
Heat Ray Weapon : అమెరికా-మెక్సికో సరిహద్దులో అక్రమ వలసదారులను అడ్డుకునేందుకు పెంటగాన్ తీసుకున్న ఓ నిర్ణయం తీవ్ర దుమారం రేపుతోంది. అమెరికా రక్షణ మంత్రి పీట్ హెగ్సెత్, ‘డైరెక్టెడ్-ఎనర్జీ వెపన్’గా పిలిచే ఒక ప్రమాదకరమైన ‘హీట్ రే’ ఆయుధాన్ని పరీక్షించేందుకు హోంల్యాండ్ సెక్యూరిటీ విభాగానికి అనుమతినిచ్చారు.
Also Read : కొరియాలో హైపర్సోనిక్ పోరు.. AI క్షిపణులు, సరిహద్దు ఉద్రిక్తతలు
ఏమిటీ ‘హీట్ రే’
సైనిక పరిభాషలో దీనిని ‘యాక్టివ్ డినయల్ సిస్టమ్’ (ADS) అంటారు. భారీ జనసమూహాలను చెదరగొట్టేందుకు డెవలప్ చేసిన ఒక నాన్-లీథల్ (ప్రాణహాని లేని) మిలిటరీ వెపన్ ఇది. ఇది 95 గిగాహెర్ట్జ్ ఫ్రీక్వెన్సీతో కనిపించని ఎలక్ట్రోమాగ్నెటిక్ వేవ్స్ను ప్రసరిస్తుంది. దాదాపు మన మైక్రోవేవ్ ఒవెన్ టెక్నాలజీ లాగే పనిచేస్తుంది. ఈ కిరణాలు చర్మంలోకి కేవలం 1/64 అంగుళం మాత్రమే చొచ్చుకెళ్లి, చర్మంలోని తేమను తీవ్రంగా వేడెక్కిస్తాయి.
Also Read : సిమ్ కార్డు తీస్తే వాట్సాప్ బంద్.. కేంద్ర ప్రభుత్వం సంచలన నిర్ణయం!
ఆ ఎఫెక్ట్ ఎలా ఉంటుంది?
ఎవరైనా ఈ కిరణాల పరిధిలోకి వస్తే, ఒక్కసారిగా పెద్ద కొలిమి డోర్ తీసినట్లు అనిపిస్తుంది. చర్మం భరించలేనంతగా మండిపోవడంతో, వెంటనే అక్కడి నుంచి పారిపోవాలనే ఇన్స్టింక్ట్ కలుగుతుంది. ప్రభావం 10 నుంచి 15 నిమిషాల్లో తగ్గిపోతుందని, శాశ్వత డ్యామేజ్ ఉండదని పెంటగాన్ చెబుతున్నప్పటికీ, హ్యూమన్ రైట్స్ గ్రూపులు అలాగే డాక్టర్లు తీవ్ర హెచ్చరికలు చేస్తున్నారు. బీమ్ ముందు నుంచి వెంటనే తప్పించుకోలేకపోతే చర్మంపై తీవ్రమైన బొబ్బలు వచ్చే ప్రమాదం ఉంది. కిరణాలు నేరుగా కళ్లపై పడితే శాశ్వతంగా కంటి చూపు పోవచ్చు. వలసదారుల గుంపులపై ఇది ప్రయోగిస్తే తీవ్ర తొక్కిసలాట జరిగి చిన్నారులు, వృద్ధులు చనిపోయే ప్రమాదం ఉంది.
లీకైన మెమో ప్రకారం, ఈ ADS యూనిట్ను 7 నెలల టెస్టింగ్ కోసం DHSకి అందించారు. లీగల్ సమస్యలు పెంటగాన్పై పడకుండా ఉండేందుకే బోర్డర్ సెక్యూరిటీ (CBP) ఆధ్వర్యంలో దీన్ని నడిపిస్తున్నట్లు విమర్శలు వస్తున్నాయి. ఆఫ్ఘనిస్తాన్ మొదలుకుని ఎప్పుడూ వివాదాల్లో ఉండే ఈ ‘హీట్ రే’ ప్రయోగం, ఇప్పుడు అంతర్జాతీయ మానవ హక్కుల వేదికలపై సరికొత్త చర్చకు దారితీసింది.









