Kolkata:  పశ్చిమ బెంగాల్‌లోని పశ్చిమ మేదినీపూర్ జిల్లాలో తీవ్ర ఆరోపణలు కలకలం రేపుతున్నాయి. బజరంగ్ దళ్‌తో సంబంధం ఉన్న కొంతమంది తనపై దాడి చేసి, బట్టలు విప్పి, అందరి ముందే బలవంతంగా స్నానం చేయించారని ఓ క్రైస్తవ మహిళ ఆరోపించారు. ‘శుద్ధి’ పేరుతో ఈ కార్యక్రమం చేశారని ఆమె ఫిర్యాదులో పేర్కొన్నారు. తన కుటుంబంతో పాటు మరో రెండు కుటుంబాలను హిందూ మతంలోకి మారాలని వారు బలవంతం చేశారని ఆరోపించారు.

దుర్గాపూజ సందర్భంగా అక్టోబర్ 18న ఈ ఘటన జరిగినట్లు మహిళ తన ఫిర్యాదులో తెలిపింది. పోలీసులకు వెళ్తే మూడు కుటుంబాలనూ ‘సజీవంగా తగలబెడతామని’ బెదిరించారని ఆమె చెప్పింది. దీంతో తాను పోలీసులకు ఫోన్ చేసినప్పటికీ, ఆ తర్వాత రెండు రోజుల పాటు కూడా ఆ కుటుంబాలను కొంతమంది భయపెడుతూనే ఉన్నారని ఆరోపించారు.

తనతో పాటు కొంతమంది కుటుంబ సభ్యులను సమీపంలోని డింగల్ గ్రామంలోని దుర్గాపూజ మండపానికి తీసుకెళ్లారని ఆమె చెప్పారు. అక్కడ తమ ఇష్టానికి వ్యతిరేకంగా కొన్ని మతపరమైన కార్యక్రమాలు చేయించారని ఆరోపించారు.

ఈ ఘటనపై చివరకు చందర్‌కోణా పోలీసులు కేసు నమోదు చేశారు. మహిళ ఇచ్చిన ఫిర్యాదు ఆధారంగా అక్టోబర్ 20 రాత్రి ఎఫ్‌ఐఆర్ నమోదు చేశారు. హత్యాయత్నం సహా పలు నేరాలకు సంబంధించిన BNS సెక్షన్ల కింద కనీసం 13 మందిపై కేసు పెట్టారు. అయితే అక్టోబర్ 24 సాయంత్రం 6.30 గంటల వరకు ఎవరినీ అరెస్టు చేయలేదు.

ఈ ఆరోపణలపై స్పందన కోసం ఎన్‌డీటీవీ పోలీసు సూపరింటెండెంట్ పాపియా సుల్తానాను సంప్రదించినప్పటికీ.. ఆమె నుంచి ఎలాంటి సమాధానం రాలేదు. ప్రతిపక్ష పార్టీలైన తృణమూల్ కాంగ్రెస్, కాంగ్రెస్ వెంటనే చర్యలు తీసుకోవాలని డిమాండ్ చేశాయి. అయితే అధికార బీజేపీ మాత్రం ఈ ఆరోపణలపై ఉద్దేశపూర్వకంగా చర్యలు తీసుకోవడం లేదన్న విమర్శలకు అప్పటివరకు స్పందించలేదు.

 

Vamshi Krishna
కందారపు వంశీకృష్ణ ఏడేళ్లుగా జర్నలిజంలో ఉన్నారు. డిజిటల్ మీడియాలో ముందుగా HMTVలో రెండేళ్లు పనిచేశారు. అనంతరం TV5లో ఏడాది, V6లో రెండున్నరేళ్లు పనిచేశారు. తర్వాత పల్లవి టీవీలో చేరి అక్కడ 6 నెలలు పనిచేశారు. ప్రస్తుతం ఆర్టీవీలో ఏడాదిన్నరగా పనిచేస్తున్నారు. బ్రేకింగ్స్, పొలిటికల్, నేషనల్, స్పోర్ట్స్, సినిమా తదితర కేటగిరీల వార్తలు ఎక్కువగా రాస్తుంటారు.