీకి కొత్త పేరు

సిద్దిపేట మెడికల్ కాలేజీకి తొలి తెలంగాణ ఉద్యమ నేత అనంతుల మదన్‌మోహన్ పేరు పెట్టాలని, 24 గంటల్లో జీవో రిలీజ్ చేయాలని మంత్రి దామోదర రాజనర్సింహను ఆదేశించారు. జిల్లాలో రూ.544.11 కోట్ల విలువైన డెవలప్‌మెంట్ పనులకు శ్రీకారం చుట్టారు. ఇందులో సిద్దిపేట, దుబ్బాకలో రూ.200 కోట్ల చొప్పున ‘యంగ్ ఇండియా ఇంటిగ్రేటెడ్ రెసిడెన్షియల్ స్కూల్స్’ నిర్మాణానికి శంకుస్థాపన చేశారు.

కోటి కుటుంబాలకు రూ.5 లక్షల ఇన్సూరెన్స్

ఇందిరాగాంధీ జయంతి సందర్భంగా రాష్ట్రవ్యాప్తంగా కోటి కుటుంబాలకు రూ.5 లక్షల ఉచిత జీవిత బీమా అందించే ‘ఇందిరమ్మ కుటుంబ జీవిత బీమా’ స్కీమ్‌తో పాటు ఇందిరమ్మ చీరల పంపిణీని ప్రారంభించారు. ఎలాంటి ప్రీమియం చెల్లించాల్సిన అవసరం లేని ఈ పథకానికి నవంబర్ 19 నుండి డిసెంబర్ 18 వరకు రిజిస్ట్రేషన్ ప్రక్రియ కొనసాగనుంది. సిద్దిపేటలో మార్పు మొదలైందని, కుటుంబ పాలనకు రోజులు దగ్గరపడ్డాయని టీపీసీసీ చీఫ్ మహేష్ కుమార్ గౌడ్ స్పష్టం చేశారు.