అమెరికా మధ్యంతర ఎన్నికల ఫలితాలు అధ్యక్షుడు ట్రంప్‌కు గట్టి షాక్ ఇచ్చాయి. కాంగ్రెస్ ఉభయ సభల్లోనూ డెమోక్రటిక్ పార్టీ భారీ విజయాన్ని నమోదు చేయడంతో, ట్రంప్‌ అధికారానికి అడ్డంకులు ఏర్పడటమే కాకుండా వ్యక్తిగతంగానూ కష్టాలు మొదలయ్యే సూచనలు కనిపిస్తున్నాయి. ఎన్నికల్లో ఓటర్లు అవినీతిని ప్రధాన అంశంగా పరిగణించిన నేపథ్యంలో, ట్రంప్ పరిపాలనపై లోతైన దర్యాప్తు చేపట్టేందుకు డెమోక్రాట్లు పావులు కదుపుతున్నారు. అవసరమైతే ట్రంప్‌పై మూడోసారి అభిశంసన  తీర్మానం ప్రవేశపెట్టాలని స్పీకర్ పదవి రేసులో ఉన్న హకీం జెఫ్రీస్ ప్రతిపాదించారు.

Also Read : 5వేల కోట్ల ఆస్తి వివాదం.. కోర్టు మెట్లెక్కిన మైఖేల్ జాక్సన్ కూతురు

ట్రంప్‌పై ఈ అంశాలపై సమగ్ర విచారణ

ప్రభుత్వ సంస్కరణల కమిటీ చీఫ్ రాబర్ట్ గార్షియా ట్రంప్ లీగల్ టీమ్‌కు హెచ్చరికలు జారీ చేస్తూ, త్వరలోనే 5 ప్రధానాంశాలపై దర్యాప్తు మొదలవుతుందని స్పష్టం చేశారు:

  1. ట్రంప్ కుటుంబ వ్యాపారాలు: తిరిగి అధికారంలోకి వచ్చాక ట్రంప్ ఫ్యామిలీ అసెట్స్ పెరిగిన తీరు, మినరల్ డీల్స్‌లో కుటుంబ సభ్యుల పాత్ర.

  2. ఐసీఈ (ICE) దాడుల తీరు: ఇమిగ్రేషన్ అండ్ కస్టమ్స్ ఎన్‌ఫోర్స్‌మెంట్ చేపట్టిన దాడులు, మానవ హక్కుల ఉల్లంఘనలు.

  3. ఎప్‌స్టీన్ ఫైల్స్ విచారణ: ఎప్‌స్టీన్ బ్యాంకింగ్ లావాదేవీలపై నిర్లక్ష్యం, ట్రంప్ నెట్‌వర్క్‌తో లింకైన ఫార్మా కంపెనీల లబ్ధి.

  4. డోజ్ (DOGE) వ్యవహారాలు: ప్రభుత్వ సామర్థ్య విభాగం పనితీరు, నిర్ణయాలు.

  5. వైట్‌హౌస్ నిర్మాణాలు & రియల్ ఎస్టేట్: వైట్‌హౌస్‌లో నిర్మించిన బాల్‌రూమ్‌తో పాటు స్టీవ్ విట్కాఫ్‌తో క్రిప్టో డీల్స్, రియల్ ఎస్టేట్ ప్రాజెక్టులు.

అవినీతి, ఇరాన్ యుద్ధంపై ఓటర్ల ఆగ్రహం

ఎన్నికల సర్వేల ప్రకారం, దాదాపు 50 శాతం మంది ఓటర్లు ప్రభుత్వ అవినీతే తమ ప్రధాన సమస్యగా పేర్కొన్నారు. మరోవైపు ఆర్థిక వ్యవస్థ, ప్రజాస్వామ్య పరిరక్షణ అంశాలు తర్వాతి స్థానాల్లో నిలిచాయి.

దీనికితోడు, ఇరాన్‌తో నెలకొన్న సైనిక ఘర్షణను రక్షణ మంత్రి పీట్ హెగ్సెత్ సమర్థంగా నిర్వహించలేకపోయారని డెమోక్రాట్లు విమర్శిస్తున్నారు. పౌర మరణాలు, మందుగుండు కొరత, రక్షణ బడ్జెట్ దుర్వినియోగం, అలాగే కరీబియన్ సముద్రంలో యాంటీ డ్రగ్ దాడుల పేరిట సాగించిన ఆపరేషన్లపై సమగ్ర విచారణ జరిపేందుకు సన్నాహాలు చేస్తున్నారు.

Also Read : లాస్ ఏంజెల్స్ మేయర్‌గా కేరళ మహిళ.. నిత్య రామన్ సరికొత్త చరిత్ర

‘నెవర్ సరెండర్’ అన్న ట్రంప్.. వెనక్కి తగ్గేది లేదని స్పష్టీకరణ

ఎన్నికల ఫలితాలపై వైట్‌హౌస్ స్పందిస్తూ ట్రంప్ ఫొటోతో ‘నెవర్ సరెండర్’ అంటూ పోస్ట్ చేసింది. వైస్ ప్రెసిడెంట్ జేడీ వాన్స్ వ్యాఖ్యలతో ఏకీభవించిన ట్రంప్.. ఇరాన్ యుద్ధం వల్లే చమురు ధరలు పెరిగి ప్రజల్లో అసంతృప్తి వచ్చిందని అంగీకరించారు. అయితే, ఇరాన్‌కు అణ్వాయుధాలు దక్కకుండా అడ్డుకోవడమే తమ ప్రధాన లక్ష్యమని, రాజకీయంగా నష్టం వాటిల్లినా వెనక్కి తగ్గేది లేదని తేల్చిచెప్పారు.

హౌస్‌లో డెమోక్రాట్లకు సాధారణ మెజారిటీ ఉండటంతో అభిశంసన తీర్మానం పాసయ్యే అవకాశం ఉన్నప్పటికీ, సెనెట్‌లో పదవి నుంచి తప్పించడానికి మూడింట రెండొంతుల మెజారిటీ అవసరం కానుంది. దీంతో రాబోయే రోజుల్లో వాషింగ్టన్ రాజకీయాలు మరింత వేడెక్కనున్నాయి.