గ్రీన్ ఎనర్జీ రంగంలో చైనా మరో అద్భుతమైన మైలురాయిని దాటింది. వాయువ్య చైనాలోని గాన్సు ప్రావిన్స్‌లో ప్రపంచంలోనే మొట్టమొదటి 300-మెగావాట్ల ‘ఆర్టిఫిషియల్-కావర్న్ కంప్రెస్డ్ ఎయిర్ ఎనర్జీ స్టోరేజ్’ (CAES) పవర్ స్టేషన్‌ను విజయవంతంగా పవర్ గ్రిడ్‌కు అనుసంధానించారు. ‘యువాన్‌చు నంబర్ 1’ (Yuanchu No 1) అని పిలువబడే ఈ మెగా ప్రాజెక్ట్, కేవలం ప్రయోగాల దశకే పరిమితం కాకుండా భారీ స్థాయి ఇంజనీరింగ్ అప్లికేషన్లలోకి ఈ టెక్నాలజీని తీసుకురావడానికి ఒక గొప్ప ముందడుగు వేసింది.

ఇదొక అధునాతన ఎనర్జీ స్టోరేజ్ టెక్నాలజీ. సాధారణంగా రాత్రి వేళల్లో విద్యుత్ వినియోగం తక్కువగా ఉన్నప్పుడు లేదా సోలార్, విండ్ పవర్ ఉత్పత్తి ఎక్కువగా ఉన్నప్పుడు మిగులు కరెంటును ఉపయోగించి గాలిని అధిక ఒత్తిడి వద్ద కంప్రెస్ చేస్తారు. ఆ కంప్రెస్ చేసిన గాలిని భూగర్భంలో నిల్వ చేసి, భవిష్యత్తులో కరెంటు డిమాండ్ పెరిగినప్పుడు తిరిగి విద్యుత్ ఉత్పత్తి చేయడానికి వాడతారు. ఇది అచ్చం పంప్డ్ హైడ్రో స్టోరేజ్ సిస్టమ్ లాగే పనిచేస్తుంది.

Also Read : ఆల్ టైమ్ రికార్డు.. తులం బంగారంపై రూ.44 వేలు తగ్గింపు.. ఇంకా తగ్గుతుందా?

భూగర్భంలో 4 కృత్రిమ గుహలు.. రికార్డు స్థాయి సామర్థ్యం!

ఈ భారీ పవర్ స్టేషన్ కోసం చైనా ఇంజనీర్లు భూమి లోపల దాదాపు 110 మీటర్ల లోతులో బలమైన రాళ్లను తొలిచి నాలుగు కృత్రిమ గుహలను నిర్మించారు.

  • సామర్థ్యం: 300 మెగావాట్ల పవర్ జనరేషన్ యూనిట్‌తో పాటు, ఇది ఏకంగా 1,800 మెగావాట్-అవర్స్ (MWh) ఎనర్జీని స్టోర్ చేయగలదు.

  • పనితీరు: 72 శాతం ‘రౌండ్-ట్రిప్ ఎఫిషియన్సీ’తో పనిచేసే ఈ ప్లాంట్, ఒక్కసారి పూర్తిగా ఛార్జ్ అయితే నిరంతరాయంగా ఆరు గంటల పాటు విద్యుత్‌ను సరఫరా చేయగలదు. దీని ద్వారా ఏటా సుమారు 600 మిలియన్ కిలోవాట్-అవర్స్ కరెంటు ఉత్పత్తి అవుతుందని అంచనా.

Also Read : నేను బతికే ఛాన్స్ లేదు.. మాజీ ప్రధాని ఇమ్రాన్ ఖాన్ సంచలన వ్యాఖ్యలు

రాతి గుహల నిర్మాణం వెనుక అసలు కారణం ఏంటి?

‘చైనా ఎలక్ట్రిక్ పవర్ న్యూస్’ రిపోర్ట్ ప్రకారం, సాధారణంగా ఇలాంటి ప్రాజెక్టులకు సహజసిద్ధమైన ఉప్పు గుహలను వాడుతుంటారు. అయితే, చైనాలోని ఉత్తర ప్రాంతాల్లో సోలార్ మరియు విండ్ పవర్ ప్లాంట్లు ఎక్కువగా ఉన్నప్పటికీ, అక్కడ ఉప్పు గుహలకు అనుకూలమైన భౌగోళిక పరిస్థితులు లేవు. ఉప్పు గుహలు ఎక్కువగా మధ్య, తూర్పు, దక్షిణ చైనాల్లోనే ఉన్నాయి. ఈ సమస్యను అధిగమించడానికి, ఖర్చు ఎక్కువైనా సరే ఎక్కడైనా నిర్మించుకునే వీలుండే రాతి గుహల టెక్నాలజీని చైనా ఎంచుకుంది.

గత సెప్టెంబర్‌లో జరిగిన కీలక టెస్టింగ్‌లో, ఇక్కడి నాలుగో నంబర్ భూగర్భ గుహలో గాలి పీడనం ఏకంగా 12.63 మెగా-పాస్కల్స్‌కు చేరుకుని సరికొత్త ప్రపంచ రికార్డు సృష్టించింది. భవిష్యత్తులో పునరుత్పాదక ఇంధన నిల్వకు ఈ ప్రాజెక్ట్ ఒక రోల్ మోడల్‌గా నిలవనుంది.