Sensor Board: చిత్ర పరిశ్రమలో ఊహించని పరిణామం తీవ్ర కలకలం రేపుతోంది. సినిమాలకు సంబంధించి అత్యంత కాన్ఫిడెన్షియల్‌గా ఉంచే స్టోరీలు, డైలాగులు ఇప్పుడు ఆన్‌లైన్‌లో దర్శనమిస్తున్నాయి. దేశంలో చిత్రాల సర్టిఫికేషన్ ప్రక్రియను పర్యవేక్షించే కేంద్ర సెన్సార్ బోర్డు (CBFC) నుంచి ఏకంగా 500కు పైగా సినిమాల కీలక రికార్డులు బయటకు వచ్చేశాయి. వీటిలో త్వరలో థియేటర్లలో రిలీజ్ కావాల్సిన క్రేజీ ప్రాజెక్ట్‌ల పూర్తి స్క్రిప్టులు కూడా ఉండటంతో నిర్మాతలు, దర్శకులు షాక్‌కు గురవుతున్నారు.

సాధారణంగా మేకర్స్ సినిమా కథ బయటకు పొక్కకుండా భారీగా సీక్రెసీ మెయింటైన్ చేస్తారు. అయితే థియేటర్లలో రిలీజ్ కావాలంటే సీబీఎఫ్‌సీ సర్టిఫికేషన్ తప్పనిసరి కావడంతో, పూర్తి కథ, సీన్ల వివరాలతో కూడిన స్క్రిప్టులను బోర్డుకు సమర్పించాల్సి ఉంటుంది. పదేళ్ల క్రితం ప్రారంభించిన ‘ఇ-సినీప్రమాణ్’  పోర్టల్ ద్వారా నిర్మాతలు ఈ డాక్యుమెంట్లను అప్‌లోడ్ చేస్తున్నారు. సరిగ్గా ఈ ఆన్‌లైన్ పోర్టల్‌లోనే ఊహించని సెక్యూరిటీ సమస్య తలెత్తింది. దాంతో నిర్మాతలు పంపిన ఒరిజినల్ స్క్రిప్టులు, బోర్డు విధించిన కట్స్, అధికారిక పత్రాలన్నీ పబ్లిక్ డొమైన్‌లోకి చేరిపోయాయి.

పాత, కొత్త వెబ్‌సైట్ డేటాను స్టోర్ చేసే ‘ఇంటర్నెట్ ఆర్కైవ్’ అనే డిజిటల్ లైబ్రరీలో ఈ ఫైళ్లన్నీ ఎవరైనా ఫ్రీగా డౌన్‌లోడ్ చేసుకునేలా కనిపించడంతో ఈ భారీ లీక్ బట్టబయలైంది. విషయం తెలియగానే ఆ సంస్థ వెంటనే ఆ డాక్యుమెంట్లను సైట్ నుంచి తొలగించి, సైబర్ పోలీసులకు సమాచారం అందించింది. అప్పటికే జరగాల్సిన నష్టం జరిగిపోయిందా లేదా ఎవరైనా ఆ స్క్రిప్టులను కాపీ చేసుకున్నారా అన్న అనుమానాలు సినీ వర్గాల్లో తీవ్ర ఆందోళన కలిగిస్తున్నాయి.

ఈ వ్యవహారంపై సెన్సార్ బోర్డు వెంటనే స్పందించింది. ప్రస్తుతం పోర్టల్ భద్రతను టెక్నికల్ టీమ్స్ క్షుణ్ణంగా తనిఖీ చేస్తున్నాయని స్పష్టం చేసింది. ఇప్పటివరకు ఎవరి అకౌంట్లూ హ్యాక్ కాలేదని, లీకైన ఫైళ్లను ఎవరూ డౌన్‌లోడ్ చేసుకోలేదని ప్రాథమికంగా వెల్లడించింది. అయితే సమగ్ర విచారణ పూర్తయితే తప్ప అసలు ఎంత డేటా లీకైందనే అంశంపై స్పష్టత వచ్చే అవకాశం కనిపించడం లేదు.