అగ్రరాజ్యం అమెరికాలో వరుస టెక్నికల్ గ్లిచ్‌లు కస్టమర్లను, ప్రయాణికులను తీవ్ర ఇబ్బందులకు గురిచేస్తున్నాయి. ఇటీవల ఎయిర్ ట్రాఫిక్ కంట్రోల్ వ్యవస్థలో తలెత్తిన అంతరాయం మరువకముందే, తాజాగా దేశంలోని ప్రముఖ బ్యాంకుల ఆన్‌లైన్ సేవలు, విమానయాన నెట్‌వర్క్‌లు మొరాయించడంతో అంతటా ఆందోళన నెలకొంది.

Also Read : గాలితో కరెంటు తయారు చేస్తున్న చైనా.. ప్రపంచంలోనే తొలి పవర్ స్టేషన్ ప్రారంభం!

బ్యాంకింగ్ సేవలకు బ్రేక్

సోమవారం అమెరికాలోని దిగ్గజ బ్యాంకులైన బ్యాంక్ ఆఫ్ అమెరికా, జేపీ మోర్గాన్ చేజ్, సిటీ గ్రూప్, వెల్స్ ఫార్గో, యూఎస్ బ్యాంక్‌లతో పాటు డిజిటల్ పేమెంట్ నెట్‌వర్క్ ‘జెల్లే’ సేవల్లో తీవ్ర అంతరాయం ఏర్పడింది. ఆన్‌లైన్ ట్రాన్సాక్షన్స్ నిలిచిపోవడం, అకౌంట్ యాక్సెస్ కాకపోవడంపై ‘డౌన్‌డిటెక్టర్’కు వేలాదిగా ఫిర్యాదులు అందాయి. జేపీ మోర్గాన్ చేజ్ ఇంటర్నల్ హార్డ్‌వేర్ వ్యవస్థలో సాఫ్ట్‌వేర్ లోపం తలెత్తడంతో ఈ సమస్య ఏర్పడిందని, దీని ప్రభావం ఇతర బ్యాంకుల లావాదేవీలపైనా పడిందని తేలింది. అయితే ఇది సైబర్ అటాక్ కాదని, కేవలం సాంకేతిక లోపం మాత్రమేనని చేజ్ బ్యాంక్ స్పష్టం చేసింది. ఖాతాల్లోని ఫండ్స్ సురక్షితంగా ఉన్నాయని, త్వరలోనే సర్వీసులను పునరుద్ధరిస్తామని తెలిపింది.

మరోవైపు, సోమవారం మధ్యాహ్నం యునైటెడ్ ఎయిర్‌లైన్స్ నెట్‌వర్క్‌లోనూ సాంకేతిక లోపం తలెత్తింది. విమానం టేకాఫ్ అయ్యే ముందు పైలట్లకు అందాల్సిన కీలకమైన ‘వెయిట్ అండ్ బ్యాలెన్స్ డేటా’ నిలిచిపోవడంతో విమానాలను గేట్ల వద్దే నిలిపివేయాల్సి వచ్చింది. హ్యూస్టన్‌లో ఓ పైలట్ తమ సిస్టమ్స్ పనిచేసే వరకు విమానాన్ని గేటు వద్దే ఉంచడానికి అనుమతి కోరిన ఆడియో రికార్డింగ్ బయటకు వచ్చింది. కొద్ది గంటల తర్వాత యునైటెడ్ ఎయిర్‌లైన్స్ ఈ సమస్యను పరిష్కరించి, ఇది సైబర్ దాడి కాదని ప్రకటించింది.

ఇటీవల మైక్రోసాఫ్ట్ సాఫ్ట్‌వేర్ సమస్యల తర్వాత, గత శుక్రవారం ఫెడరల్ ఏవియేషన్ అడ్మినిస్ట్రేషన్ (FAA) నెట్‌వర్క్‌లో తలెత్తిన లోపంతో వేలాది విమానాలు నిలిచిపోయాయి. పాత కాపర్ వైర్ల స్థానంలో ఫైబర్ వైర్లు అమర్చే క్రమంలో అధిక డేటా ప్రవాహం కారణంగా కమ్యూనికేషన్, రాడార్ వ్యవస్థలు దెబ్బతిన్నాయి. ఈ నేపథ్యంలో పాత ఎయిర్ ట్రాఫిక్ కంట్రోల్ వ్యవస్థను పూర్తిగా మార్చడానికి తమ ప్రభుత్వానికి 50 బిలియన్ డాలర్లు అవసరమని అధ్యక్షుడు డొనాల్డ్ ట్రంప్ కోరుతున్నారు. అయితే గతంలో కేటాయించిన నిధులే ఇంకా ఖర్చు కాలేదని డెమోక్రటిక్ ఎంపీలు ప్రశ్నిస్తుండగా, ఆ నిధులను 2028 చివరి నాటికి పూర్తిగా వినియోగిస్తామని రవాణా మంత్రి సీన్ డఫీ వివరణ ఇచ్చారు. వరుసగా కీలక వ్యవస్థలు కుప్పకూలుతుండటం అమెరికా టెక్నాలజీ మౌలిక సదుపాయాలపై కొత్త చర్చకు దారితీసింది.

Also Read : ఆల్ టైమ్ రికార్డు.. తులం బంగారంపై రూ.44 వేలు తగ్గింపు.. ఇంకా తగ్గుతుందా?