వాషింగ్టన్ : అమెరికా రాజకీయాల్లో ఇప్పుడు తీవ్ర స్థాయి హైడ్రామా నడుస్తోంది. అధ్యక్షుడు డొనాల్డ్ ట్రంప్ కేబినెట్‌లో రక్షణ మంత్రిగా బాధ్యతలు నిర్వర్తిస్తున్న పీట్ హెగ్సెత్‌పై ప్రవేశపెట్టిన అభిశంసన తీర్మానం యూఎస్ కాంగ్రెస్‌లో పెను ప్రకంపనలు సృష్టిస్తోంది. ఈ ప్రయత్నాన్ని హెగ్సెత్ తీవ్రంగా తిరస్కరించారు. ఇరాన్ యుద్ధం, వెనిజులా చర్యలు, డ్రగ్ కార్టెల్స్‌పై తీసుకున్న నిర్ణయాలన్నీ సర్వ సైన్యాధ్యక్షుడైన ప్రెసిడెంట్ ఆదేశాల మేరకే జరిగాయని, అవన్నీ పూర్తిగా చట్టబద్ధమైనవేనని స్పష్టం చేశారు.

Also Read : పొగమంచులో 86 వాహనాలు ఢీ.. 12 మంది దుర్మరణం!

ఇది వ్యక్తిగత ద్వేషం.. రాజకీయ డ్రామా!

కెంటకీకి చెందిన రిపబ్లికన్ రెప్రజెంటేటివ్ థామస్ మాస్సీ హెగ్సెత్‌పై ఎనిమిది అంశాలతో కూడిన అభిశంసన తీర్మానాన్ని ప్రతిపాదించారు. దీనిపై పెంటగాన్ బ్రీఫింగ్‌లో హెగ్సెత్ తీవ్ర ఆగ్రహం వ్యక్తం చేశారు. “ఇవి కేవలం పాలసీ విభేదాలు మాత్రమే. రాజ్యాంగంలో పేర్కొన్న దేశద్రోహం, లంచం లేదా తీవ్ర నేరాలు కావు” అని పేర్కొన్నారు. ప్రైమరీ ఎన్నికల్లో ఓడిపోయిన ఒక అసంతృప్త నేత, కాంగ్రెస్‌లో తన చివరి రోజుల్లో అహం, అసూయలతో ‘పొలిటికల్ స్టంట్’ చేస్తున్నారని మాస్సీని ఉద్దేశించి విమర్శించారు. ఇలాంటి చర్యలు అమెరికన్ శత్రువులకు తప్పుడు సంకేతాలు పంపుతాయని, ఇది దేశభక్తి కాదని.. విధ్వంసకరమని హెచ్చరించారు.

ఎవరీ పీట్ హెగ్సెత్?

పీట్ హెగ్సెత్ ప్రిన్స్‌టన్ యూనివర్సిటీ నుంచి పొలిటికల్ సైన్స్‌లో బ్యాచిలర్స్, హార్వర్డ్ జాన్ ఎఫ్. కెన్నెడీ స్కూల్ నుంచి పబ్లిక్ పాలసీలో మాస్టర్స్ పూర్తి చేశారు. ఆర్మీ నేషనల్ గార్డ్‌లో చేరిన ఆయన, గ్వాంటనామో బేతో పాటు ఇరాక్, ఆఫ్ఘనిస్తాన్‌లలో ఇన్ఫాంట్రీ ఆఫీసర్‌గా సేవలందించి రెండు కాంస్య పతకాలు  సాధించారు. మిలిటరీ నుంచి బయటకు వచ్చాక, మాజీ సైనికుల కోసం పోరాడే ‘Concerned Veterans for America’ సంస్థకు నాయకత్వం వహించారు. ‘ది వార్ ఆన్ వారియర్స్’ అనే బెస్ట్ సెల్లర్ పుస్తకాన్ని కూడా రాశారు.

పూర్తి మద్దతు ప్రకటించిన ట్రంప్

హెగ్సెత్ ప్రెస్‌మీట్ ముగిసిన వెంటనే డొనాల్డ్ ట్రంప్ తన సోషల్ మీడియా ప్లాట్‌ఫామ్ ‘ట్రూత్ సోషల్’ వేదికగా రంగంలోకి దిగారు. మాస్సీ వాదనలను సమర్థవంతంగా తిప్పికొట్టినందుకు హెగ్సెత్‌కు ‘A+++’ రేటింగ్ ఇస్తున్నట్లు పేర్కొంటూ పూర్తి అండగా నిలిచారు. గతంలో డెమోక్రాట్లు తనపై రెండుసార్లు విఫలయత్నం చేశారని, ఇప్పుడు తన కేబినెట్ మెంబర్‌పై మూడోసారి ప్రయత్నిస్తున్నారని, ఇది కూడా ఫెయిల్ కాక తప్పదని స్పష్టం చేశారు.

తీర్మానం వెనుక అసలు కారణాలు

యూఎస్ కాంగ్రెస్ ఆమోదం లేకుండా ఇరాన్‌పై యుద్ధం చేయడం, కరేబియన్‌లో డ్రగ్ స్మగ్లర్ల బోట్లపై దాడులు, యెమెన్ మరియు వెనిజులా ఆపరేషన్లను ఈ తీర్మానంలో ప్రధానంగా ప్రస్తావించారు. అయితే, ఇరాన్ అణ్వాయుధాలు సాధించకుండా అడ్డుకోవడానికి ఈ చర్యలు తప్పలేదని హెగ్సెత్ బలంగా సమర్థించుకున్నారు. “ఈ ఆపరేషన్స్ అన్నింటికీ నేను కట్టుబడి ఉన్నాను. రేపు మళ్ళీ చేయాల్సి వచ్చినా వెనకడుగు వేయను” అని కుండబద్దలు కొట్టారు.

Also Read : ప్రపంచాన్ని ఊపేస్తున్న ఎన్వీడియా సీఈఓ సీక్రెట్ ఎఫైర్.. నెట్టింట మార్మోగుతున్న కంపెనీ అసలు ఏం చేస్తుంది?

హౌస్‌లో సస్పెన్స్.. సెనేట్ తీర్పుపై ఉత్కంఠ

ఇటీవలి మధ్యంతర ఎన్నికల తర్వాత హౌస్ ఆఫ్ రెప్రజెంటేటివ్స్‌లో రిపబ్లికన్లకు 218-214 స్వల్ప మెజారిటీ మాత్రమే ఉంది. అయితే, తదుపరి స్పీకర్‌గా రానున్న హకీమ్ జెఫ్రీస్ నేతృత్వంలోని డెమోక్రాట్లు ఈ ఇంపీచ్‌మెంట్‌కు మద్దతు ఇస్తుండటంతో ఓటింగ్ తీవ్ర ఉత్కంఠగా మారింది. ఒకవేళ హౌస్‌లో తీర్మానం పాసైనా, సెనేట్ ట్రయల్‌లో పదవి నుంచి తొలగించాలంటే మూడింట రెండొంతుల మెజారిటీ అవసరం. అమెరికా 250 ఏళ్ల చరిత్రలో ఏ రక్షణ మంత్రి కూడా ఇలాంటి సైనిక చర్యల కారణంగా పదవి కోల్పోలేదు. ఈ రాజకీయ వివాదం చివరకు ఎటు దారితీస్తుందో చూడాలి.