Fake currency:రూమ్ అద్దె కట్టేందుకు డబ్బులు లేవని.. ఏకంగా ఇంట్లోనే కలర్ ప్రింటర్ పెట్టి నకిలీ నోట్లు ప్రింట్ చేసిన ఘటన మహారాష్ట్రలోని నాగ్‌పూర్‌లో వెలుగుచూసింది. అద్దె గదిలో ఏకంగా రూ.37 లక్షల విలువైన నకిలీ రూ.500 నోట్లను ముద్రించిన నిందితుడు, వ్యవహారం బయటపడే సమయానికి అక్కడి నుంచి పరారయ్యాడు.

నాగ్‌పూర్‌ ఖర్బీ ఏరియాలో పుష్పక్ అలియాస్ బెండనే అనే వ్యక్తి ఏడాదిన్నర క్రితం ఓ రూమ్ అద్దెకు తీసుకున్నాడు. జనవరితో అతని రెంటల్ అగ్రిమెంట్ ముగిసినా, కొన్ని నెలలుగా రెంట్ చెల్లించకుండా అక్కడే ఉంటున్నాడు. ఓనర్ రమేశ్ అద్దె అడగ్గా, పుష్పక్ అతనిపై కత్తితో బెదిరింపులకు దిగాడు. దీంతో ఓనర్ పోలీసులకు కంప్లైంట్ ఇచ్చాడు. ఆ తర్వాత పుష్పక్ కొద్దిరోజులుగా రూమ్‌కు రావడం పూర్తిగా మానేశాడు. అనుమానం వచ్చిన ఓనర్ శనివారం తాళం పగలగొట్టి లోపలికి వెళ్లి చూడగా.. గదిలో ఉన్న దృశ్యం చూసి ఫ్యూజులు ఎగిరిపోయాయి.

గదిలోని ఓ బకెట్ నిండా కరెన్సీ నోట్ల కట్టలు, నేలపై ప్రింటింగ్ పేపర్లు, కలర్ ప్రింటర్ కనిపించాయి. వెంటనే ఓనర్ పోలీసులకు సమాచారం అందించాడు. వాటోదా పోలీసులు అక్కడికి చేరుకుని, కరెన్సీ కౌంటింగ్ మెషీన్ ద్వారా లెక్కించగా సుమారు రూ.37 లక్షల విలువైన ఫేక్ రూ.500 నోట్లు లభ్యమయ్యాయి. వీటితో పాటు ఒకవైపు మాత్రమే ప్రింట్ అయిన నోట్లు, ఖరీదైన పేపర్లు, ప్రింటింగ్ మెటీరియల్‌ను స్వాధీనం చేసుకున్నారు. సీజ్ చేసిన మొత్తం మెటీరియల్ విలువ దాదాపు రూ.48 లక్షలు ఉంటుందని పోలీసులు తెలిపారు.

ప్రస్తుతం పరారీలో ఉన్న పుష్పక్ ముంబైలో ఉన్నట్లు సమాచారం అందడంతో, అతడిని పట్టుకునేందుకు స్పెషల్ పోలీస్ టీమ్‌ను రంగంలోకి దించారు. అసలు ఈ ఫేక్ నోట్లను మార్కెట్‌లోకి ఎక్కడ సప్లై చేయాలనుకున్నాడు? ఈ నెట్‌వర్క్ వెనుక ఇంకా ఎవరైనా ఉన్నారా? అనే కోణంలో పోలీసులు దర్యాప్తు ముమ్మరం చేశారు.