
ప్రతిరోజూ దూర ప్రాంతాల నుంచి స్కూళ్లు, కాలేజీలకు వెళ్లే విద్యార్థులకు భారతీయ రైల్వే శాఖ అదిరిపోయే గుడ్ న్యూస్ అందించింది. చదువుకునే విద్యార్థులపై ప్రయాణ ఖర్చుల భారాన్ని తగ్గించేందుకు రైల్వే శాఖ ప్రత్యేక రాయితీలను అందిస్తోంది. ఇందులో భాగంగా అర్హులైన విద్యార్థులు ప్యాసింజర్ రైళ్లలో ఒక్క రూపాయి కూడా చెల్లించకుండా ఫ్రీగా ప్రయాణించే వెసులుబాటు కల్పించింది.
ఈ ఉచిత ప్రయాణ సదుపాయానికి సంబంధించి రైల్వే శాఖ కొన్ని నిబంధనలను వెల్లడించింది. దాని ప్రకారం.. బాలురు ఇంటర్మీడియట్ (12వ తరగతి) వరకు, బాలికలు డిగ్రీ స్థాయి వరకు ప్యాసింజర్ రైళ్లలో ఫ్రీగా జర్నీ చేయవచ్చు. ఈ సౌకర్యం కేవలం సెకండ్ క్లాస్ (జనరల్) బోగీలకు మాత్రమే రైల్వే శాఖ పరిమితం చేసింది. అంతేకాకుండా విద్యార్థి ఇంటి నుంచి వారు చదువుకునే కాలేజీకి మధ్య దూరం గరిష్టంగా 150 కిలోమీటర్ల లోపు ఉండాలని నిర్ణయించింది. ఈ పరిధిలో ప్రయాణించే వారికి మాత్రమే ఈ ఫ్రీ పాస్ వర్తిస్తుంది.
ఈ సదుపాయాన్ని పొందాలనుకునే విద్యార్థులు తమ కాలేజీ జారీ చేసిన గుర్తింపు ఐడీ కార్డు, పాస్పోర్ట్ సైజు ఫొటోలను తీసుకొని సమీపంలోని రైల్వే స్టేషన్ టికెట్ కౌంటర్కు వెళ్లాలి. అక్కడ వివరాలను పరిశీలించిన తర్వాత.. రైల్వే సిబ్బంది విద్యార్థులకు ఉచిత మంత్లీ సీజన్ టికెట్ (MST) జారీ చేస్తారు. ఈ పాస్తో విద్యార్థులు నెలంతా తమ కాలేజీలకు ఫ్రీగా రాకపోకలు సాగించవచ్చు.
కేవలం రోజువారీ ప్రయాణాలకు మాత్రమే కాకుండా.. ఇతర విద్యా సంబంధిత అవసరాలకు కూడా రైల్వే శాఖ రాయితీలను అందిస్తోంది. విద్యా సంస్థల తరఫున వెళ్లే ఎడ్యుకేషనల్ టూర్లు, వివిధ ప్రభుత్వ ఉద్యోగాలు, ప్రవేశ పరీక్షలకు హాజరయ్యే అభ్యర్థులకు కూడా టికెట్ ధరల్లో ప్రత్యేక డిస్కౌంట్ అందిస్తుంది.









