Delhi Online Liquor :  ఢిల్లీలో మందు కొనేవారికి కొత్త సదుపాయం అందుబాటులోకి వచ్చింది. ఇక నుంచి మందు బాటిళ్లను ముందుగానే మొబైల్ యాప్‌లో బుక్ చేసుకోవచ్చు. ఢిల్లీ స్టేట్ ఇండస్ట్రియల్ అండ్ ఇన్‌ఫ్రాస్ట్రక్చర్ డెవలప్‌మెంట్ కార్పొరేషన్‌ (DSIIDC) ఈ యాప్‌ను తీసుకొచ్చింది. అయితే ఇందులో డోర్ డెలివరీ మాత్రం లేదు. ఆన్‌లైన్‌లో బుక్ చేసిన మందును ఎంచుకున్న షాపుకే వెళ్లి తీసుకోవాలి. ఈ యాప్‌లో అందుబాటులో ఉన్న మద్యం బ్రాండ్లను చూసుకోవచ్చు. కావాల్సిన బ్రాండ్‌, బాటిల్ సైజ్‌, ఎన్ని బాటిళ్లు కావాలో ఎంచుకుని బుక్ చేసుకోవచ్చు. ఆ తర్వాత మందు తీసుకునే షాప్‌ను సెలెక్ట్ చేసి ఆన్‌లైన్‌లో పేమెంట్ చేయాలి. బుకింగ్ పూర్తయిన తర్వాత కస్టమర్‌కు ఒక QR కోడ్ వస్తుంది. బుక్ చేసిన షాప్‌కు వెళ్లి ఆ QR కోడ్‌ను చూపిస్తే మందు బాటిళ్లు ఇస్తారు. అయితే బుకింగ్ చేసిన 48 గంటల్లోపు బాటిళ్లను తీసుకోవాలి. 48 గంటలు దాటితే ఏం జరుగుతుందనే దానిపై షాప్‌లోని నిబంధనలు వర్తిస్తాయి.

Also Read : జియో దెబ్బకు టాటా గ్రూప్ వెనక్కి.. రూ. 30.5 లక్షల కోట్లతో అంబానీ రికార్డు!

ప్రస్తుతం ఈ ఆన్‌లైన్ బుకింగ్ సదుపాయం DSIIDC నిర్వహిస్తున్న షాపుల్లో మాత్రమే ఉంది. ఢిల్లీలో DSIIDCకి మొత్తం 208 మద్యం షాపులు ఉన్నాయి. మిగతా ప్రభుత్వ మద్యం షాపుల్లో ఈ సదుపాయం ప్రస్తుతం అందుబాటులో లేదు. బుక్ చేసిన మందును తీసుకునే ముందు కస్టమర్ ఆర్డర్‌ను క్యాన్సిల్ చేసుకోవచ్చు. కానీ ఒకసారి మందు అమ్మిన తర్వాత లేదా షాప్‌ నుంచి తీసుకున్న తర్వాత రిటర్న్ చేసే అవకాశం లేదు.

ఈ యాప్‌ను ఉపయోగించాలంటే కస్టమర్‌కు 25 ఏళ్లు లేదా అంతకంటే ఎక్కువ వయసు ఉండాలి. ఢిల్లీ ఎక్సైజ్ నిబంధనల ప్రకారం ఒక వ్యక్తి గరిష్ఠంగా 9 లీటర్ల విస్కీ, 18 లీటర్ల బీర్ కొనుగోలు చేయవచ్చు. మద్యం షాపుల దగ్గర ఎక్కువసేపు క్యూలో నిలబడాల్సిన అవసరం లేకుండా చేయడమే ఈ యాప్‌ ఉద్దేశం. ముందుగానే బుక్ చేసుకోవడం వల్ల షాపుల దగ్గర రద్దీ తగ్గుతుందని అధికారులు భావిస్తున్నారు. అలాగే షాపుకు వెళ్లే ముందే ఏ బ్రాండ్లు అందుబాటులో ఉన్నాయో చూసుకునే అవకాశం ఉంటుంది. ధరలు, బిల్లింగ్‌లో కూడా క్లారిటీ ఉంటుందని అధికారులు చెబుతున్నారు.

అయితే ఈ ఆన్‌లైన్ బుకింగ్‌కు ఇప్పటివరకు పెద్దగా స్పందన రాలేదని అధికారులు తెలిపారు. ప్రజల నుంచి వచ్చే రెస్పాన్స్‌ను బట్టి ఈ సదుపాయాన్ని మరిన్ని షాపులకు అందుబాటులోకి తీసుకురావాలా లేదా అనేది నిర్ణయిస్తామని చెప్పారు. ఢిల్లీలో ప్రభుత్వ సంస్థలకు చెందిన నాలుగు సంస్థలకు మద్యం అమ్మే అనుమతి ఉంది. ఈ నాలుగు సంస్థలు కలిసి ఢిల్లీ వ్యాప్తంగా 700కు పైగా మద్యం షాపులు నిర్వహిస్తున్నాయి. అయితే ప్రస్తుతం ఆన్‌లైన్ బుకింగ్ సదుపాయం మాత్రం DSIIDC షాపుల్లోనే అందుబాటులో ఉంది.

Also Read : కర్ణాటక MLC ఎన్నికల్లో కాంగ్రెస్‌కు ఊహించని షాక్.. NDA క్లీన్ స్వీప్

Vamshi Krishna
కందారపు వంశీకృష్ణ ఏడేళ్లుగా జర్నలిజంలో ఉన్నారు. డిజిటల్ మీడియాలో ముందుగా HMTVలో రెండేళ్లు పనిచేశారు. అనంతరం TV5లో ఏడాది, V6లో రెండున్నరేళ్లు పనిచేశారు. తర్వాత పల్లవి టీవీలో చేరి అక్కడ 6 నెలలు పనిచేశారు. ప్రస్తుతం ఆర్టీవీలో ఏడాదిన్నరగా పనిచేస్తున్నారు. బ్రేకింగ్స్, పొలిటికల్, నేషనల్, స్పోర్ట్స్, సినిమా తదితర కేటగిరీల వార్తలు ఎక్కువగా రాస్తుంటారు.