బంగ్లాదేశ్‌లో పరిస్థితులు మరోసారి తీవ్ర ఉద్రిక్తతకు దారితీశాయి. 2024 జూలై నాటి షేక్ హసీనా వ్యతిరేక ఉద్యమం తర్వాత, దాదాపు 28 నెలల విరామం అనంతరం దేశంలో మళ్లీ భారీ హింసాత్మక ఆందోళనలు చెలరేగాయి. వేతనాల పెంపు డిమాండ్‌తో లక్షలాది మంది గార్మెంట్ కార్మికులు రోడ్లపైకి రావడంతో రాజధాని ఢాకా సహా పలు పారిశ్రామిక ప్రాంతాలు రణరంగంగా మారాయి.

ప్రస్తుతం నిత్యావసరాల ధరలు, ఇంటి అద్దెలు, రవాణా మరియు మెడికల్ ఖర్చులు భారీగా పెరిగిపోయాయి. ప్రస్తుతం అందుతున్న సుమారు 12,000 టాకాల వేతనంతో కుటుంబాలను పోషించడం అసాధ్యంగా మారిందని కార్మికులు ఆవేదన వ్యక్తం చేస్తున్నారు. అందుకే కనీస వేతనాన్ని నెలకు 30,000 టాకాలకు పెంచాలని గట్టిగా డిమాండ్ చేస్తున్నారు.

అక్టోబర్ 31న మొదలైన ఈ సమ్మె మిర్‌పూర్, ఆశులియా, సావర్, గాజీపూర్ వంటి కీలక ఇండస్ట్రియల్ హబ్‌లను పూర్తిగా స్తంభింపజేసింది. కార్మికులు రోడ్లను బ్లాక్ చేసి, ఫ్యాక్టరీలను బలవంతంగా మూసివేయించారు. సుమారు 529 ఫ్యాక్టరీలు మూతపడగా, దాదాపు 10 లక్షల మంది కార్మికులపై దీని ప్రభావం పడింది. ఆందోళనకారులు పోలీసులపై రాళ్లదాడికి దిగడంతో పాటు పోలీస్ వెహికల్స్‌కు నిప్పుపెట్టారు. పరిస్థితి చేయిదాటడంతో పోలీసులు టియర్ గ్యాస్, వాటర్ కేనన్లు, సౌండ్ గ్రెనేడ్లు ప్రయోగించారు. ఉద్రిక్తతలను కంట్రోల్ చేసేందుకు కొన్ని ఏరియాల్లో బోర్డర్ గార్డ్ బంగ్లాదేశ్ (BGB) బలగాలను సైతం రంగంలోకి దించారు.

ఈ అశాంతి వెనుక మాజీ ప్రధాని షేక్ హసీనా మద్దతుదారుల హస్తం ఉందని తాజా ప్రభుత్వం అనుమానిస్తోంది. అవామీ లీగ్‌తో లింకులున్న కొందరు ఫ్యాక్టరీ ఓనర్లు, మాజీ ఎంపీలు, మాజీ మంత్రులే కావాలని గార్మెంట్ సెక్టార్‌లో అస్థిరతను సృష్టిస్తున్నారని హోంమంత్రి సలాహుద్దీన్ అహ్మద్ సంచలన ఆరోపణలు చేశారు.

వరల్డ్ గార్మెంట్ ఎక్స్‌పోర్ట్స్‌లో చైనా తర్వాత బంగ్లాదేశ్ రెండో స్థానంలో ఉంది. యూరప్, యూఎస్ వంటి గ్లోబల్ మార్కెట్లలో ఇక్కడి టీ-షర్టులు, జీన్స్, జాకెట్లకు విపరీతమైన డిమాండ్ ఉంది. విదేశీ మారకద్రవ్యాన్ని అందించే ఇంతటి కీలక పరిశ్రమలో మహిళలతో సహా లక్షలాది మంది ఆధారపడి ఉన్నారు. ప్రస్తుతం జరుగుతున్న ఈ నిరసనలు బంగ్లాదేశ్ ఆర్థిక వ్యవస్థకు పెద్ద తలనొప్పిగా మారాయి.