ఏపీకి మరో తుఫాన్ ముప్పు పొంచి ఉంది. బంగాళాఖాతంలో ఏర్పడిన వాయుగుండం వేగంగా బలపడుతోంది. రానున్న రెండు రోజుల్లో ఇది తుఫాన్‌గా మారే అవకాశం ఉందని భారత వాతావరణ శాఖ తెలిపింది. నవంబర్ 17 నాటికి తీవ్ర తుఫాన్‌గా మారొచ్చని అంచనా వేసింది. ఆ తర్వాత మరింత బలపడి ఏపీ తీరం వైపు కదిలే అవకాశం ఉందని హెచ్చరించింది. దీంతో కోస్తాంధ్రలోని పలు జిల్లాల్లో వర్షాలు కురిసే అవకాశం ఉంది. బంగాళాఖాతంలో ఏర్పడిన అల్పపీడనం క్రమంగా బలపడి వాయుగుండంగా మారింది. ప్రస్తుతం ఇది నైరుతి బంగాళాఖాతానికి ఆనుకుని ఉన్న ఆగ్నేయ బంగాళాఖాతంలో కొనసాగుతోంది. ఉత్తర వాయువ్య దిశగా కదులుతోంది. నవంబర్ 15 ఉదయం వాతావరణ శాఖ ఇచ్చిన వివరాల ప్రకారం.. పోర్ట్ బ్లెయిర్‌కు సుమారు 700 కిలోమీటర్లు, చెన్నైకి 860 కిలోమీటర్లు, విశాఖపట్నానికి 1,040 కిలోమీటర్ల దూరంలో ఉంది.

ప్రస్తుతం వాయుగుండంగా ఉన్న ఈ వాతావరణ వ్యవస్థ నవంబర్ 16న తుఫాన్‌గా మారే అవకాశం ఉంది. అలా మారితే దీనికి అక్వాన్ అని పేరు పెట్టనున్నారు. నవంబర్ 17 నాటికి తీవ్ర తుఫాన్‌గా బలపడొచ్చని వాతావరణ శాఖ అంచనా వేసింది. నవంబర్ 18 నాటికి మరింత బలపడి అత్యంత తీవ్ర తుఫాన్‌గా మారే అవకాశం కూడా ఉందని అంచనా వేస్తున్నారు. నవంబర్ 19 నాటికి గాలుల వేగం గంటకు 120 నుంచి 130 కిలోమీటర్ల వరకు ఉండొచ్చని, అప్పుడప్పుడు 145 కిలోమీటర్ల వేగంతో గాలులు వీచే అవకాశం ఉందని వాతావరణ శాఖ అంచనా వేసింది. అయితే తుఫాన్ ఎక్కడ తీరం దాటుతుంది? ఎంత బలంతో తీరం వైపు వస్తుంది? అనే విషయాలపై ఇంకా స్పష్టత రావాల్సి ఉంది.

ఈ తుఫాన్ ప్రభావంతో నవంబర్ 18 నుంచి ఏపీలో వర్షాలు మొదలయ్యే అవకాశం ఉంది. ముఖ్యంగా కోస్తాంధ్ర జిల్లాల్లో వర్షాలు ఎక్కువగా కురిసే సూచనలు ఉన్నాయి. నవంబర్ 19, 20 తేదీల్లో కోస్తాంధ్రలోని కొన్ని ప్రాంతాల్లో భారీ నుంచి అతి భారీ వర్షాలు కురిసే అవకాశం ఉందని వాతావరణ శాఖ తెలిపింది. ఉత్తర కోస్తాంధ్రలో అక్కడక్కడ అత్యంత భారీ వర్షాలు కూడా పడొచ్చని హెచ్చరించింది. తమిళనాడులో నవంబర్ 18, 19 తేదీల్లో భారీ నుంచి అతి భారీ వర్షాలు కురిసే అవకాశం ఉంది.

ఒడిశాలో నవంబర్ 19 నుంచి 21 వరకు వర్షాలు పడొచ్చని వాతావరణ శాఖ అంచనా వేసింది. తుఫాన్ బలపడే కొద్దీ సముద్రంలో అలలు ఎత్తుగా ఎగసిపడే అవకాశం ఉంది. బంగాళాఖాతంలో గాలుల వేగం కూడా పెరగనుంది. ముఖ్యంగా నవంబర్ 17 నుంచి 19 మధ్య సముద్రం చాలా అల్లకల్లోలంగా ఉండే అవకాశం ఉంది. తీర ప్రాంతాల్లో కూడా బలమైన గాలులు వీచే సూచనలు ఉన్నాయి. తుఫాన్ ముప్పు నేపథ్యంలో మత్స్యకారులు సముద్రంలోకి వేటకు వెళ్లొద్దని అధికారులు హెచ్చరిస్తున్నారు. ఇప్పటికే సముద్రంలో ఉన్నవారు వెంటనే తీరానికి చేరుకోవాలని సూచిస్తున్నారు. తుఫాన్ ప్రభావం తగ్గే వరకు సముద్రంలోకి వెళ్లకూడదని చెబుతున్నారు.

Vamshi Krishna
కందారపు వంశీకృష్ణ ఏడేళ్లుగా జర్నలిజంలో ఉన్నారు. డిజిటల్ మీడియాలో ముందుగా HMTVలో రెండేళ్లు పనిచేశారు. అనంతరం TV5లో ఏడాది, V6లో రెండున్నరేళ్లు పనిచేశారు. తర్వాత పల్లవి టీవీలో చేరి అక్కడ 6 నెలలు పనిచేశారు. ప్రస్తుతం ఆర్టీవీలో ఏడాదిన్నరగా పనిచేస్తున్నారు. బ్రేకింగ్స్, పొలిటికల్, నేషనల్, స్పోర్ట్స్, సినిమా తదితర కేటగిరీల వార్తలు ఎక్కువగా రాస్తుంటారు.