ఉత్తరప్రదేశ్‌లోని మౌ జిల్లాలో చోటుచేసుకున్న ఓ వింత ఘటన ప్రస్తుతం తీవ్ర దుమారం రేపుతోంది. ప్రధాని మోదీ ఫొటోతో గుర్తుతెలియని వ్యక్తులు క్షుద్రపూజలు నిర్వహించినట్లు కనిపిస్తున్న వీడియోలు, ఫొటోలు సోషల్ మీడియాలో వైరల్ కావడంతో స్థానికంగా తీవ్ర కలకలం చెలరేగింది.

దోహ్రీఘాట్ పోలీస్ స్టేషన్ పరిధిలోని సరయూ నది తీరంలో, శ్మశానవాటిక సమీపంలో ఈ ఉదంతం వెలుగుచూసింది. నది ఒడ్డున నేలపై ప్రధాని మోదీ చిత్రపటాన్ని ఉంచి, దాని చుట్టూ కొబ్బరికాయలు, నిమ్మకాయలు, మేకులు, కాషాయ రంగు పొడి తదితర పూజా సామాగ్రిని అమర్చిన దృశ్యాలు వీడియోలో స్పష్టంగా కనిపిస్తున్నాయి. నదీ తీరానికి వచ్చిన స్థానికులు ఈ వింత దృశ్యాలను గమనించి పోలీసులకు సమాచారం ఇవ్వడంతో అధికారులు వెంటనే ఘటనా స్థలానికి చేరుకుని ఆ వస్తువులను స్వాధీనం చేసుకున్నారు.

ఈ వ్యవహారంపై ఘోసి సర్కిల్ ఆఫీసర్ సత్యేంద్ర భూషణ్ తివారీ స్పందిస్తూ, భారతీయ న్యాయ సంహిత (BNS) సెక్షన్ల కింద గుర్తుతెలియని వ్యక్తులపై ఎఫ్‌ఐఆర్ నమోదు చేసినట్లు తెలిపారు. ఈ వీడియోను ఎక్కడ, ఎప్పుడు రికార్డ్ చేశారు? దీన్ని ఎవరు సోషల్ మీడియాలోకి అప్‌లోడ్ చేశారు? ప్రధాని ఫొటోను కావాలనే అక్కడ ఉంచారా అనే కోణాల్లో సైబర్ విభాగం దర్యాప్తు చేస్తోందని చెప్పారు. పరిసరాల్లోని సీసీటీవీ ఫుటేజీలు, సాంకేతిక ఆధారాలను పరిశీలిస్తున్నామని, అయితే నిజంగానే అక్కడ క్షుద్రపూజలు జరిగాయా లేదా అనేదానిపై దర్యాప్తు పూర్తయ్యాకే పూర్తి క్లారిటీ వస్తుందని పోలీసులు స్పష్టం చేశారు.

మరోవైపు ఈ ఉదంతం రాజకీయ వివాదానికి తెరలేపింది. ఈ ఘటనపై ఆమ్ ఆద్మీ పార్టీ (AAP) ఎక్స్‌లో ట్వీట్ చేస్తూ తీవ్ర వ్యంగ్యాస్త్రాలు సంధించింది. ఉత్తరప్రదేశ్‌లో శాంతిభద్రతల పరిరక్షణ, నేరాల నియంత్రణ, నిరుద్యోగం వంటి కీలక సమస్యలను గాలికొదిలేసి, పోలీసులు క్షుద్రపూజల వ్యవహారాలపై సమయం వృథా చేస్తున్నారని ఎద్దేవా చేసింది. దీంతో బీజేపీ, విపక్షాల మధ్య మాటల యుద్ధం మొదలైంది.