ఇండియన్ ప్రీమియర్ లీగ్ వ్యవస్థాపకుడు, మాజీ క్రికెట్ అడ్మినిస్ట్రేటర్ లలిత్ మోదీకి అఫీషియల్‌గా బ్రిటన్ పౌరసత్వం లభించింది. ఈ ఏడాది సెప్టెంబర్ 15న లండన్‌లో కుటుంబ సభ్యులు, సన్నిహితుల మధ్య జరిగిన స్పెషల్ సెర్మనీలో తాను బ్రిటిష్ సిటిజన్‌గా మారినట్లు ఆయన వెల్లడించారు. శనివారం ప్రతిష్టాత్మక ఆక్స్‌ఫర్డ్ యూనియన్ వేదికగా ప్రసంగిస్తూ లలిత్ మోదీ ఈ సంచలన ప్రకటన చేశారు.

Also Read : పగ తీర్చుకున్న ఇజ్రాయెల్.. హమాస్ కీలక కమాండర్ హతం

సోషల్ మీడియా ప్లాట్‌ఫారమ్ ‘ఎక్స్’ వేదికగా పౌరసత్వ వేడుకలకు సంబంధించిన ఫొటోలను షేర్ చేస్తూ లలిత్ మోదీ ఎమోషనల్ పోస్ట్ పెట్టారు. “గత కొన్నేళ్లుగా బ్రిటన్ నాకు ఇల్లుగా మారింది. ఎన్నో ఏళ్ల తర్వాత ఇప్పుడు సగర్వంగా బ్రిటిష్ పౌరుడినయ్యాను. ఇది నా జీవితంలో అత్యంత ప్రత్యేకమైన, వ్యక్తిగత మైలురాయి” అని అభివర్ణించారు. బ్రిటన్ ప్రజలు, సంస్థలు, సంప్రదాయాలంటే తనకు ఎంతో గౌరవమని, తాను సొంతిల్లుగా భావించే యూకే అభివృద్ధికి పాజిటివ్‌గా కృషి చేయడం తన బాధ్యతని ఆయన పేర్కొన్నారు. కింగ్ చార్లెస్-3 పుట్టినరోజు వేళ ఈ ప్రకటన చేయడం మరింత స్పెషల్ అని చెబుతూ, “గాడ్ సేవ్ ది కింగ్” అంటూ తన పోస్ట్‌ను ముగించారు.

ఐపీఎల్‌లో భారీ ఆర్థిక అవకతవకలు జరిగాయన్న ఆరోపణలతో BCCI ఆయనపై సస్పెన్షన్ వేటు వేయడంతో, 2010 మే నెలలో లలిత్ మోదీ భారత్ విడిచి లండన్‌కు వెళ్లిపోయారు. మనీలాండరింగ్ కేసులో ఎన్‌ఫోర్స్‌మెంట్ డైరెక్టరేట్ (ED) జారీ చేసిన సమన్లకు స్పందించకపోవడంతో 2015లో ప్రత్యేక కోర్టు ఆయనపై నాన్-బెయిలబుల్ వారెంట్ (NBW) జారీ చేసింది. అయితే, తనకు ఏ కోర్టులోనూ శిక్ష పడలేదని, తనను ‘పలాయనంలో ఉన్న నేరగాడి’గా చిత్రీకరించవద్దని లలిత్ మోదీ మొదటినుంచీ వాదిస్తున్నారు. తాజాగా ఆయన యూకే పౌరసత్వం పొందడం హాట్ టాపిక్‌గా మారింది.

Also Read : టెక్ దిగ్గజాల ఫేట్ రివర్స్.. జెన్సన్ హువాంగ్ రాజీనామా.. లీసా సుకు గ్లోబల్ అవార్డు!